viernes, 30 de abril de 2010

Fai! énte'l primeru de mayu, día de les y los trabayadores


Esti primeru de mayu puede ser como los anteriores. Puede qu'heba 100.000 paraos y paraes, que s'abrieren más ERE's, qu'aprobaren la instalación d'otra incineradora o d'otra térmica ensin importar la salú de miles d'asturianxs. Puede que sigan a construyir una bomba de reloxería como ye la regasificadora del Musel, o que subasten el nuesu padremuñu como asocede en San Andrés de los Tacones (Xixón) p'asina dexar vía llibre a la ZALIA que fairía desapaecer el 80% de la parroquia.
Puede que sigan abriendo o estrozando los montes con decenes de parques eólicos o absurdes llinies d'alta tensión, too esto pal beneficiu de la oligarquía gobernante y les sos comenientes redes clientelares. Puede que sigan especulando, que sigan estrozando'l llitoral, que sigan habiendo Caliaos, que quieran que seyamos la "pila" y vertidoriu del Estáu Español, que la emigración de la mocedá nun seya una lleenda urbana. Puede que too seya cierto, pero la rempuesta social sigui siendo la mesma tolos años, INSUFICIENTE.

D'equí podemos resover dos coses, que'l movimientu obreru o de clas ye cásique nulo, y que la vitalidá como pueblu, como País, ye práuticamente inesistente. Podríemos detenemos a sopelexar les causes qu'aportaron a esta situación o podemos baxar a la rialidá y salir a la cai como obrerxs y como asturianxs. Porque a menos que lluchemos por una Asturies SOCIALISTA y SOBERANA siguiremos siendo cómplices d'esti crime haza'l nuesu País, haza nós mesmos.

Ello ye que pa esti 1u mayu, en Fai! y n'otres organizaciones pensamos qu'estos problemes tienen un calter nacional y de clas. Poro, decidimos encadarmar un bloque soberanista pa la movilización alternativa en Xixón que tendrá llugar a les 12:00 h y partirá dende la Plaza del Humedal..

Les revoluciones nun s'ufierten na teletienda o se materialicen nos chigres, faigamos rialidá'l nuesu suañu, deámos-y la bocada'l sistema.

Nun sigas el xuegu a los nuesos asesinos, SAL A LA CAI esti 1u mayu.

1 de mayu:Contra la crisis capitalista: Llucha obrera y popular.


Alredor de un centenar de miles de paraos, xubida de la edá de xubilación, recortes en servicios públicos, precariedá, emigración y desaniciu industrial. La murnia situación chisca a Asturies dende siempres, más güei. La patronal al mesmu tiempu sigue faciendose más y más millonaria a costa de los que trabayen.

El xuegu ye'l de siempres. Ye hora d'entamar de 0 y lluchar pol futuru, por un futuru meyor a esti y onde la utopía tea un sitiu. Onde la utopía seya la guía única de les relaciones homanes y tamién llaborales.
Nesti xuegu toconos el d'esplotaos y perdedores. Fai falta un bon contra-ataque. Un contra-ataque de clas. Un contra-ataque de la clas obrera constituyía como clas nacional asturiana. Esi ye l'únicu camín que pue tomar un xugador como tú. Un xugador del Pueblu Trabayador Asturianu. Fai falta ganar munchos partios y pa eso hai qu'entrenar abondo. Entamemos.

¡Puxa'l 1 de mayu!

¡Puxa Asturies socialista y dixebrada!

miércoles, 28 de abril de 2010

Bloque soberanista na mani del 1u mayu de Xixón


Énte la data del 1u de mayu, día de les y los trabayadores, y la manifestación alternativa que va percorrer les cais de Xixón dende la plaza L'Humedal a les 12 hores, convócase a un bloque unitariu y combativu a les estremaes organizaciones y persones que puxen por algamar plenos derechos sociales y nacionales pal pueblu asturianu.

Esti bloque, que va cuntar con animación y pancarta propia, ta abiertu a la participación de toes aquelles y aquellos qu'asina quieran, ensin torga nenguna, p'axuntar a les estremaes espresiones y sensibilidaes de la esquierda nacionalista, soberanista y/o independentista como manera de facer más visibles les nueses reivindicaciones comunes y porque la situación d'emerxencia nacional y tamién social asina lo demanda.

Garra les tos banderes, les tos pegatines y xúntate a esti bloque combativu dientro de la manifestación. Axunta la to voz cola d'otres y otros que piensen como tu por una Asturies verdaderamente llibre y combativa.

Agradécense les adhesiones públiques d'organizaciones y persones, asina como l'espardimientu de la convocatoria.

Puxa'l 1u de mayu!
Puxa la clas trabayadora!
Independencia y socialismu!
Puxa Asturies dixebra!


Asoleyau en Glayiu.

martes, 27 de abril de 2010

Darréu entama una convocatoria nel Conceyu de Llangréu nel 1u Mayu.

Asoleyau na páxina web de la organización d'esquierda independentista:


"La convocatoria entamará a les 17:00 hores na Casa Conceyu de Llangréu, en Sama, vamos facer una concentración denunciando la situación llaceriosa d’Asturies y contra’l capitalismu. A les 17:30 hores marcha combativa contra la represión nel Conceyu y en sofitu de la clas trabayadora y los drechos coleutivos d’esta. A les 20:00 hores espicha con precios populares y conciertu de grupos mozos.

Baxo’l llema “ La crisis social que la pague’l capital “ dende Darréu queremos convidar a tola sociedá llangreana y asturiana a amestase a la convocatoria xunitaria que proponemos. Nesti 1 de mayu queremos denunciar la llaceriosa situación que tamos sufriendo n’Asturies. Vamos camín de los 90.000 paraos y l’añu pasáu hebo más de 16.000 accidentes llaborales nel país. Tamién ye perimportante remembrar datos como’l de qu’un 14% de la población asturiana vive baxo l’umbral de la probitú, ye dicir, 160.000 persones. Cada mes delles empreses salten a l’actualidá cola anuncia de despidos masivos y pieslles de les mesmes. Los ERE y el terrorismo patronal golpeen n’Asturies cada vegada más fuerte.

