viernes, 31 de octubre de 2008

Venezuela pon n'orbita'l satélite "socialista" Simón Bolívar.


Venezuela llanzó'l miércoles al espaciu'l so primer satélite con fines civiles y col que'l presidente Hugo Chávez quier avanzar na "construcción del socialismu" y la integración llatinoamericana. El satélite foi construyíu y llanzáu en China. Hugo Chávez, acompangáu del presidente de Bolivia, Evo Morales, presenció la operación dende Luepa, al este de Venezuela, onde s'alcuentra la segunda estación de control del Simón Bolívar.

"¿Qué tien que ver un satélite col socialismu? Una empresa capitalista llanza un satélite pa facer perres. Esti ye un actu de lliberación ya independencia (...) pa construyir el socialismu dentro de Venezuela y pa cooperar con otros pueblos", declaró Chávez. "Esti satélite nun ye pa nós sinon pa los pueblos d'América Llatina y el Caribe (...) ye un pasu más hacia la independencia", cellebró Chávez, asegurando qu'esti proyeutu "romperá col analfabetismu tecnolóxicu".

Demientres los sos 15 años de vida útil, el Simón Bolívar va estendese "a países hermanos" pa desendolcar "programes sociales, por exemplu d'alfabetización o telemedicina" y también servirá pa abaratar y axilizar los sistemes de telecomunicaciones, según la ministra de Ciencia y Tecnoloxía, Nuris Orihuela.

Chavez criticó que Estados Xuníos intentare hasta l'últimu momentu torgar la puesta n'órbita del Simón Bolívar, enviando al gobiernu chinu una solicitú para "suspender el so llanzamientu"."Dicíen qu'había que revisar el satélite porque se ficiera una modificación que podía xenerar una perturbación. Hasta'l ridículu llega l'imperiu na so obsesión por dominar el mundu" comentó Chavez, asegurando que la respuesta del gobierno chino "foi que nun había nenguna razón pa suspender ".

Evo Morales felicitó al so homólogou pola puesta n'órbita del Simón Bolívar y confió que la so activación favreza tamién a los pueblos indíxenes d'America Llatina.

El xerente téunico de l'Agencia Bolivariana de Actividades Espaciales (ABAE), Rodolfo Navarro, informó que Venezuela quier llanzar en 2013 el so segundu satélite, esta vez de fabricación propia y destináu a la observación de la Tierra.

jueves, 30 de octubre de 2008

Que facer en casu de detención.



Anguaño, nestos tiempos, onde podemos güeyar como la maquinaria represiva medra y funciona más a menudu, onde podemos ver como l'estau emplega ca vegada más el so brazu represor, nun mos vien mal precisamente tar enteraxs de que podemos facer na nuesa defensa nun casu hipotéticu de represión, que puer pasanos a toos y toes, y más viendo la situación que sofre la mocedá asturiano nestos años caberos.

Asina escolingo ún artículo que asoleyó el muerganismu antirrepresivu Sofitu que paezme que merez la másima difusión ente la xente mozo y combativo:


Si yes deteníu/a y ties más de 18 años, ties estos drechos, que la policía tién que rispetar:
- Nel momentu la detención tiés que ser informáu/da de los tos drechos.
- Tiés que ser informáu/da de lo que t’acusen.
- Pués exixir ser atendíu/da por ún/a mélicu/a.
- Dispones d’una llamada de teléfonu, que faerá la policía; camienta bien el teléfonu que-yos dás, pues en dalgunos casos ye meyor valorar a quién avisarán. Ye aconseyable aprovechar la llamada pa contautar con ún/a abogáu/da de confianza.
- Pués escoyer abogáu/da y sinon ser asistíu/da por ún/a d’oficiu.
- Solamente pués ser interrogáu/da en presencia d’el/la to abogáu/da desináu/da.
- Tiés drechu a ñegar la verdá.
- Nun tiés que contestar a les entrugues que te faiga la policía na comisaría, solamente ye obligatoriu dar el to nome.
- Nun declares antre la policía, dexando la declaración pa cuandu tés delantre’l xuez. Tamién te pués ñegar a declarar antre’l xuez. Tú nun tiés porqué declarate culpable de ná, ni dicir ná que te perxudique. (ARTÍCULU 24 la COSTITUCIÓN y ARTÍCULU 520 de L.E.C.).
- Pués pidir un "HABEAS CORPUS" si nun tás d’alcuerdu cola to detención. Ye una forma de enforciar al xuez el to treslláu a les dependencies del xulgáu. Vién a ser una denuncia escontra la policía. Pué ser puestu por un/a compañeru/a o familiar, faciendo una petición al xuez, fiscal o defensor del pueblu.
- Tienen que date xinta, bébora y unes condiciones mínimes d’hixiene.
- Deben asinate intérprete si yes d’otru país.
- Pués exixir al xulgáu qu’investigue sobre lo que nun tás d’alcuerdu, faciéndolo costar na tu declaración antre’l xuez.
- Nel casu d’una denuncia de la policía por atentáu, resistencia o similar ye perimportante denunciar igualmente y dar los partes mélicos, el del forense la comisaría, el de los xulgaos y cuandu coles dir pa urxencies y pidir un parte mélicu. Cuantos más papeles mélicos dés meyor.
- Nun afletes ná que nun seya tuyu y menos lu toques.

