NON A LA CRIMINALIZACIÓN DE LA SOLIDARIDÁ INTERNACIONALISTA.
Dempués de conocer la detención y incomunicación de varies persones militantes d´Askapena, organización vasca de solidaridá internacionalista, afirmamos que-mos paez una nueva vuelta de tuerca na criminalización del internacionalismu solidariu y otru ataque más contra les llibertaes y los derechos fundamentales, persobretoo los d'espresión, axuntamientu y llibertá ideolóxica.
Queremos afitar la nuesa total identificación coles persones deteníes y coles sos families; pa elles el nuesu respaldu más sinceru.
Tenemos que dicir que les actividaes que realiza Askapena son les que cualesquier grupu que trabaye na solidaridá ente los pueblos desendolcamos habitualmente dende fai décades. Y podemos añadir que, amás, les siguiremos faciendo, esto ye, esparder l'internacionalismu y la solidaridá cola xente que llucha pola soberanía y la verdadera independencia de los sos pueblos y contra la imposición del Pensamientu Únicu neolliberal, insolidariu, capitalista y patriarcal.
Pa finar queremos espresar la nuesa más fonda esmolición pol tratu que puean tar recibiendo les y los collacios deteníos y incomunicaos, sofitada polos informes espublizaos por grupos como, entre otros, TAT (Torturaren Aurkako Taldeak), Amnistía Internacional o´l Comité de prevención de la tortura de la ONU.
¡¡¡PUXA LA SOLIDARIDÁ INTERNACIONALISTA!!!
¡¡¡PUXA ASKAPENA!!!
¡¡¡GORA ASKAPENA!!!
29 de setiembre de 2010