La clas política asturiana y los medios lacayos del emperiu nun cansen de dicinos que les coses nun tan bien, pero tapecen siempres l’orixe d’esta cris y los sos responsables. Tamién tapecen les braeres consecuencies, y asina xueguen coles noticies según quien-yos pague, pero enxamás s’enfoten n’asoleyar la llaceriosa situación de clas obrera anguañu. Ye siempres un “ tamos mal pero nun ye pa tantu”. Ye siempres un “ Esto iguamoslo ente toos”. Repiten esos mensaxes pero nun s’atreven a señalar a la patronal y la oligarquía como los culpables de la crisis capitalista. Una crisis producía pol enfotu de les clases altes de facese más y más riques. Dende la prensa oficial nun afonden un res na tema la crisis, sólo unvíen el mensax que la burguesía-yos dexa. Esa ye la situación y estos los enemigos del Pueblu Trabayador Asturianu. Ñegar esto respuende a un interés de clas, de clas burguesa, o bien a faltar a la verdá, cosa a la que tamos avezaos ente’l conformismu nel que vivimos.

EL Pueblu Trabayador tien que ser consciente de cual ye l’enemigu y cual ye la so xera p’actuar. Los y les trabayadores deben tomar concenxa plena de cual ye la so clas, cuales los sos intereses y cuales los esplotadores y opresores. El camín pa espertar la concenxa coleutiva ye bien cenciellu: l’activismu y la xunidá popular. Esi ye’l camín qu’atalantamos correchu dende la nuesa organización, poro, vamos manifestanos esti próximu 1 de mayu en Llangréu en defensa de los porgüeyos de les clases populares.

Ente les torgues qu’atopamos nesti día a día, nesti camín dica’l cambeu social y políticu ta la represión. N’Asturies por tola esquiera revolucionaria ye conocida la persecución política y el trabayu de la Brigada d’Información, manexada pol señor Antonio Trevín. Paez ser que la represión agrávase inda más nos conceyos onde la persecución medra y el simple fechu de ser activista y pegar una pegadiella reivindicativa ye sinónimu d’un multa de miles d’euros. D’actualidá ta agora’l casu de la represión que tamos viviendo nel Conceyu de LLangréu, gobernáu por Esther Díaz. Delles organizaciones presentes nel conceyu sufrieron yá multes de miles y miles d’euros y amenaces por parte del réxime. Asina decidimos axuntanos esti 1 de mayu en Llangréu en defensa de los drechos del Pueblu Trabayador Asturianu, pol socialismu y contra la represión.

La convocatoria entamará a les 17:00 hores na Casa Conceyu de Llangréu, en Sama, vamos facer una concentración denunciando la situación llaceriosa d’Asturies y contra’l capitalismu. Darréu, vamos entamar a les 17:30 hores una marcha combativa contra la represión nel Conceyu y en sofitu de la clas trabayadora y los drechos coleutivos d’esta. La marcha entamará en Sama y finará na Barriá de Pénjamo, pasando por La Felguera, percorriendo asina gran parte del Conceyu.

De magar les 20:00 hores vamos entamar una espicha con precios populares y un conciertu de grupos mozos. La espicha va cellebrase nel Area Recreativa de Pénjamo y nun faltará la meyor música col meyor ambiente".

Fonte: www.darreu.org

Puxa Asturies dixebrá

lunes, 26 de abril de 2010

Crónica y vidiu de Darréu sobre los premios al gochu asturñol 2010. Noreña.




Tini Areces ganó'l primer premiu del Gran Día del Gochu Asturñol


Coincidiendo coles fiestes del picadillu y el sabadiego Darréu entamó en Noreña el I Gran Día del Gochu Asturñol del añu. L’eventu averó a muncha mocedá que pudo esfrutar d’un conciertu, una espicha y como non de los premios al gochu asturñol.

La tardi entamó col I Picadillu UnderGround Fest, entamau conxuntamente ente Darréu y Nora Antifa. El conciertu averó a munches moces y mozos qu’esfrutaron coles actuaciones de hip-hop y punk programaes nel cartelu. Decenes de xóvenes axuntaronse nos llocales del Llar d’Andecha de Noreña viendo esti conciertu, que tuvo como protagonistes a Wanye Argastur, Gori , MNR , Suma D y Brigada.

A les 20:00 h aparose momentáneamente la música pa entregar na Estatua del Gochu el I Galardón al Gochu Asturñol del añu. La ciudadanía averose con curiosidá al eventu y siguió’l mesmu. Nun hebo muncha sorpresa y foi Don Vicente Álvarez Areces el I premiau con esti honor. Ente les grandes capacidaes que destacó’l xurau de Darréu pa escoyer el ganador tan les sos dimensiones físiques, la so incoherente trayeutoria, les lleendes urbanes, la so afición a fartucar, les sos capacidaes represives o’l so güeyu pal lladrillazu. Tres la intervención d’un militante de Darréu, una moza descubrió la estatua del gochu, que camudó de cara, y agora tenía la d’Areces. Ente los glayios del públicu asistente en sofitu a Tini y la sorpresa Tini Areces recoyió’l premiu y amosó la so gayola. Finau esti actu los asistentes tornaron pal Llar d’Andecha onde diba siguir el conciertu.

Darréu, al finar el conciertu vino la espicha nel Llar d’Andecha, onde nun faltó’l picadillu y el meyor ambiente festivu. Dempués de la espicha siguió delles hores la folixa nel Llar cola meyor música combativa y muncha xente.

Dende Darréu queremos agradecer fonderamente a tolos grupos de música la so participación nel evento y l’asistencia a tola mocedá qu’averose a los actos entamaos. ¡ L’añu que vien tornarán a Noreña los galardones!

