miércoles, 25 de febrero de 2009

L’Ayuntamientu Llangréu multa a Andecha en represalia política pol eventu xuvenil que cellebró Darréu n’ochobre

Siguiendo cola escalada represiva a l'independentismu atopamonos güei con una noticia ablucante na páxina web d'Andecha Astur y tamién nel sitiu n'internet de Darréu. Dempués de meses del DMR'08 y cola presión y torgues que sufrió la organización de mocedá independentista Darréu por parte del gobiernu llangreanu del PsoE enantes del día de los actos agora l'ayuntamientu torna a cargar escontra l'independentismu asturianu, esta vegada escontra Andecha. Asina podemos lleer na páxina d'Andecha :

"El 4 de ochobre la organización xuvenil Darréu, venceyada al movimientu políticu d’Andecha Astur, cellebró en La Felguera el DMR’08 o Díi de la Mocedá Revolucionario que incluyía dellos actos ente ellos una manifestación y un conciertu conmemorativu de la revolución de 1934.

L’Ayuntamientu trató d’impedir l’actu que se cellebra dende fae años en La Felguera y qu’axunta añalmente a cientos de xovenes independentistes oponiendo enormes dexixencies llegales e insalvables problemes práuticos a los organizadores. Pesia ello, Darréu cumplió tolos requisitos llegales que-y impuso l’ayuntamientu y pudo cellebrar el so multitudinariu actu festivu y reivindicativu.

El DMR’08 foi un ésitu políticu, organizativu y de participación. Además nin antes, nin dempués nin durante la cellebración del actu hebio nengún tipu d’incidente según reconoció públicamente la mesma policía municipal.

Con fecha 4 d’ochobre –curiosamente’l mesmu día que Darréu cellebraba’l DMR’08- l’ayuntamientu de Llangréu abrió un espediente a Andecha Astur por pegar cartelos en llugares públicos non autorizaos. Posteriormente comunícase-y a la organización política Andecha Astur una sanción de más de 1.000 euros por afitar cartelos en sitios non autorizados.

Andecha Astur presenta recursu retolicando qu'en dengún momentu s'identificó a denguna persona nin a dengún militante d’Andecha pegando dichos cartelos, poro la responsablidá nun pue recayer sobre la organización política, en tal casu diría sobre les persones que los pegaron pero resulta que son anonimos.


Andecha denuncia que se trata claramente d’una represalia política porque Darréu ganó-y el pulsu al ayuntamientu y pudo organizar con ésitu el so actu y critica'l nulu sentíu democráticu del Ayuntamientu por nun respetar la llibertá política y d’espresión.

Esta mesma selmana l’Ayuntamientu colocó carteles del Antroxu en llugares prohibidos según la su propia ordenanza munipal. Andecha presentó una denuncia ante la policía municipal al PSOE y al mesmu Ayuntamientu de Llangréu por pegar cartelos en llugares nun autorizaos:

Dende Andecha Astur queremos amosar con esto qu'esiste un doble raseru al aplicar les lleis en Llangréu y que lo qu’al ayuntamientu del PSOE-y esmolez nun ye la llimpieza de les paredes públiques sinon que los xóvenes de La Felguera y llangreanos s’autoorganicen, tengan idees propies y seyan críticos col sistema políticu y col gobiernu municipal."

Camentamos qu'esta persecución a tolos movimientos políticos y sociales que tamos güeyando nes caberes selmanes a nivel estatal( persecución al sindicalismu, detenios n'Euskal Herria, detenios en Málaga, violencia policial en Llión, persecución del PSOE a Andecha en Llangréu, xuicios farsas n'Audiencia Nacional, como el que sufrió Fer...) formen parte d'una oleada represiva que solu ta emtamando a veninos enriba d'esti sistema capitalista y esti Estáu facista español en cris.

Comunicau de Sofitu tres el xuiciu a Fer y n'espera de la sentencia


El muerganu independentista y antirrepresivo asoleyó güei ún comunicau faciendo una valoración tres les dos sesiones del xuiciu a Fer y n'espera de la sentencia qu'asoleyará la Audiencia Nacional. El comunicáu diz lo siguiente:

" El muerganu antirrepresivu Sofitu, quier dirixise al pueblu asturianu pa llanzar les siguientes reflexones no tocante a lo qu’asocedio nes dos xornaes de xuiciu al militante independentista Fernando Gonzalez “Fer” , nel puntu nel cual nos atopamos, esto ye, n’espera que se dicte sentencia.



