domingo, 29 de mayo de 2011

Archivu: Andecha Mocedá 1999.


Baberu d'Andecha Mocedá tres la cellebración d'una manifestación peles cais d'Uviéu coincidiendo col 8 de setiembre. Moces y mozos soberanistes d'izquierda na Plaza La Escandalera.

viernes, 27 de mayo de 2011

Muerre un trabayador en Mieres

Otros dos trabayadores treslladaos al hospital con mancadures de distinta consideración.

Un mozu de 30 años morrió y otros dos mancáronse mientres trabayaben na cai Carreño Miranda de Mieres. Una muria d'una construción anexa a onde los trabayadores taben encofrando derrumbóse por causes qu'entovía nun se conocen.
El trabayador finó al quedar sepultáu polos escombros y los servicios sanitarios desplazaos namás pudieron certificar la muerte tres ser rescatáu el calabre por Bomberos d'Asturies con base en Mieres. Los feríos, tamién mozos de 21 y 31 años foron treslladaos al Hospital Álvarez Buylla, el primeru con politraumatísmu de clater reserváu y el segundu con un traumatismu leve nuna pierna.

Fonte: Infoasturies

Esti miércoles cúmplense 203 años de la proclamación de soberanía de la Xunta Xeneral



El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. Esti miércoles cumplénse 203 años d’esa fecha ensin nenguna conmemoración institucional.

Tampoco los partíos y coleutivos asturianos tienen previsto celebrar nengún actu alrodiu del 25 de mayu, a esceición de Darréu que programó pa esti sábadu una xinta popular nel Llar d’Andecha de Noreña a partir de les 13 hores. Tamién la villa condal foi sede del Día d’Andecha’l pasáu 15 de mayu, que vien celebrándose dende hai catorce años pa recordar esta fecha tán importante de la historia d’Asturies.

La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

La organización moza Darréu asoleyó un comunicáu coincidiendo con esta fecha na que critica qu’ésta sía “perescaecía polos nuesos políticos sucursalistes. Non por despiste, sinon por que nun interesa esa etapa de la hestoria d'Asturies”. “Énte esti escaezu, dende la mocedá de Darréu queremos recordar a los políticos gobernantes y poderosos que'l nuesu patrimoniu hestóricu como pueblu nun se pue escuender por intereses políticos, económicos, personalistes o ideolóxicos. Proponemos a les instituciones llocales y autonómiques el reconocimientu d'esti día, entamando actos de calter hestóricu o recordatorios de lo qu'en 1808 pasó nesti país, y reconociendo esti día como Día de la Soberanía Asturiana y de les sos instituciones”, reclama’l coleutivu nacionaliegu.

Otra manera, la vocera de Bloque por Asturies-Unidá Nacionalista Asturiana, Yolanda Huergo, dedica nel so blog un espaciu pa falar d’esta fecha histórica. La xente interesao tamién pue consultar un artículu d’Alicia Laspra Rodríguez espublizáu n’Asturies.com sobre les rellaciones d’Asturies y Inglaterra demientres la Guerra d’Independencia.


Fonte: Asturies.com

viernes, 20 de mayo de 2011

Sobre los comicios eleutorales d'esti domingu.






Una vegada más aporten les eleiciones de conceyos y nacionales (val más dicir autonómiques, yá que son non yá autonomistes, sinon provincianes) y nesti país y los sos conceyos de nuevu asistimos a la farsa eleutoral. El gran circu enllena l'ambiente de propaganda, política-espectáculo, promeses vacies y candidatos col únicu envís de enllenar la so cuenta corriente, falando de los partios-empreses sucursalistes y burgueses: PSOE, PP, FAC, IU, IDEAS... El tiempu va abriendo los güeyos a muncha xente, que direutamente'l 22 de mayu nun dirá a votar por decatase de la mezquindá de los partios mayoritarios y la falta de proyeutu social de los mesmos. Esto sedría bono si nun fuere porque'l sistema lleenda l'autopensamientu de les persones altravíes de los sos medios, faciendo ver y pensar qu'estes son les opciones y nun hai más.

Por supuestu, la xente esconsona pali que pali y magar qu'entá queda muncho por facer paez qu'a lo menos la concenxa crítico esposiga. El Pueblu, en xeneral, n'Europa, l'Estáu, Asturies...entama a facese una idega de que son les eleiciones burgueses, y de como'l sistema desenrolla determinaes marques polítiques que nel fondu son lo mesmu: los mercaós, la banca y la oligarquía imperante, reinante (¡o republicana!). Les persones se decaten, pero esi desengañu y esmolecimientu a la hora de la verdá nun se manifiesta (nin se va manifestar el domingu) con una patada na boca al capitalismu (a España nel nuesu casu), bien cola abstención activa, bien destinando'l votu a opciones con un fondu componente de clas.

