La organización Andecha Astur mostró güei, a traviés d’un comunicáu, el so apoyu a la iniciativa puesta en marcha pola Unión de Guardias Civiles (UGC) pa presllar 41 cuartones d’esti cuerpu de naturaleza militar nel país “siempre qu’esti seya un primer pasu pa la so retirada dafechu d’Asturies”, apunten. N’actualidá esisten 68 cuartones de la Guardia Civil nel territorio asturianu. Pal colectivu nacionalista, ésta ye una bona oportunidá pa la ellaboración “d’un calandariu qu’afite una fecha, la más prósima posible, na que la so presencia nel nuesu país nun seya más qu’una mala alcordanza definitivamente presllada”.
Asina mesmu, Andecha Astur considera “peroportuna” la fecha escoyía pola UGC pa reclamar esta medida a los mandos superiores de la Guardia Civil, que coincide col 75 aniversariu de la Revolución d’Ochobre de 1934.
Por contra, Andecha Astur ta a la escontra de la propuesta de la UGC de concentrar les plantíes nos cuartones restantes. Pa esti colectivu, la meyor solución ye “la progresible y ponderada sustitución por efeutivos democráticos asturianos que, lo más aína, sustituyan les funciones represives propies de la Guardia Civil por midíes d’atención y sofitu a la ciudadanía”.
