martes, 24 de febrero de 2009

Fai-Asturies " festexó" nes cais la efemeride del 23-f.


La organización moza soberanista asoleyó pa esta dómina miles de pegadielles col llema " El rei d’España nun da golpe dende’l 23-F”, en defensa d’una República p’Asturies, soberana y xusta socialmente. A esta tirada de pegadielles amestaron munches pancartes y cartelos colos mesmos llemes qu'enllenaron les cais de distintos puntos del país, sobretou nos buses interurbanos uvieinos.





Amás d'estes aiciones dende Fai! asoleyen un comunicau que reproducimos equí: " dende Fai! nun queremos que caigan nel escaezu los fechos del 23 de febreru de 1981, onde dellos destacamentos militares del estáu español, a cargu de puestos de mandu fascistes, llevaron a cabu un golpe d’estáu tomando’l parlamentu en Madrid y sacando los tanques a les cais de València. Nesti sen, lloñe de reivindicar esti estáu, antidemocráticu y continuista col réxime franquista, al empar que de siguir versiones oficiales que nun llegaron más alló d’una investigación superficial y que nun s’axusten a la realidá de nenguna manera, hemos d’afitar qu’esti llevantamientu fascista sí trunfó a pesar de lo que nos quieren facer creyer. El golpe d’estáu del 23 – F supunxo, en realidá, la coartada perfecta pa frenar cualquier tipu de procesu que pudiere finar col exerciciu del autodetermín plenu per parte de los pueblos y naciones del actual estáu español, y de la mesma manera, apaecía otra vuelta la escusa del miéu, la del “o tragamos esto o vamos tener más dictadura”. Asina, la mesma estratexa qu’emplegaren nel referéndum constitucional de 1978 volvió a ponese en marcha, como maquinaria qu’al traviés del amedranamientu de la población abocanaba les reivindicaciones de les cais. Amás d’esto, nun podemos dexar de llau l’emplegu d’esti golpe como llaváu de cara -tan descaráu como falsu- pal rei d’España y los sos exércitos, dexando pa prau yá d’aquella cualquier tipu de consulta no qu’al pueblu se refier d’aceptación de la monarquía. Consulta qu’entá esperamos y demandamos. Pero güei, a la mocedá d’anguaño, nun nos valen los sos vieyos argumentos del “dexar pa más alantre les grandes reformes, pa cuando nun peligren los sos rexímenes parademocráticos”. Dende Fai! consideramos que siguir, en plenu sieglu XXI, con un xefe d’estáu nomáu por criterios xenéticos ye un insultu a la intelixencia. Lo mesmo que la continuidá d’un estáu, como esti, qu’oprime social y nacionalmente a los pueblos qu’encarcela y aculturiza. Por eso, equí y agora glayamos bien alto: ¡YÁ VALIÓ! POLA DESAPAICIÓN DE TOLES MONARQUÍES POR UNA REPÚBLICA ASTURIANA, SOCIALISTA Y SOBERANA."

No hay comentarios:

Publicar un comentario