Asturies tien una situación estremada pero col mesmu raigañu. El nuesu país tien secuestráos los drechos pol Reinu d'España, supuesta "nación" que mos controla. Tanto los drechos sociales como los nacionales d'esta patria tan en manes del gran capital, que nesti casu tien como muerganu políticu y de control de los pueblos l'Estáu Español. Asturies nun pue aniciar un camín d'emancipación social por y pal Pueblu Trabayador Asturianu porque'l sistema nel que s'integra, l'español, ye burgués y capitalista. Al empar, lxs asturianxs nun podemos exercer el nuesu drechu a decidir que queremos ser de forma coleutiva, nun podemos ser dueños del nuesu propiu destín, porque ésti se xestiona dende'l proyeutu imperialista-capitalista de Madrid. Asturies ye una colonia más d'España, como otros países, y nun pue avanzar nel exerciciu de la so soberanía porque l'exércitu español y el Rei d'España puen emplegar la violencia pa torgar esi movimientu nel casu de dase, emplegando con carta blanca la violencia según la Constitución de 1978.

Asina, como soberanistes/patriotes/nacionaliegos/independentistes d'izquierda atopámonos con partíos o proyeutos nel país con sensibilidá o cierta sensibilidá nacional, de clas o de dambes idegues. Ta nidio, la izquierda española anguañu, dixebrada como nunca n'Asturies solo tien una opción coherente nesti momentu colos intereses de clas del Pueblu Trabayador: El Partíu Comunista de los Pueblos d'España (PCPE). La defensa de los drechos de los trabayadores y un apueste firme pol socialismu son dos pegoyps principales pa la organización que mentamos. D'otra miente, el Pueblu Trabayador Asturianu precisa d'otra izquierda, pues como tenemos d'insistir nesti país se ta xenerando un conflictu de calter nacional, pues somos una nación y el marcu español nun ye'l de nuesu. El PCPE nun pue ser una opción válida pa la izquierda soberanista, nin pa lxs asturianxs en xeneral mentantu nun solo nun reconoza'l drechu d'autodetermín sinón puxe por el y lo lleve na so praxis cotidiana a la cai, dalgo que nun tan faciendo. Amás, el PCPE-Asturies ye una organizacíón con una escesiva dependencia política y organizativa de Madrid, lóxicu yá que s'insipiren nel centralismu democráticu, dalgo respetable y que munchos podemos ver bien. Pero dende llueu'l centralismu democráticu nun se pue llevar a la práutica nuna carcele de pueblos como la que ye l'Estáu español. Los pueblos tienen de puxar al empar pola so soberanía política y económica, pola independencia y el socialismu. Poro, la situación nun ye la meyor pa un proyeutu estatalista español, sinon pa un proyeutu socialista y soberanista anti-españolista, que puxe poles naciones ensín Estáu pa construir otru modelu económicu neses naciones.

Diendo a les antípodes del PCPE ta'l Partíu Asturianista, proyeutu interclasista, asturianista y de progresu. El PAS va de la man cola drecha españolista URAS, polo que cualesquier enclín nacionaliego pierde credibilidá. Más bien ye un proyeutu autonomista, quiciabes col interés de servir a los porgüeyos d'Asturies namái, pero que nun madura como partíu políticu nacionalista de centru-drecha burgués tradicional, nun pasa d'un folclorismu que munches vegaes manca a los güeyos y oreyes. Como formación interclasista yá sabemos del llau de quien ta, de la burguesía. Probablemente'l motivu de que'l PAS nun esposigue como partíu nacionalista seya la poca burguesía nacional asturiana(inesistente cuasi) qu'hai y la falta de xaciu a la hora de servir a daquién.

