martes, 21 de septiembre de 2010

Democracia p'Asturies: Una iniciativa pa toxs y por toxs.

Muncho se vien falándo estes selmanes de lo asocedío alredor l'ochu setiembre. La xente, nel so llibre drechu d'opinar cunta que si una convocatoria yera meyor qu'otra, que yeren de calter estremáu, que l'asistencia foi meyor o peor y delles impresiones más. Diéronse valoraciones y comparances de toa triba, siempres inevitables y lóxiques nel clima d'alderique y reflexón que se vién viviendo dientru'l nacionalismu d'izquierda. Lo ciertu ye qu'esti ochu de setiembre hebo ciertu ambiente de construir, de dar pasos alantre, y poca xente faló d'estancamientu, prestaren o non les convocatories.

Fuera d'ello, con unes selmanes pasaes d'esa data, siempres sinificativa pa los qu'andamos nesti mundín tan pequeñu qu'a vegaes creemos grande, lo ciertu ye que l'alderique sigue siendo'l mesmu, el de la pernomada xuntaza. Xuntanza razonatible, necesaria y que ye normal que tea xenerando tanta espectación. Son los partíos los que tienen que facer d'esi alderique dalgo granible, y tienen que tomar les sos soberanes decisiones dientru los sos muérganos de decisión, eso si, siempres valorando lo que diz l'asturianu esmolecíu pola situación del país. Pero fuera d'esta dinámica, que'l tiempu dirá si positiva o negativa'l soberanismu asturianu tien de medrar dende los sos pegoyos, ello ye, enanchando cadarmes abiertes, ciudadanes y de vindicación nacional y social, empobinaes a construir texíu social.

Una d'eses cadarmes de les que falo, qu'apaeció nel mes de xunetu d'esti mesmu añu ye la iniciativa " Democracia p'Asturies/Democracy for Asturies". Una iniciativa qu'entamó desenrrollando la so actividá pa denunciar la situación predemocrática que carez el nuesu pueblu nel tarrén internacional, pero qu'evolucionó y se vió con fuercies pa facelu tamién nel planu nacional. Como tol mundiu sabe, esti pasáu 8 setiembre la plataforma ciudadana convocó una manifestación n'Uviéu de claro calter soberanista y qu'axuntó a bien de persones, saliendo alantre con bona sensación pa los ellí presentes. Bona sensación sabiendo valorar les llimitaciones de la izquierda nacional asturiana, y teniendo en cuenta que la convocatoria fízola una nueva plataforma xunitaria, que tien pocu andáu pel momentu.

Les persones qu'empobinamos esta plataforma nun queremos dexala morrer, queremos facer d'ella una ferramienta aglutinadora, abierta y xunitaria. Una ferramienta que xenere ilusión y espectatives, que trate de dar una rempuesta alternativa, de ciudadanos y ciudadanes esmolecios por algamar una Asturies que camine haza un procesu de democratización. Pero falamos d'una democracia de verdá, nunca sometía a los porgüeyos del Estáu Español, al que conocemos perbien y nun fai otru papel que'l de ser la nuesa ruina. Poro, si falamos d'un procesu de democratización nun vamos a ser hipócrites y dexar esto nuna actividá de 8 meses, 16 o 24. Si falamos de democratizar esti Pueblu y queremos camudar les coses debemos ser conscientes que'l camín ye perllargu y dificil. Y pa ello debemos tirar alantre con esta iniciativa, axuntando fuercies y deprendiendo de los erros, como non.

Asina, faigo un llamáu a toles persones que tean una sensibilidá social y nacional no que cinca a la pallabra Asturies, dende la humildá, a facer d'esta plataforma dalgo braeramente abiertu, plural y de fondu calter ciudadanu. A participar n'ella como asturianosy asturianes que somos, a aldericar nos conceyos abiertos, a organizalos espontaneamente ensín esperar a que naide los convoque y a facer país dende l'espaciu que representa " Democracia p'Asturies". A facer actividaes, desenrrollar nueves idees y facenos fuertes dende'l llema que da-y nome a esta iniciativa, pues ye cuestión de toos y toes qu'esto lleve a bon puertu. Repito, ye una opinión humilde y personal, pero pue ser una bona oportunidá p'axuntar a xente d'estremaes organizaciones, o xente ensín militancia dala y facer un bloque soberanista ciudadanu. Un bloque que respete la soberanía y diversidá de les organizaciones polítiques asturianes, pero que tamién tea'l sofitu de les mesmes, sobremanera de les qu'entá nun sofitaren publicamente la iniciativa.

Espero qu'esti artículu nun fuera mui repetitivu y aburríu pal llector, lo que nun m'estrañaría un res, pero solo quiero espeyar la necesidá de nun dexar morrer una iniciativa d'esti calter, que pue valir pa crear dinámiques xunitaries, perenriba sigles. Dinámiques qu'afonden na bas social, en crear concenxa soberanista nes cais, y consolidar un texíu cívicu coles idees clares. Y faigo una última reflexón, y ye qu'un movimientu de reconstrución nacional nun pue sofitase solo en términos eleutorales, pues estes dinámiques eleutorales tienen que tener el sofitu detrás d'un pueblu vivu, lluchador y consciente de la so realidá. Esa dinámica aglutinadora prestariame enforma que fuera representada por " Democracia p'Asturies". Por que ye un llema asumible, ye una iniciativa abierta y sobretoo porque yá esiste. Contruyamos l'alternativa ciudadana.

Xosé A. González - Estudiante