DECLARACIÓN PERSONAL DE LO ASOCEDÍO’L 9 DE XUNETU DE 2010 NOS ACTOS DE LA LLEGADA DEL TREN NEGRO A XIXÓNVoi cuntar la versión como afeutada en primera persona, detenida ya imputada d’atentáu a l’autoridá, de los actos asocedíos na Estación de la Feve del Centru Xixón el día 9 de xunetu sobre ente les 17:00 y 17:45 h. con motivu de la llegada del tren prietu de la Selmana Prieta nel que venía’l Presidente del Gobiernu Asturianu, V.A. Areces, escritores, periodistes y más políticos/es.
Estremaos coleutivos y trabayadores amás de xente independiente, axuntábense ellí col envís de facer ver a Areces y sobre too a la xente que venía con elli, la situación llaceriosa d’Asturies al respetive’l tema llaboral. Cada grupu facíase oyir y ver d’una manera o otra, lo qu’a vegaes nun diba mui acordies. Hebo xente repartiendo papeles desplicando los sos problemas llaborales, otros llevaron elementos orixinales y pancartes, otros pidíen firmes, ya otros namai pitaben, lo que nun dexaba decir nada al restu los manifestantes. Amás d’ello alcontrabase ellí la banda música esperando la llegada d’Areces pa toca-y una piecina, lo que nun algamó facer.La xente entamó molestase pola presencia policial desproporcionada pa la xente que de momentu tabemos ellí.
Si too esto nun fuera suficiente, el retrasu na llegada del tren o salida de les persones del tren a l’antoxana la estación y el despiste al que nun teníen amarraos por nun saber per onde diben salir los mentaos personaxes, facía calentar l’ambiente a los policíes ya los manifestantes. Cuando entamaron surdir, la xente atropose nun primer momentu na valla cristal qu’hai frente a les víesde la RENFE glayando, pitando y llanciando panfletos. De siguío los manifestantes corrieron tres d’Areces, mientres qu’afuera esperabalu otru garrapiellu xente pa recorda-y lo mesmo que-y dicíen los concentraos dientro la estación.
Hebo xente que foi pa los autocares de los escritores y periodistes a dexar les fueyes esplicatives de la situación d’Asturies, otros decidieron ‘acompangar’ a Areces xunto cola Conseyera Cultura hasta’l coche oficial. Nesi intre, de mientres Areces baxaba pela rampa la entrada la FEVE, una montonera xente surdió tres d’elli dende la estrecha y vixilada (por policies ‘nacionales’) puerte cristal, xunto al Estancu qu’ellí hai. Al nun tener sitiu, les
persones asistentes al actu emburriaes por policíes acabamos enriba unos d’otros, y yo, l’acusada inxustamente pola Nueva España ya usada como cabeza de turco por parte d’Areces acabé siendo allanciada por mor del baturizu hacia la parte baxa de la rampa onde s’atopaba Areces cola mala suerte de tropezar cola so tiesta d’una manera casual amás de ser frenada, como pue vese ‘gracies’ al fotografu’l periódicu, por policíes y guardaespaldes d’Areces colo que nun llego tocar la so cabeza de manera que puea llamase agresión nin ‘cachete’, nin manotazu, nin mazcatu, nin sobre too pa que sea
imputada d’atentáu a l’autoridá.
Colo qu’a la fin esto foi tolo que yo tuvi de protagonismu nesi actu. La concentración magar esi momento garró un calter más agresivu ainda de lo que ya taben cola provocación d’otros manifestantes trabayadores y de lo que ya taben los policíes por si mesmos.
Yo fui prindada pola policía primero escontra la paré cerque l’estancu pa dempués ser arrastrada pa dientro la estación y llanciada escontra’l suelu como vieron delles persones maniestantes y una trabayadora d’un comerciu que s’ufiertó como testigo voluntariamente pente medies d’un corréu electrónicu unviáu por ella a l’asamblea paraos.
Echome un policía escontra’l suelu pa prindame coles esposes y tiró d’elles pa poneme derecha llevandome al coche policial.
Denantes subime al coche intenté entrar en razón, (inocente yo), diciendo-yos que m’identificaren namai pero acusaronme de resistencia pasiva. Dende’l coche vi como otros policíes pegaron y amenzaron a la xente que nun dexaba avanzar al coche onde me llevaben y cómo marchaben cola pancarta de l’Asamblea Paraos y de mientres el coche avanzaba vi xente cayer al suelu por mor de la carga policial.