Dempués tenemos les dos opciones que más s'averen a posiciones d'izquierda nacionaliega, o más bien tienen esta ñatura política ya ideolóxica. Bloque-UNA y Conceyu Abiertu. Bloque por Asturies-Unidá Nacionalista Asturiana, col llema de Compromisu por Asturies ye un proyeutu que se venía percibiendo dende enantes de que'l Bloque abandonara la coalición con Izquierda Unida-Los Verdes dempués de gobernar col PSOE dientru d'esta coalición. Dende entós el Bloque por Asturies, col so diputáu Roberto Colunga ( asina figuraba a lo menos, como diputáu del Bloque) entamó a xorrecer en militancia, anque a pequeñinos pasos, motiváu dexuru pola mayor presencia nos medios y el llabor del xixonés na Xunta Xeneral, sacando munches vegaes les incoherencies a PP, PSOE ya IU, cosa que ta perbien. Lo que nun ta perbien ye l'enfotu que punxo'l Bloque por lliderar el proyeutu de converxencia de la izquierda nacionaliega y cuasi que monopolizalu ( la plataforma 8-setiembre foi un exemplu y hai fechos qu'asina lo amuesen). El casu que'l proyeutu de converxencia taba visto, y les fuercies d'izquierda más moderada del nacionalismu asturianu, UNA y BA finaron anunciando la so coalingación pa estes elleiciones, cosa que ye perpositiva cola fin de nun parcializar más el votu nacionaliegu. Dende entós dambes fuercies tan medrando en xente y en presencia mediática, anque ésta entama a baxar por puru interés del Réximen que yá parcializa too, más énte los comicios.

Lo que ta nidio ye qu'a nivel nacional BA-UNA se perfilen como'l votu posibilista real d'izquierda nacionaliega. Posibilista porque manca los oyios que Rafael Palacios nun puea dicir nuna entrevista abiertamente qu'Asturies ye nación, yá que ye dalgo que nun ye importante nun supuestu nuevu Estatutu d'Autonomía pal so xuiciu, y pa la coalición se supón. Posibilista tamién porque anque hai una crítica más que nidia a la retirada de prestaciones sociales, la ofensiva del capitalismu cola crisis y una defensa de lo públicu ( lo qu'hai pero ensín querer crear más daveres) nun hai una defensa d'un proyeutu socialista, socialdemócrata o anticapitalista. Ye un proyeutu qu'a muncha xente pue paece-y ilusionante y dexuru qu'algama meyores resultaos que n'otres ocasiones proyeutos asemeyaos pero ta cometiendo dos grandes erros: ta enfotandose muncho n'algamar el diputáu, dalgo percomplicáu y que desgasta abondo y ta escaeciendo muncho la política y l'aición nos conceyos, que ye dende onde se construye'l país. Hai de reconocer el trabayu de BA-UNA y la bona voluntá de muncha xente qu'integra esi proyeutu, pero una cosa nun quita a la otra, y nun dexa de ser un proyeutu reformista y que anque nun seya autonomista, antroxa'l nacionalismu d'eses formaciones d'un autonomismu "pa nun asustar a la xente con eso de la independencia y socialismu, que ye una chiflaura anguañu", el problema ye qu'eses formaciones finen siendo lo que quieren aparentar. Da-y tola bona suerte del mundiu a esti proyeutu, y qu'entre Rafael Palacios na Xunta Xeneral sedría una bona noticia, si eso aida claro pa que se normaliza cierta concenxa nacional n'Asturies, anque pa eso hai que dir de cara, ser honestos y nun escuender l'amor a la nuesa patria y l'ansia de llibertá que-y deseyamos.

Por últimu, ta la iniciativa popular dende la bas Conceyu Abiertu, que quier basar la so praxis na política nos conceyos, la democracia participativa y la izquierda soberanista como bandera ideolóxica. Conceyu Abiertu ye un proyeutu que se lleva fraguando dende va un tiempu nun procesu de xunidá d'aición similar al del BA-UNA, pero nesti casu amestando fuercia ente'l soberanismu/nacionalismu d'izquierda más críticu, coherente y combativu. Ñegar que la mayoría de la so bas social son militantes d'Andecha Astur ye ñegar lo evidente, pero nun ye denguna mentira que xente del ámbitu sindical, cultural, xuvenil o independientes s'amestaron al proyeutu dende l'entamu. Ye más, en dalgunos conceyos ye xente qu'hasta anguañu nun encaxó en dengun proyeutu nacionaliegu concretu la que ta tirando de la iniciativa. Ye una realidá que mediante Conceyu Abiertu muncha xente se t'averando al soberanismu de clas asturianu, motiváu en parte por ser una alternativa a les estructures típiques de partíu.