En primer llugar, l’audiencia nacional nun ye naide, otrosí que nun lo ye ningún otru tribunal d’esi estáu, pa xulgar a un ciudadanu asturianu, na midía en que les sos lleis y l’aplicación de les mesmes nun remanecen del nuesu pais, son impuestes, formen parte d’una realidá estremada a la del nuesu pueblu y na mayoría les ocasiones sirver pa violentar los nuesos drechos individuales y coleutivos que comoasturianos tenemos. Esti casu, el del xuiciu y mas que posible encarcelamientu d’esti mozu independentista ye un exemplu mas d’ello, neto que munchos otros. Nel casu de l’audiencia nacional española amás tratase d’ún tribunal que castiga la disidencia politica, ye un tribunal d’esceición llonxanu de lo que se pueda considerar un estau de drechu. Un tribunal mas propiu d’estaos de guerra y grandes conflictos nel que se creen sumarios ensín consistencia, criminalizase a persones y coleutivos, vulnerase la llibertá d’espresión torgando actos publicos, zarrando medios de comunicación, afalando illegalizaciones de muerganos y partíos politicos, faciendose xuicios sumarisimos escontra amplios coleutivos de xente, cenciellamente por ta adscritos a una idoloxía determináo. L’audiencia nacional española ye un tribunal judicial que se superpón so’l restu de muerganos del poder judicial (esceuto’l tribunal supremu y tribunal constitucional) pa represaliar con cárcele o chantaxe economico a les persones que nun creyen na “so” España y nel so capital, al empar que se val de la llei antiterrorista y les tortures pa incriminar a la disidencia politica.



No que cinca’l casu de Fer, les prerrogatives del muerganu heriede del tribunal d’orde públicu franquista furrulen a la perfección, vulneren un drechu elemental como ye’l de falar na llingua asturiana, perjudicando en mou d’indefensión al xoven independentista, continues burlles al nuesu idioma calificandolo de “dialecto”, de que nun ye una llingua, pese a que l’estatutu d’autonomia, qu’impusieron a la nuesa tierra dende España, regula la obligación de toles administraciones al usu, promoción y calteenimientu del Asturianu. SOFITU advierte y quier dexar nidio a los facistes españoles que l’asturianu ye la llingua nacional del nuesu pais y que’l castellanu nesta tierra nun ye mas qu’una imposición frutu de la soberbia cola que l’estau español ocupa Asturies.



La xueza Ángela Murillo exerció un papel d’anfitriona y protectora pa col fiscal, mentanto que s’ensañó cola defensa y posiblemente tará preparando el so castigu pa Fer; valió amás como ordago amenazante pa too’l movimientu independentista asturianu. La teorica xera d’arbitraxe de la presidenta d’esa mesa que xulgó a Fer nun quedo mas que nuna simple ilusión. Entamando pol ataque al Asturianu, les continues faltes de respetu al nun dexar esponer a les abogaes de la defensa, falando ente elles cuando cuando éstes presentaben les sos prebes, o como nel 12 Febreru enterrompio los alegatos de la defensa pa siguir al dia siguiente namai que por un caprichu personal de nun querer sentir más les conclusiones de les abogaes. Dende SOFITU camentamos que la sentencia taba ya escrita y guardada nun caxón , precisamente porque l’estau español nun ye un estau de drechu, sinón un estau facista.