DECLARACIÓN DEL XURÁU DEL I GRAN GALARDÓN GOCHU DEL AÑU ASTURÑOL


Bones a toos y toes los que vos averasteis a la primer entrega del Galardón al Gochu Asturñol del añu.

Pa entregar esti gran premiu escoyimos un sitiu tan representativu como esti, la estatua del gochu de Noreña, ñeru de les industries cárniques y chaniceres. Pa entamar agradecer la vuestra presencia yá qu’ensín vosotros esti gran gochu que güei va ser premiau enxamás merecería tal honor. Munches gracies a toes y toos de verdá.
Pa siguir dicir qu’esti eventu qu’entamamos güei quier ser l’entamu d’unos premios de gran sonadía y prestixu, cuasi tan prestixiosos como los Premios Principiegos, anque nesti casu nun vamos poder cuntar colos señores príncipes d’Asturies yá que tan trabayando intensamente de cara a otra famosa portada de la revista El Jueves.Sabemos que toos y toes tais ñerviosos por conocer el ganador al gochu del añu asturñol. Nun vos vamos esperar muncho más. Queremos recordavos que darréu de la entrega del galardón podréis esfrutar d’un espicha nel Llar d’Andecha de Noreña con precios populares.Vamos col ganador añal, qu’amás va tener el privilexiu de poder ser el primer gran gochu galardonau del país. Enantes de nada dicir que’l galardón esti primer añu tuvo reñiu yá que la trayeutoria d’estos gochucos nominaos ye estensa y ta enllena gochaes. Pola so llarga trayeutoria, la so vida dedicada a agravar el desaniciu nacional d’Asturies, pol so enfotu en reprimir a la mocedá asturiano que tien idees combatives y pensamientu críticu, pola so política de cuasi prohibición de la llingua asturiana, polos ataques a la identidá asturiana. Pola so llabor de finar col padremuñu nacional. Siguimos, pola so prepotencia, pol so cinismu, poles sos mentires, como la llenda urbana de la emigración d’asturianos y asturianes a la gueta un trabayu dignu, de que ye’l mesmu másimu responsable. Pol so compromisu cola patronal, pol so nulu compromisu colos trabayadores, pola so estratexa de finar col seutor naval pa camudalo pol lladrillazu y la especulación urbanística. Pola so servidumbre a los gochonos de Madrid, pola permanente ñegación de la nacionalidá asturiana, pol so españolismu de pata negra, por riise abiertamente del independentismu asturianu delles vegaes, por facese’l suecu ente l’encarcelamientu de Candido y Morala y ser responsable direutu, pola so talla xamonona. Pola so llabor, xunto a Antonio Trevín (aspirante al galardón), nel permanente siguimientu al movimientu asturianu de reconstrucción nacional y social. Pola represión exercia a coleutivos pocu favorecios como l’inmigrante. Por ser el xefe de les fuercies d’ocupación n’Asturies. Por dir de socialista y ser un españolista collaciu de la patronal. Polos sos únicos xamones, braeramente deliciosos.
Pola to contribución a l’estrozu de la ñatura, pola incineradora, pol Sama-Velilla, por llantanos hectaries de molinos en suelu protexiu. Pola mentira del Paraisu Ñatural. Pol despreciu “ a los del bable”, pol pieslle masivu d’empreses, por nun facer un res ente’l treslláu de Duro Felguera y otres empreses, por tratar de piesllar Juliana, lo pocu que dexaste nel to pelotazu urbanisticu. Por mercar votos descaradamente cual cacique, pola cobarde posición ente’l carbón asturianu, por ser tou un gobernador de la Colonia, por ser el meyor basayu de la metrópoli impuesta. Pol to físicu, les tos dimensiones. Por ser un bon facista modernu, d’esos antroxaos de democracia.

Pola to allumante y coherente carrera política. Por ser ex – falangista, por tar nel PCE y colar d’el por que traicionaren el marxismu leninismu. Por ser de los del bable nel so día.Por entrar nel PSOE d’Asturies amosando , también nomáu FSA de las JONS. Como podeis ver ye un bala perdía de la política esti gran gochón que güei premiamos. Pol to viciu coles espichones nes inauguraciones, por ser el modelu de fartón asturñol por escelencia. Pol to control dientru la radio- televisión publica asturiana, también conocida como TeleTini.
En resumies cuentes, pola so dimesión animal, pola so allumante capacidá de desaniciar la ñatura y a la par el sector llaboral nesti país. Pola so talla represora, pol so caciquismu, pol so sentir antiasturianu, pol so facismu español tradicional, pol so pocu respetu pol pueblu nel que gobierna, pola represión a los movimientos d’izquierda y defensa de los trabayadores. Por toa una vida desaniciando la nación asturiana, el pueblu asturianu. Por toes estes imnumberables razones y munchisimes más, dende Darréu queremos da-y el galardón a Gochu Asturñol del añu 2010 a…

¡¡¡VICENTE ÁLVAREZ ARECES!!! ¡¡¡NORABONA!!!


El ganador, nuesu gran gochu asturñol Tini yá tien la so cara onde merez. Asperamos qu’agora por fin el nuesu galardonau fine la so carrera política, cole pa les inmenses deheses estremeñes de les qu’enxamás el so pá Guardia Civil nunca nun tuvo que salir.

Convidavos a toos y toes a la espicha que darréu vamos celebrar nel Llar d’Andecha. Asperamos que prestáravos esti primer galardón a Gochu Asturñol del Añu 2010.

Dende Darréu queremos agradecer la colaboración de Cárniques Trevín.

Pa finar insistimos, dengún animal tien porque sentise ofendiu pol eventu que cellebramos güei, anque a vegaes la realidá supere a la ficción.