La iniciativa Conceyu Abiertu se presenta en nueve conceyos, nos que tien xente abondo dimpuesta a trabayar a partir d'anguañu, de cara principalmente (falamos a nivel eleutoral) n'algamar represetación institucional pa les eleiciones de dientru de cuatro años, ya que'l proyeutu (como l'anterior) nun tuvo tiempu a echar andar cuasi. Si bien ye ciertu qu'un conceyal en Noreña ye daqué más que probable, asina como en Villaviciosa, Samartín y Grau. Lo que ta nidio ye que si esta iniciativa va medrando día a día y se compromete a facer una política municipal dende los conceyos cola defensa del soberanismu y l'anticapitalismu ( mediante un proyeutu socialista) quiciabis seya l'entamu de la construcción definitiva d'un contrapoder que s'integre como un frenti d'UNIDÁ POPULAR SOBERANISTA, que seya l'aniciu d'un procesu de lliberación nacional y social n'Asturies. Pel momentu la iniciativa tresmite bones vibraciones y t'atrayendo a xente abonda, con persones dientru d'ella que tan amosando na campaña eleutoral amás que tan preparaes de sobra pa tresformar la realidá y que tienen dotes pa ello. Nun hai más que consultar entrevistes, programes y notes de prensa de los estremaos conceyos y tamién a nivel nacional.

Poro, ente les medies tintes del autonomismu asturianu folclorista y les propuestes de la izquierda española tradicional, anque seyan baxo la bandera del marxismu-leninismu más sinceru decimos que non. Que nun son proyeutu que vayan estimular la emancipación nacional y social del País Asturianu. Por otru llau, respetando dafechu'l llabor de BA-UNA camentamos que'l posibilismu nun suel ser bon conseyeru, nun suel trayer namái qu'entrismu y más posibilismu. Asina les coses, dende'l Blogue independentista y socialista Frayando Cadenes pedimos abiertamente'l votu pa Conceyu Abiertu nos conceyos onde presenta candidatura ( perimportante) y tamién pa la Xunta Xeneral. Del 23 de mayu p'alantre falaremos otru día, qu'a la fin ye lo qu'importa.

Les urnes solo puen ser un frenti de llucha más, non dengún fin.

¡PUXA ASTURIES LLIBRE Y SOCIALISTA!

jueves, 19 de mayo de 2011

El domingu, VOTA CONCEYU ABIERTU



Pola reconstrución nacional y social d'Asturies. Por facer política d'izquierda soberanista dende los conceyos. Por tratar d'intentar democratizar les Cases Conceyu de nueve municipios del país. Por nun ser una opción posibilista que busca beneficiu personal. Por ser una alternativa a les tradicionales estructures partidistes p'algamar la Unidá Popular qu'Asturies necesita col envís d'entamar el camín d'un procesu de lliberación nacional. Pola soberanía del nuesu país, pola igualdá social y los drechos del Pueblu Trabayador Asturianu. Vota Conceyu Abiertu.

domingo, 15 de mayo de 2011

Asturies dixebrá.



Al pasar per el puertu, puertu
Payares,
m´alcontré con un vieyu llindiando
vaques.
Yo como yera vieyu-y pregunté:
-Si quier dormir la siesta yo
llindiaré.
El vieyu mui ufanu me contestó:
-Les vaques de la mio casa
llíndioles yo.

ASTURIES NUN YE ESPAÑA








sábado, 14 de mayo de 2011

Idees principales de Conceyu Abiertu por Samartín del Rei Aurelio


La candidatura de Conceyu Abiertu al municipiu de Samartín del Rei Aurelio ta formada por un grupu de 17 persones enfotaes en llevar aire nuevo ya idees orixinales a la institución del nuestru ayuntamientu. Yá son demasiaos los años de monopoliu del mesmu gobiernu monocolor. Bueno será que lleguen maneres distintes ya idees nueves que revitalicen el nuestru territoriu. Dos idees principales queremos apurrir al conxuntu de la ciudadanía pa que les valoren según el so personal criteriu:

1. Defender y revitalizar la estructura en parroquies del conceyu Samartín.

2. Democratizar y acercar a los ciudadanos la institución del ayuntamiwentu y facelu más asturianu.

El conceyu de Samartín concebíu, non como unidá sociopolítica simple y básica, indivisible, sinón como la suma, la composición resultante de les diferentes comunidaes humanes que son les parroquies o collaciones.

Nel nuestru conceyu tenemos concretamente cinco parroquies, que pensamos que representen la verdadera estructura sociopolítica dientro de la cual el ciudadanu d’esta tierra siéntese a gusto, afáyase bien, alcuéntrase enfotáu, arrodiáu de vecinos y de familiares, ensin complexos a la hora de desenvolver el so rol como ciudadanu.

Por eso, una de les nuestres propuestes ye la de dotar a cada una de les cinco parroquies o collaciones d’una asamblea o conceyu abiertu de carácter consultivu y asesor, y que ha de ser, de manera obligatoria, oyía y tenía en cuenta pol alcalde y por tola corporación municipal.