El papel de fiscal, unviao pol ministeriu publicu, y actuando como parte acusadora, tamién fraya los drechos del acusau. Pero a SOFITU lo que mas-y llama ye que la evidente nun dixebración de poderes nel estau español lleve a esti señor a facer drechu a so propia discreción ; sabedor de que nel estau español les lleis nun son iguales pa toos y que l’estau de drechu ye una “broma” atrevese a dar como prebes (manches vegaes falses) : visites a presos politicos, alcuentros con presos politicos, tener en casa pegadielles de muerganos politicos con calter armau o non… como si fuere delitu. Hasta onde SOFITU conoz cartease con presos politicos nun apeas regulau nin tipificau como delitu por ninguna llei española, si acasu sedralo nel futuru, pero angüañu nun tenemos constancia d’ello. La policia española da una bayura prebes , qu’en realidá nun lo son, como correr maratones financiaos pol gobiernu d’Ibarretxe en Donostia, dir a manifestaciones llegales o otros actos de sofitu a la esquierda abertzale, incriminar nun ampliu llistáu d’atentaos n’Asturies dende 2001 ensín mayores aportaciones pa pasar el filtru del fiscal y ésti quedase con delles d’estes hipotetiques prebes, les menos escandaloses, pa que’l tribunal xulgue. Como vemos la policia y el fiscal creén drechu , precisamente porque’l drechu ye discrecional y arbitrariu pa la disidencia.



Un puntu relevante ye’l intentu sistematicu, por parte del fiscal, de separtar la llucha de los trabayadores pol so puestu de trabayu respecto a la consecución d’unos oxetivos politicos determinaos. Pa’l fiscal español l’emplegu de la violencia pa la defensa d’ún puestu de trabayu nun ye lexítima pero, entá ye menos lexítima pa defender una ideoloxía politica concreta, magar que, nun se sintio a esti axente del ministriu publicu dicir nada sobre la imposición que pola fuercia de les armes exerce españa escontra Asturies, relegandola a un calter dixebrada, principiega, española y de dreches. SOFITU pescancia que pa’l fiscal si val la violencia cuando tratase de defender el so proyeutu politicu y la so ideología, que ye la mesma que la del estau español: del sometimientu de los pueblos a los qu’oprime y la explotación de les clases sociales trabajadores. SOFITU quier dexar nidio que la llucha pola independencia y el socialismu nesti pais , nun solo nun ye ayena a la llucha a la de los trabajadores asturianos en defensa del so puestu de trabayu sinón que ye la mesma llucha.

No que se refier a los medios de comunicación españoles o al serviciu d’españa, continuaron cola so campaña d’intosicación y mentires. Ye curiosu l’accesu que teníen a informes policiales cuando entá taben baxo secretu de sumariu. SOFITU quier alertar nesta vegada qu’hai que sumar a les yá conocíes manipulaciones en favor de los sos amos, les provocaciones intencionales de les que faen gala como’l fechu de que “la nueva españa” refierase a lo asocedíu en L’Infiestu n’aquel setiembre de 2005 como rempuesta polos “deteníos d’Andecha Astur” en Cangues d’Onis dies enantes, sabedores de que los deteníos nun yeren de tal partíu sinon militantes antifacistes asturianos; d’esta miente criminalicen a Andecha Astur, tracamundien y mienten a los sos llectores y provoquen a la esquierda independentista d’esti pais. Nesti sen asoleyaronse calificativos como “ correligionarios” de Fer despeutivamente como sectarios de sabe quién que relixón, pela cuenta de que la mayoría los que tabemos elli somos ateos. Tamién destacar l’acosu de camares y fotografos nes puertes de l’audiencia nacional española. SOFITU nun ye quien a calificar a estos medios namái que de “carroñeros”.

Esti muerganu quier tamén denunciar el papel de la policia española colos siguimientos de la brigada d’información nos viaxes, magar que nes dos caberes xornaes llimitaronse al siguimientu non disimulau pero ensín llegar a parar a los solidarios, pela cuenta de lo qu’asocedio na primer xornada. Ysiguiendo coles contradicciones na segunda xornada nun permitieron la xuntanza entamada por SOFITU obligando a retirar les banderes y la propaganda nun claru ataque a la llibertá d’espresión como fió de igual mena la prohibición d’asoleyar camisetes en sofitu a Fer. Por too ello SOFITU destaca’l calter chulescu y prepotente de la policia española.

Pa finar, queremos agradecer a tola xente solidario, les 80 persones que s’averaron a Madril na primer xornada, al casique mediu centenar qu’acudieron nes dos caberes xornaes asina como a toles persones y coleutivos que sofitaron y sofiten politica, economica o moralmente la llucha de Fer. Esta llucha entamo cola detención y secuestru de Fer pero nun debe finar cuando conozamos la sentencia, l llucha tién que continuar.

¡¡Puxa Asturies llibre!! ¡¡Puxa Asturies socialista!! "