Asoleyau en www.darreu.org

domingo, 25 de abril de 2010

SOFITU: La policía española denuncia al independentista al qu'acosaron el pasáu mes de marzu


El independentista asturianu, militante de Darréu, que yá denunciara nel so día a los policíes españoles que lu acosaren el pasáu 4 de marzu en plena cai Uría d'Uvieu, vien de recibir una denuncia roblada polos dos mesmos policíes que lu acosaren. Dase´l casu de qu'unu d'ellos ye'´conocíu facista R.S.B., que yá fuera sentáu nel banquiellu fae unos pocos meses por unos fechos asemeyaos escontra otru independentista asturianu.

Na so denuncia, los policíes españoles 80042 y 82311 mienten al afirmar que'l mozu ñégase a ser identificáu y cacheáu, amás d'amenazalos ya insultalos con frases como "Sois una puta mierda, nun tenéis porqué identificame, conózovos y yá vos garraré ensin uniforme", fechos que puen ser desmentíos si 'l xuez almite la petición de conseguir la grabación de dos cámares de video, una municipal y otra de caxastur, y que polo visto, daríen una versión mui alloñada de lo que los policíes españoles declaren.

Les dos denuncies foron calificáes como falta, polo que dende SOFITU tase a l'aspera de que se ponga fecha pa xuiciu pa volver a movilizase escontra la impunidá que tienen les fuercies opresores españoles y los numberosos facistes que d'elles son miembros.

jueves, 22 de abril de 2010

Manifestamientu en Xixón nel Primeru de Mayu.


XXII Conciertu pola Oficialidá


Xentiquina, DRD, La Curuxa, Toli Morilla, Misiva, Skama la Rede, Los Berrones y Dixebra van ser los grupos que van actuar na XXII Edición del Conciertu pola Oficialidá.

Estilos estremaos, dende los cantares pa neños al rock más combativu pasando pela música tradicional asturiana y la canción d’autor van poner más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu.

El XXII Conciertu pola Oficialidá va abrir les puertes a les 19:00 del prósimu sábadu 24 d’abril, nes instalaciones de la Feria de Muestres de Xixón. El preciu de la entrada ye de 8€ pa la entrada anticipada y de 10€ na puerta.

Les entraes tán a la venta n’Uviéu en La Casa Posafuelles y Malayerba nunca muere; en Xixón nel Café Trisquel, El Barucu y Llibrería Alborá; n’Avilés n’El Cafetón; en Candás en La Gueta; en Tinéu nel Mesón Cervantes; en Ḷḷuarca na Panadería Aldín; en Cangas nel Bar Azul; en La Puela Allande nel Café Centro; en Mieres en L’Abellugu; en La Pola Ḷḷena en La Palmera; en La Pola Siero nel Abre César; en Nava en La Posta; en Grau nel Bar Piero’s; y en L’Entregu en Tom Mallory.

Pente l’ecocidiu ya’l 'paradaisin'


Cuando entá siguimos col asuntu la rede elléctrica d’alta tensión que va percuerrer pente Sama y Velilla y a poques selmanes andaes de que la “esquierda plural” asegurase la so permanencia en coalición, col banzáu de Caliao y la macroincineradora incluyíos, apaecen pel horizonte nueves amenaces pa los ecosistemes asturianos. Ya ye que cuando aperta la cris, nun ye raro que les ocurrencies inofensives de tiempos normales se conviertan n’aberraciones coles qu’engañar a la xente, a una ciudadanía preso de la medrana pero, entá más, preso de la inorancia y, en delles vegaes, de fanatismu partidista. Dicía un personax d’una obra teatro de Rosario d’Acuña –“El padre”- que “el día qu’Asturies salga de la so nueche d’inorancia y fanatismu, l’aurora la llibertá entamará riscar na nuesa patria”. Pasara un sieclu, vivimos revoluciones y guerres, aguantamos una dictadura y saludamos con alborozu a la democracia, pero esa aurora sigui ensín nacer.

Un teleféricu amenaza al Monsacru, un teleféricu que naide sabe mui bien pa qué va servir, sacantes pa enllenar los bolsos de los que ayeri tiníen tases de beneficios del trenta por ciento y güei “solo” les caltienen del vente por ciento. Pero pa lo que sí servirá ye pa esfarrapar lo poco que queda guapo nos más altos gumios de la montaña central asturiana. Los países alpinos, pioneros en remontes mecánicos, hai yá cuasi cincuenta años que los punxeran en custión y lleven trenta ensín construir denguno. Yá cuando’l teleféricu de Fuente De –y yá lloviere- la so instalación fue criticada por técnicos y científicos. Pero yeran otros tiempos ya otru réxime político. O eso ye lo que entóncenes se pensaba.

Pero poques coses cambiaron n’asigún qu’asuntos. Por exemplu, les posiciones critiques pa col enantu d’El Musel foren acallaes igual que pasara en plena dictadura. Nos periódicos namás apaecieron opiniones favoratibles y políticos, empresarios, sindicalistes ya universitarios aplaudíen l’esfarrape la bahía de Xixón pa comederu de la oligarquía enerxético-siderúrxico-cementera y pa conseguir mover unes poques más tonelaes de carbón. Y agora resulta que, asigún dellos espertos –nun ye’l mio casu precisamente, que nun soi espertu nes ciencias peláxiques-, ye posible que la playa San Llorienzu pierda la totalidá l’arena en cinco años. Habrá poner a remoyar les barbes de Xixón, viendo cómo tan pelando les de Castrillón y Ribeseya.

Y agora vienen más banzaos na cuenca’l Navia, cuenca más que castigada poles obres hidráuliques, la industria lláctea y la industria de celulosa. Pretenden construir un banzáu enorme cerca de Navia de Suarna, na vecina Galicia, nel mediu Navia y afleutando a la rexón de Los Ancares, de gran bayura natural y cultural. El proyectu llevaba bloqueáu dicisiete años, daos los impactos tan graves que provocaría, pero agora la Diputación de Llugo pretende ponelu otra vuelta enriba’l tapete. D’esta forma, una cuenca que debería ser estudiada y xestionada como un tóo, non namái carez les polítiques tan poco acompasaes de Galicia y Asturies, sinón que vese afleutada pola política hidráulica d’una provincia. Por si fora poco, les empreses que tan detrás del desbloquéu d’esti proyectu alloriante son les mesmes que pretenden construir otros dos banzaos nel rigu Agüeria, afluente’l Navia en tierres asturianes.