Asina, cada territoríu parroquial va a tener un conseyu direutivu formáu por tres vecinos, nomaos a tal fin por l’alcalde, y que van a ser los responsables de convocar, con una periodicidá de tres meses, al restu de convecinos del territoriu de la collación, a un conceyu abiertu o asamblea xeneral onde se puede tratar y debatir cualisquier asuntu o tema rellacionú cola vida y actividá pública d’esi territoriu.

Les actes d’eses asambleyes o conceyos abiertos son consideraos como documentos oficiales que la corporación municipal habrá de tener necesariamente en cuenta. A resultes d’esto, la democracia va a ganar indudablemente en calidá y el poder radicará en mayor medida y de manera más directa nel pueblu, que ye, nun tenemos que lo olvidar, constitucionalmente soberanu.

La segunda idea que queremos aportar ye la que consiste en democratizar y asturianizar la vida del ayuntamientu de Samartín.

Pensamos que los ciudadanos de Samartín del Rei Aurelio tienen que perder el mieu al so ayuntamientu. Sí, asina de claro, pue paecer mentira pero asina ye. A una buena parte de los paisanos da-yos una especie de perceguera cuando tienen qu’entrar nes dependencias de la casa consistorial a resolver o consultar algún asuntu personal. Hai qu’acabar con eso. L’ayuntamientu nun tien que ser un ente estrañu, nun tien que ser una casa forastera, nun tien que ser un sitiu al que mos muerda acudir cuando lo necesitamos. Hai que facer lo posible pa cambiar esta negativa situación y conseguir que seya teníu como algo cercano, como algo accesible, como algo familiar.

Y creemos que pa ello podíen, guapamente, ser mui bones les siguientes decisiones:

Difundir per tolos medios de comunicación disponibles l’Orde del Día de cada una de les sesiones que se vaigan a realizar, asina como les posteriores actes de les mesmes onde figuren los correspondientes acuerdos y decisiones tomaes. Ambos documentos amás de ser publicaos na web municipal y dientro de les dependencias de la casa consistorial, seríen distribuíos y colgaos, polos correspondientes notificadores, en tolos paneles informativos que s’alcuentren repartíos pelos diferentes pueblos y barrios de la totalid´del conceyu. Tresparencia informativa lo más amplia posible.

Una idea más que queremos apurrir dende la nuestra formación ye la de realizar un llabor d’asturianización integral de l’actividá institucional del municipiu.

Asina, queremos facer billingüe la páxina web del ayuntamientu, llamentablemente una de les poques de tola comarca que sólo tien versión en castellanu y non n’asturianu.

Redactar n’asturianu toles comunicaciones tanto internes como externes de la institución municipal.

Declarar de manera formal la cooficialidá del asturianu dientro del conceyu de Samartín del Rei Aurelio. En definitiva sentir que tamos viviendo nesta tierra y patria nuestra que tien el nome d’Asturies, y presumir orgullosos de la nuestra secular cultura y de la nuestra rica llingua.

*Xulio Llaneza Fernández ye'l Candidatu de Conceyu Abiertu a l’alcaldía de Samartín del Rei Aurelio.

Entrevista a Mariu Arbesú, candidatu de CA a la Xunta Xeneral.

sábado, 7 de mayo de 2011

ENTREVISTA... Paula Martín, Candidata a la Alcaldía por Conceyu Abiertu



Entrevista fecha nel blogue'l Mierense: http://www.elblogdelmierense.blogspot.com/

-Preséntese a los lectores de EL BLOG DEL MIERENSE

Comu primera candidata de la iniciativa Conceyu Abiertu en Mieres, quiero presentame a tolos y toles llectores d’esti mediu informativu. Llámome Paula Martín Palacios residente en Turón y de ñacencia nesti conceyu. Toi a piques de cumplir los 21 años y soi estudiante de Pedagoxía na Universidá d’Uviéu. Tantu yo a nivel personal, como les y los mios compañeros, prestámonos a participar nesti proyeutu dende la humildá, la honestidá y l’envís de regenerar la política democrática d’esti conceyu.

-¿Qué programa presenta Conceyu Abiertu en las elecciones del 22M? ¿Qué resultados piensa obtener?