¿Cuantu tiempu pués pasate’n comisaría?
- La policía pué citate y pidir que pases pela comisaría pa que contestes dalgunes entrugues. Lo suyu ye que pases de dir polos tos propios pies, lo que pué enforciar que te detengan. Como otra opción pués presentate direutamente nel xulgáu.
- Pueden retenete cola escusa de que tán comprobando los tos datos y siguir enforciándote a que faigas dalguna declaración.
- Pueden detenerte 72 hores en comisaría si el xuez nun pidió’l to treslláu al xulgáu.
- Si aplíquente la LLEI ANTITERRORISTA pueden tenete 5 díes ensin notificalo a naide y asinándote abogáu/da d’oficiu.
- La declaración del xuez pué ser: A. Llibertá ensin cargos y archívase l’asuntu. B. Llibertá a la espera de xuiciu. C. Ingresu na prisión cola posibilidá de salir con fianza, a la espera xuiciu. D. Ingresu na prisión ensin fianza. Si yes menor de 18 años, nun pueden detenete, nin mandate a la cárcele. Pero normalmente llévente a comisaría y llamen a los tos pás pa que vengan a buscate. Si consideren que cometiste un delitu l’asuntu pué enbelustrase como si nun lo fueres, pero enxamás diríes a la cárcele.

Puxa la mocedá revolucionario asturiano [*+].

Independencia y Socialismu.

miércoles, 29 de octubre de 2008

Non al xuiciu a Fer.


Pasaron más de 5 años dende que l'Audiencia Nacional Española abriera un sumario contra 3 independentistes asturianos y por fin conocese la petición fiscal pal que va ser l'unicu imputau: Fer G.R.

Fai 3 años, en setiembre de 2005, Fer foi prindáu y acusáu d'unos supuestos delitos de tenencia d'artefautu esplosivu y daños, estragos ya incendios terroristes, la mesma Audiencia Nacional vien de notificar que la fiscalía namás que quier procesar al militante asturianu por un presuntu delitu d'estragos terroristes col atenuante de tentativa. Por estos fechos fae una petición de 8 años de prisión, menguando asina enforma les primeres previsiones sobre posibles condergues, y desaniciando parte del montaxe mediáticu-policial. Ye de señalar que el sumariu, al que ya tiene accesu la defensa, presente prebes policiales como la tenencia d'una bolsa de Eroski (que inclui testu n'euskera) nel momentu de la detención o l'usu d'un pantalón de xándal de la marca vasca Astore, n'un intentu de relacionar a Fer con los episodios de llucha armá que asoceden n'otres partes del Estau.

- Páxina güeb Fer llibertá: http://www.glayiu.org/ferlliberta

Independencia y Socialismu [*+]

martes, 28 de octubre de 2008

LA FISCALIA DE L´AUDIENCIA NACIONAL PIDE 8 AÑOS DE PRISIÓN PAL INDEPENDENTISTA "FER"


Cuasi 6 años dempués de que l'Audiencia Nacional abriera un sumariu, a petición de la policía española n´Asturies, a Fer y a otros dos militantes independentistes asturianos por un presuntu delitu de colaboración con banda armada, y más de 3 años dempués de que Fer fora prindáu y acusáu d'unos supuestos delitos de tenencia d'artefautu esplosivu y daños, estragos ya incendios terroristes, la mesma Audiencia Nacional vien de notificar que la fiscalía namás que quier procesar al militante asturianu por un presuntu delitu d'estragos terroristes col atenuante de tentativa.

Por estos fechos fae una petición de 8 años de prisión, menguando asina enforma les primeres previsiones sobre posibles condergues, y desaniciando parte del montaxe mediáticu-policial que Fer careció dende la so detención.

Ensin qu'entá se conoza la fecha del xuiciu, ésti cellebrarase na Sala 4ª de lo penal de l'Audiencia Nacional, sala que preside la maxistrada Ángela Murillo.

Una vegada peslláu'l sumariu, lo que permite a la defensa tener acesu a una copia del mesmu, conocemos que parte de les prebes que la policía española presenta pa intentar criminalizar a Fer, son que nel intre la so detención, y dientro del so coche, había una bolsa de plásticu d'Eroski con pallabres n'euskera y un pantalón de xándal de la marca vasca Astore dientru d'una mochila.