Y pa xustificar económicamente toes estes barbaridaes monten un alcuentru d’economistes y asimilaos, mui publicitáu na prensa, onde los mesmos que dieran les recetes hai diez años y que mos llevaran a la cris más fondera dende 1929, siguen recetando y recetando. Asina, por exemplu, sal Velarde diciendo que la única posibilidá d’Asturies ye una enerxía abondosa y barata. Otra vuelta l’emplegu de la economía, non como ciencia, sinon como estratexa xustificativa.

En conxunto, de facese semeyante barbaridá –y multiplicao si tamién faen lo mesmo nel Agüeria- va quedar seriamente perxudicada la reserva de la biosfera del Rigu Eo, Los Ozcos y Terras de Burón, declarada como tal pola UNESCO hai una década precisamente pol gran interés ecolóxicu, etnográficu y antropolóxicu d’esta fastera fronteriza.

Nesta partitocracia que carecemos, onde los casos de corrupción nun tienen importancia denguna porque’l reinu d’España nun ye otra cosa qu’un réxime corruptu dende’l trubiecu ya onde’l modelu políticu ye una democracia cleptómana representativa, paez que, dacuando envez, dalgún mangante acaba nel penal. Dellos socialistes de Filesa probaran el trax de rayes y van probalu tamién dellos conservadores de Gürtel. Pero, ¿daquién va pagar si Xixón queda ensín playa?, ¿daquién si’l Navia muerre?. Si los fiscales s’esmolecen poles perres esmucíes nes manes d’estos bucaneros de la política, ¿cómo ye que naide persigue a los políticos qu’hipotequen el futuru de tou un pueblu?. Amás, perseguilos ye fácile: abasta con adicar pa les sos mesmes declaraciones. Por exemplu, los que defendieron les bondaes d’El Musel y negaron los sos impactos ecolóxicos tan nos periódicos. Si mañana pasa daqué… la cosa ye fácile.

Mentanto, nes valles del Trubia, sigue’l culiebrón del “puntabrava” de Cabárceno y les “impreñables” Paca y Tola. A un tiempo, mentres nacen esbardos nos montes d’Asturies y paez qu’entama a iguase xenéticamente la población de los montes de Palencia, muerren adultos envelenaos nes tierres de L.laciana y Palacios del Sil. Pero, ya eso ye lo importante pa los nuesos xestores y gobernantes, siguimos “faciendo l’oso” con un debuxu animáu que yá nin tan siquier ven los neños nes cadenes más merdentes de televisión y que practica “paradaisin” comiendo fabes.

David. M. Rivas

lunes, 19 de abril de 2010

Darréu entama’l primer Gran Día del Gochu Asturñol en Noreña


Asoleyau na so páxina web:


Coincidiendo coles fiestes del Picadillu y el Sabadiegu de Noreña la organización independentista entama esti prósimu sábado 24 d’abril el I Gran Día del Gochu Asturñol . Esti eventu tendrá como principal actividá la entrega’l Premiu del Gochu Asturñol del añu, que s’entrega por primera vegada. La entrega’l premiu sedrá como nun podría ser d’otra manera na yá mítica estatua del gochu de Noreña, na cai Florez Estrada. La “gala “ d’entrega del galardón entamará de magar les 20:00 hores. Dende les 17 hores, desendólcase nos llocales del Llar d'Andecha el primer Picadillu Underground Fest qu'entama Darréu xunta Nora Anftifa.
Pa entregar esti premiu’l xuráu de Darréu lleva yá meses cavilando p’atopar un bon gochu que merezca esti galardón, y entá nun hai escoyíu un ganador d’ente los nominaos. Pa escoyer al ganador dende Darréu tamos teniendo en cuenta les dimensiones del animal, les capacidaes represives, antiasturianes y facistes del mesmu. Amás, al ser el primer añu d’esti rellumante galardón dende Darréu vamos tener en cuenta la esperiencia y estensa trayeutoria de los nominaos. Con toa seguridá vamos tener presente al ganador del Premiu en Noreña p’aplaudilu como merez y da-y el galardón de parte de tol Pueblu d’Asturies. Asperamos que la xente de Noreña y d’Asturies s’avere a la entrega de premios, yá que va tar enllena sorpreses.

Dempués de la entrega de galardones dende Darréu queremos convidar a tol pueblu de Noreña a una espicha nel Llar d’Andecha de magar les 22:00 hores. La espicha sedrá a precios populares y nun faltará’l bon ambiente . Darréu de la espicha s’entamará nel mesmu llocal, nel Llar d’Andecha una folixa colos meyores sonios combativos varies hores. Colo que la xornada queda percompleta: festival dende les 17hores, entrega premiu a les 20:00 hores, espicha a les 22:00 hores y folixa pela nueche.

jueves, 15 de abril de 2010

Andecha Astur de Noreña nun quier " cuartelillu" nel so pueblu.


Apuesta pola eliminación del cuartelillu ya impulsar la Policia Llocal pa la seguridá de la villa.
Ante la propuesta d'Izquierda Unida de treslladar el cuartelillu a la zona del polígonu, la del PCE d’asitialu nun terrén municipal próximu al actual y l'oposición al treslláu de PSOE y PP, Andecha Astur quier faer pública la so posición al respective amosándose contraria dafechu a la so manteniemiento nel Conceyu.

Andecha Astur considera innecesario caltener el “cuartelillu” qu'esti cuerpu militar tien Noreña.