Conceyu Abiertu por Mieres, ye una iniciativa xunitaria formá por persones del ámbitu de la izquierda soberanista y nacionalista, militante o independiente de partíos políticos. Pretende ser un movimientu abiertu de cálter asambleariu pa facer fuercia colos ciudadanos de Mieres y lluchar escontra les especulaciones ya inxusticies sociales, polítiques y económiques qu’anguañu sacuden a esta población. Nel programa presentamos una serie de puntos fundamentales comu propuestes:
· Lluchamos por un ayuntamientu más participativu. Un ayuntamientu que abra les puertes a toos y toes les habitantes del conceyu.
· Ufiertamos una llucha incesante escontra la corrupción entá esistente nel municipiu.
· Proponemos un Mieres con igualdá d’oportunidaes pa homes y muyeres, y con espacios útiles pa toes les edaes.
· Condergamos la emigración forciada. Queremos denunciar la represión que sofren les persones y colleutivos que toquen esti tema y señalen culpables.
· Proponemos la creación de instituciones y el fomentu a través de diversos medios pa sofitar la integración de los inmigrantes y facer d’esti, un conceyu multicultural llibre de prexuicios raciales y por otru llau xenófobos.
· Organizaríemos un proyeutu de cultura a gran escala, faciendo que persones de tolos sexos, edaes y races pónganse en contautu.
· Potenciaríemos la llectura y l'alderique constructivu con experiencies en toles biblioteques del conceyu y cientros culturales.
· Defendemos la necesidá de caltener la nuesa identidá comu pueblu, faciendo oficial l'asturianu. Ye la llingua d’Asturies y debería ser formalmente la materna.
· Defendemos un modelu de financiación municipal, dexando de llau les plusvalíes urbanístiques. Esto aidaría a una meyor distribución no relacionáu cola riqueza de la Cuenca del Caudal.
· Defenderemos incansablemente que l'Ayuntamientu espublize les actes de los sos los plenos pa que tolxs vecinxs tean accesu a elles.
· Atender a la diversidá del conceyu. Toles parroquies tienen drechu y han de ser atendies dende la Casa Conceyu. El conceyu de Mieres nun ye solo Mieres del Camín.
· Defendemos la tradicional ferramienta d'organización coleutiva que son los conceyos abiertos y la realidá territorial de los conceyos, dando-y voz y dinámiques democrátiques a les collaciones/parroquies mierenses.
· Defendemos una reindustrialización de Mieres basandonos nel respetu al mediu ambiente y la responsabilidá a la hora de xestionar los fondos nesti tipu d'inversiones.

-¿Qué piensa usted aportar a la política municipal y que espera sacar de ella?

Les diverses y necesarios aportaciones a la política municipal quedan espuestes nes siguientes llínies que conformen la rempuesta a les cuestiones. De toles formes más que yo, toles/os compañeres/os en xeneral ufiertamos una ferramienta política y social de participación pa incidir na realidá mierense. Conceyu Abiertu tien por bandera la democracia participativa, faciendo que l'asociacionismu y les asamblees de vecinos lleguen al Ayuntamientu y seyan elles quienes orienten la xestión de políticos. Tamién comentar qu'equí naide nun ta por algamar un puestín, sinón esclusivamente pa facer política por y pa la xente. Considerámonos una parte d'esti pueblu autoorganizándose y promoviéndose. Nin más, nin menos.
En cuantu a lo qu’asperamos obtener d’ella, ye una riqueza na experiencia política de la iniciativa, ye ver contentos a toos y toes les conciudadanes del municipiu, y sacar de Mieres el so meyor llau. Un Mieres con trabayu y xente culturizada capaz de vivir la so vida, sin dependencia ciega d’otros que en realidá viven a costa d'esi ciudadanu que se quexa de tolos políticos pero nun actúa a la so escontra. Eso tien de finase, tenemos qu'entamar a canalizar por víes polítiques de tresformación social lo fartos/es que tamos.

-¿Cuándo ha comenzado en política? ¿De dónde surge su interés en la política?

Años atrás, ensin cumplir siquiera la mayoría de edá, dime cuenta que daqué nun furrulaba nel mio entornu. D’ellí n’alantre fui construyendo la mio identidá política, el mio criteriu ideolóxicu al mesmu tiempu que medré a nivel personal. Siempres creí nos principios qu’anguañu plantego y defiendo. Principios los cuáles foron consolidándose na mio personalidá a través de la esperiencia, la crítica y autocrítica más fonda. Milito dende fae años nel ámbitu xuvnil de la izquierda soberanista asturiana y collaboro con dellos proyeutos asociativos, sobremanera cola izquiera nacionaliega.
L’entornu la cuenca foi más que suficiente aliciente pa querer trabayar por un futuru diferente pa esti conceyu y conceyos que conformen Asturies. Poro ensin más dilación, la mio visión de una cuenca meyor, encaxa dafechu nel programa que Conceyu Abiertu ufierta a la ciudadanía del municipiu.
-¿Cree usted que está suficientemente preparado/a para acometer la empresa de dirigir el ayuntamiento de Mieres?