Dende Sofitu facemos un llamamientu solidariu a tol movimientu independentista asturianu, y a tola izquierda alternativa del país, pa poder facer frente a tolos gastos que ta suponiendo la defensa llegal de Fer (abogaes, peritos, viaxes...), y tamién pa que que participen en toles movilizaciones que s'entamen de magar agora pa pidir que nun se xulgue a Fer.

DEFENDER ASTURIES NUN YE DELITU. NON AL XUICIU A FER.
PUXA ASTURIES LLIBRE. PUXA ASTURIES SOCIALISTA.

MÁS REPRESIÓN ESCONTRA L'INDEPENDENTISMU ASTURIANU


Por primera vegada n'Asturies, la Guardia Civil de tráficu vien de multar a dos militantes independentistes por tener asturianizada la so matrícula tapeciendo la lletra E d'España con una pegadiella cola AS d´Asturies.

Les multes, puestes nos conceyos de Xixón y Carreño, tienen un importe de 90€, y son otru mediu más d'acosu a tola xente que n'Asturies nun quier ser obligada a ser española a la fuercia.

La organización antirrepresiva SOFITU fadrase cargu de los gastos, y de pasu fae un llamamientu a nun acetar que mos impongan unes siegles y una nacionalidá que nun mos representen.

Ser asturianes ya asturianos nun ye delitu. Non al españolismu.
Puxa Asturies Llibre. Puxa Asturies Socialista.

DESTRUCCIÓN DE PATRIMONIU


Nel conceyu de Xixón, nel barriu rural de Leorio (Mareo), acaba de consumase la destrucción del conxuntu arquitectónicu de la "Casa de los Menéndez Morán" al paecer del sieglu XVI, siendo la capiella del sieglu XVIII, na finca nomá La Candelera.
Esti conxuntu podía vese na autovía minera dirección Mieres-Xixón enantes de la salida Mareo-Granda, a manzorga pasando´l viaductu de Leorio.
Según vivirasturias:
"Yera una casona erixía a fines del sieglu XVIII, de planta rectangular y bones dimensiones, con dos plantes n´altura y una capiella adosá nun de los extremos baxo la advocación de Nuesa Señora de la Vega que posee un pequeñu pórticu como prolongación de la fachada principal.
El frente tenía la particularidad de situar les puertes de entrada a los llaos del privilexiau cuerpu central, compuestu per una ventana inferior, un pequeñu balcón saliente con dos escudos de armas familiares flanqueándolo y un vano superior."

Un conxuntu señorial con clara raigambre Indiana nes palmeres que lu rodeen. Les actuaciones del actual dueñu, col consentimientu del Ayuntamientu Xixón que fizose cargu de la capiella supunxo una remodelación completa con un estilu arquitectónicu modernu lloñe de lo que fué, siendo nesta selmana cuando tovieron la desfachatez de tirar embaxo l´Horreu que, viéndose dende la Autovía, daba esi caracter señorial al conxuntu.
A día de güey puen vese en baxo los restos d´esti Horreu perdiu pa siempre y que muestra´l valor que-y dan los nuesos políticos al patrimoniu etnográficu del conceyu.

Nos enlaces puen vese fotos de lo que fué y ya nun ye.
http://www.vivirasturias.com/asturias/gijon/casa-de-los-menendez-moran/es

Los asturianos ente los que menos s'identifiquen con "España".





Asturianos, vascos y catalanes, los que menos s'identifiquen con españa, son los que menos españoles se sienten de tol estáu y los que más s’identifiquen cola so propia "comunidá".

Esta ye la conclusión d'un estudiu fechu pola Fundación Bertelsmann. Esti señala que los asturianos, detrás de los catalanes y vascos tan ente los menos averaos al sentimientu español, refugando el sentir español al igual porcentaxe que los canarios. Dempués de vascos, catalanes, asturianos y canarios tan los gallegos al paezer, según l'estudiu. El porcentaxe d’identificación col estáu hespañol de los asturianos, según esti estudiu, ye d’un 74,8%,igual que’l de los canarios. Los bascos son los menos identificaos cola idea d’Hespaña con un 62,6%. Síguenlos los catalanes con un 72,8%. Detrás de vascos y catalanes, asturianos y canarios (74,8). Llueu tan los gallegos, nel quintu llugar de la clasificación, con 77,3%. Como más españolistes tan los estremeños, siguios por madrilanos y castellanos.