La organización d'izquierda nacionaliega recuerda que la instalación d'éstos, nos nucleos urbanos, obedez históricamente a la intesificación de los llabores represivos y centralizadores del Estáu, llabores qu'en Asturies y Noreña conocemos perfectamente dáu'l protagonismu hestóricu d'esti cuerpu na represión del Pueblu Asturianu.

La seguridá de la zona urbana del Conceyu tien de ser asumida, igual que se fai n'otros conceyos pola Policia Llocal, asina dende Andecha Astur consideramos necesaria la trasformación de la policia llocal de Noreña nun serviciu públicu democráticu al serviciu del ciudadanu les 24 hores, pa lo que se debería ampliar la plantiya.

Ye conodida, amás, por tola ciudadanía, la ineficacia de la Guardia Civil en Noreña, que cubre un area grande de Siero y Noreña, y que como se suel dicir nunca tán cuando se-yos precisa.

La supresión del cuartelillu lliberaría terrenes que podríen convertise n'instalaciones municipales necesaries.

En resume, Andecha Astur nun quier “cuartelillu” de la Guardia Civil en Noreña, considéralo innecesariu ya ineficaz pa la seguridá ciudadana na Villa, seguridá que considera ten de ser atendida pola Policia Local de Noreña.

Pa rematar, Andecha Noreña critica duramente que tantu Izquierda Unida como'l PCE defendan y coincidan en caltener a esti cuerpu, historicamente represor y con una verdadera hestoria negra en Asturies, en Noreña cuando lo único que cabe pidir de la Guardia Civil, dende posiciones pretendidamente d'izquierda, ye la so disolución.

miércoles, 14 de abril de 2010

Darréu fai públicu'l so sofitu a los y les trabayadores de Venturo XXI y esixe futuru llaboral n'Asturies


Nun comunicau Darréu amuesa la so solidaridá cola plantiya de la empresa, en llucha dende fai un mes pola llaceriosa situación na que s'atopen. La organización xuvenil tamién esixe futuru llaboral nes cuenques y Samartín. El comunicau ye'l que vien darréu:





"Dende la organización de mocedá independentista revolucionario queremos da-y el nuesu sofitu y la nuesa solidaridá a la plantiya de Venturo XXI. Animamos a la plantiya a siguir na llucha polos sos drechos como trabayadores y la sociedá a acudir a la marcha de mañana día 15 hasta l’Ayuntamientu de Samartín.

Los trabayadores d’esta empresa de Samartín del Rei Aurelio lleven varios meses cobrando el so sueldu con retrasos de fasta 20 díes y entá nun cobraren la nómina de marzu, cobrando tan solu fai unos díes la de febreru. Esta situación dificulta’l día a día de los y les trabayadores de Venturo XXI y fai esmolecese a la plantiya pol so futuru inciertu. En total son 73 persones les que tan nesta situación, una situación difícil, yá qu’amás de nun cobrar como tien de ser, los propietarios nun esclarien a la plantiya’l futuru prósimu d’esta empresa, poro, el futuru de los trabayadores y les sos families. La plantiya esixe que se faiga pública la situación de viabilidá de la empresa, de les nómines atrasaes y del so futuru.

La nuesa organización quier amosar la so solidariedá pa colxs 73 trabayadores y facemos un llamáu al pueblu de Samartín n’especial y a la sociedá asturiana en xeneral a solidarizase cola platiya de Venturo XXI.

Como los propios trabayadores dicen el camín ye’l de la participación y la unidá. Asina, Darréu tamién quier esixir el pagu de toles mensualidades dientru’l periodu normal y que la directiva fale nidio sobro’l futuru de les y los trabayadores y la empresa.

Venturo XXI ye una empresa de la Cuenca’l Nalón qu’abrió fai 5 años col supuestu oxetivu de crear emplegu estable al marxe de la minería. Asina, esiximos el caltenimientu de los puestos de trabayu y de la empresa nes cuenques, yá qu’esa noticia nun fadría más qu’empiorar el panorama llaboral n’Asturies y na Cuenca’l Nalón.

Animamos a la plantiya a siguir na llucha polos sos drechos como trabayadores y la sociedá a acudir a la marcha de mañana día 15 hasta l’Ayuntamientu de Samartín. El Pueblu Trabayador Asturianu tien qu’entamar a defendese por sí mesmu de les agresiones de la patronal oligárquica y garrar el camín de la autoorganización, la unidá y la solidaridá ente la clas obrera.
"

Una imaxen val más...


martes, 13 de abril de 2010

Darréu fai público la estratexa represiva del Ayuntamientu de Llangréu.



Dende Darréu quieren amosar el so descontentu cola represión que la mocedá revolucionario sufre nel Conceyu de Llangréu. Dicen sufrir dende la organización independentista persecución política, con abondes multes ya incluso amenaces. El comunicáu ye'l que vien:


Continúa la persecución política en Llangréu

Dende la organización de mocedá revolucionario DARRÉU queremos dar a conocer la represión y les torgues que siguimos sufriendo por parte del Ayuntamientu de Llangréu. Dende que Darréu entamara a cellebrar el Día de la Mocedá Revolucionario nel conceyu de Llangréu escomencipiaron los problemes col Ayuntamientu d’esti conceyu, gobernáu pol PSOE y con Esther Díaz de cabezalera. Al entamu, nun pudieron impedir la cellebración de les diferentes actividades, pero ca añu diben aumentando más y más les torgues y pilancos, les multes, les amenaces, les persecuciones a militantes...; fasta que nel 2009 algamen el so oxetivu y el DMR nun pudo cellebrase en Llangréu.

Cualisquier xera pa la que Darréu solicita permisos nel conceyu de Llangréu ye refugada, la ñegativa ye sistemática por parte del ayuntamientu. Cualisquier actividá que queramos entamar nesti conceyu supón una llucha diaria y continúa. Pero non contentos con esta situación, entamen a llegar les sanciones económiques, agora mesmo Darréu en cosa d’un añu acumula más de 10000 € en multes d’esti ayuntamientu. Les caberes, de la selmana pasada, pol valor total de 5800 € que correspuenden a: 100€ por cartelos en contenedores, 3500 € por pintaes y 2200 € por pegadielles en contenedores.