La alcaldía de Mieres ye un de los principales problemes que sacuden a esta cuenca. Non solo pola nefasta xestión del dineru públicu sinon pola necedá a la que’asistimos o la hipocresía de les promeses vacíes del equipu de gobiernu. Poro, pese a que somos una iniciativa relativamente desconocía pol pueblu de Mieres, en casu de algamar representación mayoritario nun solo nun tamos preparaos sinon que pior que la anterior lexislatura nun sedríemos capaces de facelo. Esto ye, si Conceyu Abiertu algama representación nel Ayuntamientu de Mieres, nun algamamos cuatro politiquinos el poder, sinon que ye’l publu quién entra na ca conceyu, ya que’l pegollu base d’esti proyeutu ye la democracia participativa. Ye dicir, que los ciudadanos tendrían el poder de decisión y nun sedríen el meru oxetu de votu ca cuatro años.

-¿En qué pilares fundamentales basará su política?

La honestidá, la democracia participativa, la tresparencia, la defensa de les señes d'identidá d'Asturies y de Mieres, la normalización llingüistica o la solidaridá ente les persones. La reactivación de Mieres, la necesidá d'axuntar rempuestes populares dende los movimientos sociales o la persecución de la corrupción o'l clientelismu, ente otros munchos.
Dicir que delles persones de los que conformamos Conceyu Abiertu por Mieres pertenecen al ámbitu rural del Conceyu, persones ente les que m'alcuentro. Nun fai falta dicir que ye necesaria mayor implicación en tolos nucleos poblacionales de Mieres, y non solo n'ún o unos pocos.

-¿Qué nos ofrece a los mierenses para que confiemos en usted y la votemos?

Principalmente que nun aspiramos a ser grandes políticos nin nada pol estilu Simplemente que somos un piñu de ciudadanes y ciudadanos qu'entama Conceyu Abiertu col envís d'ameyorar el municipiu y les sos parroquies sintiendo la voz de la xente, faciendo política con ellos y falando claro. Nun aspiramos a dengún sueldu nel ayuntamientu y siguiremos faciendo política, yá seya con convocatories, confrontaciones dialectiques col Gobiernu Municipal o trabayu de cai.
Simplemente eso, somos una ferramienta mediante la cual la xente pue plantegar los sos esmolecimientos, proyeutos y hasta utopíes. Somos d'izquierda, pero de verdá, polo que tamos lluchando non solo pol cambiu social, sinón pola tresformación de la realidá social. Queremos democracia, y non burocracia, y la queremos yá. Con unes lleis o estatutos aprebaos pol pueblu, y non polos partíos del sistema, la banda, la ilesia o los grandes medios de comunicación de masas.

-¿Cómo define su partido?

En primer llugar, especificar que Conceyu Abiertu nun se presenta públicamente comu un partíu políticu, sinon comu una iniciativa por y pala ciudadanía dende la bas de los conceyos, basándose na democracia participativa. Conceyu Abiertu refuga les tradicionales estructures burocrátiques y non asamblearies del réximen. Los partíos dominantes que acaparen tola atención mediática son fieles a estos patrones y nun miren más que por enllenar les arques de les sos élites.

Denominamos precisamente al nuesu proyeutu como Conceyu Abiertu pa reivindicar esta institución de la tradición comuñal asturiana como ferramienta social y democrática pa facer política y axuntar voluntaes.
Esta ferramienta, tien de ser el muerganu que rixa a lo menos pa nós una estructura de bas pa facer democracia participativa y real tanto en Mieres comu n’Asturies.

La iniciativa popular ta encuadrá dientru los presupuestos políticos ya ideolóxicos de la izquierda soberanista asturiana. Ye decir, puxamos, tanto en Mieres como nel conxuntu del País por defender los drechos nacionales y sociales d’Asturies, del Pueblu Asturianu. Ye fundamental reconstruir la comunidá asturiana como una identidá coleutiva, ye dicir, recuperar l’orgullu de ser asturianes y asturianos pa poder tener voz dientru la política d’Asturies. Esta idega nun ye dalgo propiu d’un nacionalismu tresnocháu y/o escluyente, sinon que ye la realidá. Sinon recuperamos la nuesa identidá como pueblu vamos siguir nes mesmes, ensín pintar ná nes decisiones polítiques que cinquen a nós mesmes. Tamos condergaos a la emigración forciada, a ser el basureru enerxéticu del Estáu y al desmantelamientu del texíu llaboral d’esti país, polo que ye pernecesariu camudar d’una vez. Tenemos qu’entamar a lluchar por Asturies dende la izquierda, pues l’actual política centraliega ta siendo la nuesa ruina. Ye fundamental mirar por esti pueblu ensín intromisiones interesaes dende Madrid.

