lunes, 10 de mayo de 2010

Aición conxunta escontra la represión y la persecución política nel Conceyu de LLangréu.


Esti 8 de mayu, el PCPE-Asturies, Andecha Astur, los CJC/CMC y Darréu, entamaron una aición conxunta nel marcu’l festival “Tolo d’Asturies” qu’entama l’ayuntamientu de Llangréu, pa condergar "la sangrante situación represiva" que sufren estes organizaciones, ente otres, de la mano’l PSOE llocal. Estes organizaciones acumulen más de 35.000 € en multes "pol simple fechu de treslladar la nuesa propaganda a les cais". Mientres, denuncien, el gobiernu municipal "fai ver el doble raseru que gasta, colocando la so propaganda onde-y peta" y tamién tamién la negativa l’Ayuntamientu "a ceder espacios públicos a les nueses organizaciones tanto p’actos culturales como políticos".

Tres el repartu de los panfletos asoleyaos poles organizaciones, el grupu musical Dixebra dio pasu pa que xubiéran al escenariu cola pancarta que traía “35.000 € por nun pensar como vosotros: NON + MULTES”. Una militante lleeó’l comunicáu conxuntu. Los glayios de “tamos fartos de represión” dieron por finada l’aición, que tuvo perbona acoyida por parte de los ciudadanos y ciudadanes que s’allugaben nel conciertu. Hebo un aplausu unánime y munchos glayios de sofitu.

Esta sedrá una más de les aiciones que van llevar alantre pa "denunciar la represión que’l gobiernu municipal, encabezáu por Esther Díaz, lleva a cabu escontra les voces disidentes". Les agrupaciones llocales del PCPE-Asturies, Andecha Astur, los CJC-CMC y Darréu desixen "garantíes democrátiques y de llibertá d’espresión nel Conceyu".

Les organizaciones agradecen a Dixebra que-yos cediera un espaciu dientru la so propia actuación y la comprensión del grupu col casu de represión común.

Fonte: Infoasturies.

Convoquen una concentración contra la reforma llaboral n'Avilés


El próximu 14 de mayu va tener llugar una concentración contra la reforma llaboral, “nun podemos consentir que sigan desfarrapando Asturies”, indiquen los convocantes.

Según señalen los convocantes, na comarca d’Avilés van camín de los 15.000 paraos y Asturies ta averándose a los 100.000. “El 40% la mocedá ta en paru, la mayor parte la población trabayadora cobra sueldos miserables, siguen despidiéndonos cuando-yos da la gana, tán embargándonos les viviendes, pero regalen miles de millones d’euros a los bancos y los grandes empresarios”, señalen.

Les organizaciones apunten que delantre esta situación, ufierten reformar y amenorgar les pensiones, xubir la edá xubilación a los 67 aos, aumentar el númberu d’años cotizaos pal cálculu les pensiones, abaratar el despidu, facer más precariu’l mercáu de trabayu y les condiciones llaborales, “ye dicir: trabayar más, cobrar menos y despedinos cuando quieran”.

Camienten que ye la mesma “receta” que-y aplicaren en Grecia, “que carez los ataques del capitalismu que, probatiblemente, vamos carecer nos dientru de pocu tiempu”. Rescamplen que toles movilizaciones entamaes nesi país remanecen de la xunidá de los trabayadores nun frente común.

“Grecia ta amosando que l’únicu camín la llucha continuo y xunitario, les barrices y el fueu son les armes que tenemos pa defendenos de les agresiones del capitalismu y son los símbolos de la llucha obrera n'Asturies”, apunten.

“Tenemos de salir a la cai a glayar que yá basta de que los ricos seyan ca vegada más ricos y los probes ca vegada más probes. Tenemos de salir a la cai a amosar el nuesu descontentu, tenemos de salir a la cai a lluchar contra dellos”, señalen pa finar.

Esta concentración ta convocada pola Corriente Sindical d’Izquierda, Partido Comunista de Asturies-Corvera, Unión Proletaria, Partido Comunista de los Pueblos de España, Unidá Nacionalista Asturiana, Andecha Astur, Fai!, Colectivos de Jóvenes Comunistas, UNA-Mocedá y Darréu. La cita ye a les 19:30 hores na Plaza del Parche d’Avilés.