Dempués vemos como ye’l propiu ayuntamientu el que coloca carteles y propaganda de los sos eventos fuera de los sitios qu’ellos consideren llegalmente “afayadizos”. En too Llangréu tan solu existen 5 paneles de mui pequeñes dimensiones, onde se puea poner publicidá.

Dexen nidio qu'esiste un doble raseru al aplicar les lleis en Llangréu y que lo qu’al ayuntamientu del PSOE esmolez-y nun ye la llimpieza de les paredes públiques del conceyu sinon que los xóvenes llangreanos s’autoorganicen, tengan idees propies y seyan críticos col sistema políticu y col gobiernu municipal. Esta persecución política escontra Darréu tien de finar, el PSOE llangreanu nun pue utilizar el control del Ayuntamientu pa perseguir a la mocedá crítico col sistema y l’Estáu español.


Asoleyáu na páxina web de la organización d'esquierda independentista Darréu.

www.darreu.org

sábado, 10 de abril de 2010

El 91,6% de los asturianos prefieren el reciclaxe a la incineración


EL GOBIERNU ASTURIANU APROBÓ UN FORNU INCINERADOR ANTIPOPULAR

Según la encuesta de la UCE fecha en marzu d’esti añu, el 91,6% de los asturianos prefier reciclar enantes qu’incinerar los residuos sólidos urbanos (RSU). Amás el 90% de los asturianos diz nun tar pocu o nada enteráu del proyeutu de construición del fornu incinerador. Una apuesta antipopular del Gobiernu asturianu en toa regla.

El Consorciu Cívicu qu’agrupa a delles asociaciones ente les que s’alcuentren la Unión de consumidores d’Asturies (UCE), Ecoloxistes n’Aición, l’Asociación pala Defensa de la Sanidá Pública y la Confederación Asturiana de Vecinos, ellaboró nel mes de marzu una encuesta que fizo a 418 asturianos nel que sorrayó que los asturianos nun consideren incinerar basories un oxetivu cimeru, apostando pol reciclaxe enantes d’un proyeutu que’l 90% de los mesmos desconocen. Solo’l 9,4% de los encuestaos conoz abondo’l proyeutu de construición de la macroincineradora de Serín.

Ún de los datos qu’alloñase de les normatives europees ye que de construyise la macroincineradora, el 61,5% de los encuestaos consideren qu’amenorgarien la posibilidá de qu’entamaren a reciclar.

Asina que tal como paez, la incineradora y les polítiques de reciclaxe son ociones a desendolcar antagóniques.

La plantiya de Venturo XXI movilízase tres dos meses ensin cobrar


Los trabayadores de Venturo XXI vienen de faer una llamada de sensibilización y sofitu a la plantiya y convoquen el próximu día 15 d'abril a les 10:00 h. delantre de les instalaciones del centru de trabayu allugáu nel pozu Venturo, nel Valle de la Güeria de Carrocera en Samartín del Rei Aurelio, pa, dende ellí, empecipiar una marcha hasta la Casa Conceyu de Samartín y concentrase nes sos puertes en señal de reivindicación y protesta pola situación que traviesa anguañu la plantiya y esixir el pagu de les 2 nómines que se-yos deben.

Los trabayadores de Venturo XXI nun cobraron en febreru nin en marzu y tamién quieren que los propietarios esclarien ante los trabayadores la situación de la empresa y los planes de futuru.

La plantiya esixe un plan de viabilidá pa Venturo, defendiendo asina un futuru dignu pa toos y caún de los 73 puestos de trabayu esistentes anguañu. Pa consiguir los sos oxetivos fain un llamáu a la participación y la unidá.

Fonte: Infoasturies

miércoles, 7 de abril de 2010

Too sigue siendo ETA...


La Fiscalía de l'Audiencia Nacional solicitó 12 años pa los ex responsables de Batasuna Arnaldo Otegi, Rufino Echevarria y Joseba Permach por pertenencia a organización terrorista.

La so conderga ye en grau de dirixentes de banda armada, dientro de la causa qu'investiga la financiación d'ETA al traviés de les 'herriko tabernes' controlaes pola organización illegalizada.

Amás, nel so escritu d'acusación, el Ministeriu Fiscal pide diez años de cárcel pa otros 20 miembros de la formación illegalizada por pertenencia a organización terrorista y pa los 17 restantes procesaos na causa, ocho años de prisión por collaboración con ETA.

Otegi alcuéntrase en prisión dende'l pasáu 16 d'ochobre por otra causa distinta a la de Batasuna, la qu'instrúi'l xuez de l'Audiencia Nacional Baltasar Garzón pa investigar la creación de 'Bateragune', una estructura que pretendía sustituyir a la formación illegalizada y tar presente nes próximes eleiciones municipales y forales del 2011.

Por respetu, por dignidá.


L'asturianu ye la llingua d'Asturies y falenla munchos asturianos y asturianes.

L'asturianu ye la llingua d'Asturies y tiren carauterístiques propies de vocabulario y estructura.

L'asturianu ye una de les llingües qu'evolucionaron del llatín, como'l gallegu o el castellán, llingües oficiales.

L'asturianu ye una de les llingües d'Asturies pal Estatutu d'Autonomía y pa otros testos normativos.

L'asturianu emplegose pa escribir documentos alministrativos nel vieyu Reinu d'Asturies y dempués nel Reinu de Lleón.

L'asturianu tien una tradicional lliteraria escrita dende'l sieglu XVI.

L'asturianu ye una llingua con un sistema gramatical únicu que tien delles variantes fóniques y morfolóxiques.

Los filólogos y sociollingüistes reconocen la esistencia del asturianu como una llingua especifica y estremada.

La situación ideal p'Asturies diba ser la convivencia llingüistica y el billingüismu simétricu, polo menos anguañu.

