Estes selmanes ta cellebrándose en Sudáfrica’l mundial de fútbol, un eventu mediáticu ya importante –sobre too pa la FIFA, que va ganar miles de millones-, y con elli llega’l mesmu cantar qu’invádenos cada dos años: ”la roja” entra n’escena algamando’l monopoliu informativu en radios, televisiones, periódicos, internet y na publicidá.
Esto ye asina dende siempres, anque dende la so cacarexada victoria na cabera eurocopa esi fenómenu amplificose, potenciando asina varies víes pa los que quieren aprovechar el tirón: d’un lláu,les empreses busquen beneficios al traviés del forofismu y d’ufiertes varies si la seleición española algama tal cosa, y d’otru lláu los medios de comunicación bombárdiennos díi y nueche col mesmu tema a sabiendes de que vende.
Ehí entama aquello de la pescadilla que se muerde la cola, ye dicir, los medios falen de la seleición española porque’l tema tien bona rempuesta ente la xente,y la xente respuende porque nun-yos queda otra depués de que-yos tuvieren metiendo la seleición polos güeyos y los oyíos de contino.
Aparte d’estes dos víes p’aprofitar económicamente l’asuntu esiste una “tercera vía”, más silenciosa y tresmitía más indireutamente, pero que ye la más potente ya interesante pa los gobernantes y les élites interesaes nel caltenimientu del modelu d’estáu xunitariu culturalmente,tresmitiendo valores y sentimientu d’españolía, d’arguyu “nacional”, y faciendo escaecer la realidá d’un estáu nel que conviven delles naciones tapecíes baxo la hexemonía de lo español, afitao nesti casu col sofitu mayoritariu de les empreses y los medios de comunicación oficiales.
Asina ye en tol estáu, pero si queremos centranos nel casu asturianu veses perfácil con un exemplu: la seición de deportes nos informativos de la TPA ye práuticamente un monográficu dedicáu a la seleición española. ¿Por qué nun pasa lo mesmo cuando un equipu o un deportista asturianu algama un trunfu importante o participa nuna competición internacional? -descontando fútbol y fórmula 1 pol fechu de que la TPA tien los drechos d’esos deportes, polo qu’interesa’l so espardimientu por custiones d’audiencia- La rempuesta ye la mesma d’enantes: esaltación, promoción y normalización de vezos y actitudes españolistes, qu’en munchos casos yá nun s’emplegaben dende’l franquismu (¿Quién diba dicinos que diba recuperase’l normal emplegu del perconocíu “arriba españa”?).
Otru aspeutu d’esti procesu de promoción y puxu de lo español ye l’atropu de la mocedá, pincipalmente de los guah.es, qu’ente l’atractivu que supón la imaxe de la seleición y los pás qu’afiten los comportamientos enantes citaos son un oxetivu fácil de llevar al so tarrén.
Pero cabe entrugase si detrás del supuestu sofitu mayoritariu de los asturianos y asturianes pa cola seleición española ye dalgo más qu’un patrón de comportamientu, un efeutu de lo que mos dicen que tenemos que facer.Na mio opinión n’Asturies la influencia qu’exercen los medios de comunicación ye un factor decisivu,ente otres coses porque diverses encuestes realizaes amosen que los asturianos somos los menos identificaos con españa per detrás d’Euskadi y Catalunya, seya por una ideoloxía de calter nacionalista, por descontentu coles polítiques del estáu pa con Asturies o por otros motivos.
¿Camudaría esi sofitu a la seleición española ensin campaña propagandística dende tolos frentes? Toi seguru de que sí.
De toles maneres esto ye lo que mos trae y traerá la seleición española demientres dure’l filón, y en nós ta nun sigui-yos el xuegu y facer ver la realidá d’un aparatu propagandísticu escondíu baxo’l disfraz del deporte.
Artículu d'Adrian Calvillo.