Nel coche diben diciéndome que si taba chiflada, que lo que s’armó yera pola mio culpa, que si me daba cuenta de lo qu’hubiere fecho, qu’al día siguiente sedría famosa, qu’enriba ellos nun taben preparaos, nun teníen cascos nin suficientes policíes pa disolver al ‘personal’. Pa cuando
eso ya tenía un renegrón nel brazu y pierna, la saya y una uña’l pie rota. Yá na comisaría siguieron presionándome comentando a tolos los policíes la so versión de lo qu’hubiere fecho y riéndose na mio cara, mientres yo seguía coles esposes apertándome dafechu les moñeques.
Más tarde, intentaron sacame información d’otros manifestantes y dos policíes estremaos a los que me detuvieron, intentaben combayar conmigo dándome la so opinión d’Areces y de lo fartucos que taben toos de recibir hosties por culpa d’elli y la Semana negra que namai servía pa tener más conflictos y delincuencia. Y tamién de lo mal que taba’l ‘País Español’ por culpa’l PSOE y porque-yos quitaben nun sé cuantu del sueldu y qu’esta comisaría daba ascu pola xente qu’ellí teníen detenío.
Lo más triste de too, ye que la intención que teníemos de llamar l’atención amosando los problemes llaborales asturianos trocóse nuna gocha acusación d’agresión emporcando la mio imaxen y la de los coleutivos qu’ellí se manifestaron. Una vegada más pue vese l’abusu d’autoridá del Presidente Areces y la manera de desviar l’atención de los problemes reales y criminalizando a la xente que defiende lo que ye un derechu constitucional, el derechu al
trabayu. Pero too esto ye gracies a periodistes que deben ganar dalgo por dar opinión y acusar d’un delitu en llugar de limitase a cuntar una noticia oxetivamente como debe facer too periodista profesional ya independiente.
Pa finar prestaríame que se lleera la versión escrita por Miguel Ángel Llana que pue atopase en
http://www.kaosenlared.net/noticia/presidente-areces-gobierno-psoe-iu-condescendiente-fuertes-implacable-.
Nun conozo entovía a Miguel Angel Llana pero agradezco-y dende equi el sofitu que m’ufierta
en forma de testu ya imáxenes que dexen claro la verdá de lo asocedío.
Agora, día 12 d’agostu acabamos recibir na mio casa la doble acusación d’atentáu, porque acusen a mio ma de lo mesmo qu’a mi cuando nun tuvo nada que ver nestos fechos. Esto si que ye grave. Hai que facer daqué.
Violeta
Agostu 2010
La madre de la moza detenía nel tren negru tamién denunciada. L'acusación, neto que la de la so fía, ye por un supuestu delitu d'atentáu, y nos datos del denunciante apaez Vicente Álvarez Areces.Sofitu quier denunciar un nuevu casu "ablucante de represión y persecución política n'Asturies". Si'l mes pasáu, el presidente del Principáu, Vicente Álvarez Areces, siñalaba col déu y "mandaba a los sos matones detener a una moza" na llegada del "Tren Negro" a Xixón dientro de los incidentes que la so presencia provocó aquél día, agora "tamos acabantes de conocer como Areces denuncia tamién a la ma de Violeta".
Según informa el muerganismu antirrepresivu popular, esti día 12, aportaba per corréu certificáu la célula de citación pa que'l 27 de setiembre declare como acusada delantre del Xulgáu númberu un de Xixón. L'acusación, neto que la de la so fía, ye por un supuestu delitu d'atentáu, y nos datos del denunciante apaez Vicente Álvarez Areces.
Dende Sofitu ta trabayándose pa intentar aclariar "si tamos antre un erru nos datos de la citación o si ye verdá que tamos antre un casu pergrave de persecución política, porque de confirmase la denuncia taríemos antre otra invención de supuestos fechos delictivos, ya que tanto los numberosos testigos como les grabaciones de video puen dexar afitao que la ma de Violeta en dengún casu s'averó a Areces".
Asina y too Sofitu fai un llamamientu a tola xente "a tar pendientes de cualesquier novedá nestos casos y a sofitar tolos actos que s'entamen pa solidarizase con elles".