La llingua asturiana ta amenazada, poro, hai de protexela y promover el so usu y emplegu.

Los falantes d'asturianu tan discriminaos y hai que protexer los sos drechos.

L'asturianu ye'l patrimoniu cultural más importante d'Asturies.

La llingua asturiana ye un niciu d'identidá del país.

L'asturianu ye'l mediu d'espresión de la tradición cultural del país( música, lliteratura, mítica...).

La llingua espeya una visión del mundiu estremada, la nuesa.

La perda del asturianu ye una fase más del procesu de globalización, que lo que quier ye que toxs seyamos iguales.

La recuperación del asturianu supón una contribución a la diversidá llingüistica y cultural del Estáu.

L'asturianu tien que tener el mesmu tratu llegal y alministrativu que les demás llingües estatales.

L'asturianu ye la llingua materna y primera de munchisima xente.

L'asturianu suena bien.

La normalización del asturianu nun tien por qué ser un procesu mui caru.


Por estes y millones más de razones: ¡ L'ASTURIANU LLINGUA OFICIAL YÁ!

martes, 6 de abril de 2010

Una delegación de Darréu participó nel GazteHerria 2010.



Una delegación de Darréu participó nel alcuentru más importante de la mocedá independentista d’Euskal Herria, esti añu col llema “vive’l suañu construye la independencia” que se cellebró demientres los díes 1, 2, 3 y 4 d’Abril.
Nestos díes afitáronse les bones rellaciones col restu d’organizaciones de les delegaciones internacionales participantes nel eventu, del Estáu: Paisos Catalans, Cantabria, Andalucia, Castiella, Pais Lliones, Aragón y Galicia; d’Europa: Alemaña, Finlandia, Suiza, Irlanda, Italia; y de fora d’Europa tamién falemos colos compañeros de Bolivia y el Kurdistán.
La delegación de Darréu puso el so puestu de material y participó en diferentes charres y alderiques, ademas tuvo presente nel manifiestu “Civil & Political Rights for the Basque Young” -Que prentende denunciar la persecución que vive la mocedá revolucionario vasca.



Pa finar, miembros de la organización tuvieron presentes tamién nos recorrios historico-informativos pel pueblu de Guernika y nes distintes manifestaciones qu’hebo.


Fonte: http://www.darreu.org/

lunes, 5 de abril de 2010

La fala qu'enxamás nun someterase.



Fala asturiana, princesina inculta
Que nuna cueva curian mil lladrones,
Ya mester que nos volvas tu ensiñare
Ya nu palaz ya na cabana sones:
Ya la to fras con vivu amor palpire,
Pa da-yos amor a muitos corazones.

Volve del tou escuru escondideiru
Pa fer en Pravia una foguera grande,
Que faiga escentellar l'augua del rigu
Ya encenda'l mar ya pa las islas mande
Clarencias d'un amor desanubiertu:
¡Ya nesa llume toda Asturies ande!



In luce tua ambulabunt- Fernán Coronas.

Corrales, ex-alcalde de Siero, la lió parda.

sábado, 3 de abril de 2010

A la Señora Consuelo Vega Díaz

A la Señora Consuelo Vega Díaz, Direutora de Política Llingüística del Principáu d’Asturies.
Vítor Suárez Piñero, ciudadanu titular del DNI *******, na so condición de ciudadanu asturfalante y esmolecíu pol futuru del idioma, asitiáu a efeutos de notificaciones na **********, d’Uviéu, presentase y DIZ:

Primeru.- Dende la publicación va más de seis meses de la toponomia oficial del conceyu de Parres (BOPA del 14-IX-2009) nun s’aprobó nengún otru espediente de normalización toponímica. El conceyu de Santu Adrianu, nesi mes de setiembre, yá lu tenía aprobao en plenu (según la so propia información), pero nun tien siguíos los siguientes pasos que llevaríen a la so publicación en BOPA y polo tanto a la so aprobación y reconocencia oficial.

Segundu.- El conceyu d’Uviéu nun tien pasao, dende va años, del primer pasu nel que soliciten a la XAT la revisión de la so toponimia.

Terceru.- Anguaño esisten 15 conceyos que tán fuera de los trabayos cola XAT: Cabrales, Candamu, Cuaña, Cuideiru, Eilao, Muros, Navia, Onís, Peñamellera Alta, Peñamellera Baxa, Pravia, Les Regueres, Santiso d’Abres, Sotu’l barcu y Villayón.

Cuartu.- Esiste una dificultá fonda pa rellacionase formalmente cola so institución, yá qu’en nengún sitiu apaecen señes postales a les qu’empobinar en casu de quexa -como ye’l casu- o corréu electrónicu, namái un formulariu web, qu’o nun funciona o fai casu omisu de los pidimientos unviaos.

Paez qu’esiste una cierta dexadez col exerciciu de normalización toponímica al traviés de la XAT, nun actuando esta en momentu nengún d’oficiu, y "forciando" a los conceyos a entamar o entainar los procesos de normalización, faciendo que’l procesu s’allargue de forma llaceriosa. Tampoco paez qu’esista voluntá de la so institución por facilitar la comunicación colos ciudadanos esmolecíos pola normalización llingüística.

Poro:

ENCAMIENTO-Y

a) Ufrir información de por qué se produz esi retrasu nel espediente toponímicu del conceyu de Santu Adrianu.

b) Ufrir información sobre por qué Uviéu nun avanza nel procesu de normalización toponímica y tomar les midíes oportunes pa que dende la XAT, se fuerce a continuar esi procesu abiertu.

c) Afalar a la XAT pa qu’actúe d’oficiu escontra esos 15 conceyos que nun entamaron la revisión de la so toponimia, 6 años depués dende l’aniciu de los trabayos.

d) Informar, en cualquiera de les sos webs, de les direiciones afayadices pa empobinar a la so institución.

N’Uviéu, a ventinueve de marzu, de dos mil diez.


Vitor Suarez