Esta foi la noticia qu'espublizó va un tiempu ún de los diarios españolistes n'Asturies, La Nueva España. Estos datos nun quieren dicir un res malpenes aunque ye reseñable el importante porcentaxe de refuga a l'españolismu y el sentimientu de pertenencia a l'estau español. El camín ye llargu, pero'l xabaz españolismu n'Asturies emtama a ser contrarrestau y refugau sobretoo dende importantes seutores de la mocedá asturiano.

domingo, 26 de octubre de 2008

Un centenar y mediu de persones manifestáronse pola República Asturiana n'Uviéu




La convocatoria del Ensame República Asturiana axuntó ayer n'Uviéu a unes 150 persones que glayaron contra la monarquía española, los premios príncipe y la descomanada presencia policial que faen d'Asturies un país sitiáu a costu de toes nosotres y nosotros, apostando, a la escontra, pol socialismu y la república p'Asturies.

Durante la marcha, que trescurrió ensin incidentes y embaxo d'una fuerte vixilancia de la policía nacional española, glayáronse consignes a favor de la república socialista asturiana, contra la humillación que suponen los premios príncipe y pola independencia d'Asturies. Sicasí, hai que sorrayar qu'al términu de la marcha delles persones foron rexistraes poles fuercies de 'seguridá'.

Dende los convocantes fairáse un conceyu de valoración posterior a la movilización nos próximos díes del que se dará anuncia.

miércoles, 22 de octubre de 2008

CONVOCATORIA: EL 23 Ochobre EN Estación del Norte - Uviéu


Manifiestu República Asturiana:

Les persones y coleutivos que roblamos esti 'Manifiestu' queremos espresar lo que vien de siguío:

1) Asturies vive nuna situación antidemocrática dafechu, na que los valores republicanos y los derechos sociales y nacionales vienen siendo negaos y xabazmente reprimíos per parte del estáu español, formáu en Reinu.

2) Una de les espresiones sociales más significatives d'esti fechu ye la denomación institucional d'Asturies como "Principado", figura política impuesta a esti Pueblu qu'afala'l vasallaxe y el servilismu a una institución arcaica, elitista y antidemocrática cola qu'Asturies y les asturianes y asturianos nada ganamos nin tenemos nada que ver.

3) Oponémonos a cualquier tipu de réxime monárquicu, por ser ésti'l paradigma de la desigualdá social y la falta de derechos con impunidá llegal. Tampoco podemos escaecer que la designación del monarca español foi fecha durante'l franquismu, siendo ésti designáu y coronáu a deu directamente pol propiu dictador, ensin qu'entá viéremos enfotu dalu nesta institución predemocrática por pedir perdón tres cuarenta años de fascismu xenocida col beneplácitu del sistema llegal 'constitucional' actual.

4) Denunciamos el compromisu col capitalismu xabaz, asesín de tolos pueblos del mundu, que remanez de la monarquía española, siendo ésta garante de la defensa de les clases privilexaes y de la desigualdá económica, social y de derechos. Refugamos, tamién, les actitúes machistes, homófobes, represores y censores que surden dende la monarquía española, qu'afiten, una vegada más, el so orixe feudal y arcaicu, comportamientos mui estremaos a los que defendemos nosotres y nosotros.

5) Consideramos una humildación a Asturies la cellebración de los 'Premios Príncipe de Asturias', considerándolos una coartada pa 'llavar la cara' internacionalmente a la monarquía, faciéndola pasar por institución moderna y que respeta la cultura, visión mui alloñada d'una, muncho más cercana a la realidá, de 'familia de vividores a sueldu de toes y toos' que conocemos perbién y manipulando al traviés de los medios españolistes, al tiempu, la imaxe de la sociedá asturiana. Poro, nun podemos dexar de pidir la crítica pa los galardonaos por estos 'premios de pandereta', que faen el xuegu cómpliz a la monarquía española, nin dexar d'ablucar y protestar, tampoco, polos costes de les fartures 'reales' a cargu de los nuestros impuestos –nestos tiempos de crisis– , asina como de la situación d'estáu y ocupación militar y policial ostentoria que nel nuestru país se xenera con cualaquier 'visita' de los miembros d'esa familia 'real'.

6) Queremos afitar dende agora mesmo la necesidá d'articular y crear un movimientu republicanu asturianu que lluche pola lliberación d'esti país y refugue cualquier tipu d'opresión nacional y social, como la que constitúi la monarquía española y cualquier réxime monárquicu. Asina, namás entendemos un cambiu de modelu de país pa construyir una República Socialista asturiana onde los valores republicanos d'igualdá, llibertá, accesu a la cultura y llaicismu seyan los finxos que caltengan la nuestra llucha por una Asturies xusta y un mundu de pueblos llibres.

¡¡PUXA LA REPÚBLICA ASTURIANA, SOCIALISTA Y SOBERANA!!