-¿Cree que los fondos mineros han sido utilizados, no digo ya bien, si no honestamente?

La rempuesta más honesta a esta entruga ye un non rotundu. Al igual que yo, miles de persones sofrieron, sofren ya inda más sofrirán el robu masivu que se comete no cincante a esti asuntu. Los fondos mineros tan controlaos y “secuestraos” por xente que na importayos la ciudadanía de les cuenques, los fíos de los mineros o los trabayadores a los que éstos deberían tar destináos.

-¿Investigarían el destino final de cada euro de los fondos mineros por si se hubiera incurrido en situaciones de ilegalidad?

Por supuestu, ye más que necesario tomar cartes nesti asuntu. Demientres munchos años, tamos asistiendo a un escurantismu no que cinca a esti capital públicu, siempres con irregularidaes y acusaciones ente los políticos y sindicatos dominantes, cola fin único, de llavase les manes.
La tresparencia de cara a los conciudadanos pa colos fondos alluma pola so ausencia, faciendo intermediarios a coleutivos que pocu aporten y representen a les y los trabayadores. Polo que tresmite la xente na cai remanen eses perres pal so beneplácitu. D’esti mou, los fondos mineros, que deberíen ser el muerganu de reactivación d’esti conceyu y del conxuntu de les cuenques mineres, suponen un pilancu más pal desendolque socioeconómicu de les mesmes.

-Es evidente que el paro está afectando a nuestro concejo, ¿tienen en su programa algunas medidas para intentar reducir la cifra de parados del concejo?

La cifra de paraos en Mieres asciende a 4.213 y va n'aumentu. Probablemente munchos de nós terminaremos nesa cola de la que toos y toes fuximos, poro consideramos necesaries una serie de midíes pa terminar o polo menos reducir esta alarmante cifra.
Una de munches que recueye el nuesu programa ye evitar que les grandes centrales sindicales cobren un 10% por ca trabayador despedíu o faciendo polítiques municipales que s’opongan a les imposiciones del Estáu ya’l Principau, la Banca, Grandes propietarios del Capital y les Estructures Económiques Supraestatales. Amás hay qu’echar abaxu el pautu social que políticos, sindicatos y patronales firmaron estos meses que supón un retrocesu nos drechos sociales abaratando el despíu y permitiendo unes condiciones de precariedá propies del emtamu del sieglu pasau.

-¿Qué medidas a favor de las personas de la tercera edad (que son una gran parte de la población de Mieres) se han incluido en el programa electoral?

Queremos finar col estereotipu que más abunda na sociedá y dexa a les persones mayores nun planu secundariu, prauticamente inútil ya que nun son activos nel sistema productivu y facer de esti sector tan importante d’edá, un coleutivu útil, un coleutivu que siéntase cómodu y que puea disfrutar de los servicios ufiertaos pola ciuda en sí.
Somos fieles defensores de la Educación Permanente, teniendo esta siempres en cuenta la educación y el aprendizaxe, seya cual seya la edá de la persona. Ye per importante que la mocedá aproveche el bagaxe que la esperiencia dio-yos a esti sector de la población.

Tratarase d’aidar tantu a les residencies comu a los cientros sociales pa qu’estos nun sofran de necesidaes básiques y apurriranse les atenciones personalizaes necesaries por parte de tolos componentes de Conceyu Abiertu.

-¿Qué tienen pensado hacer para sanear las arcas del ayuntamiento?

La investigación económica nel Ayuntamientu mierense ye perimportante. Tamos convencíos que pese a les llimitaciones de la política municipal y les imposiciones d’otres instancies un Mieres menos endeldáu ye posible. Caltenemos que ye más útil y económicu invertir en cultura y menos n’infraestrucutures inútiles como’l llevantamientu de dalgunes cais de Mieres que taben cuasi intactes, por exemplu. Hai que desendolcar proyeutos d’obres públiques siempre, pero con precuru y ensín cayer na irresponsabilidá del despilfarru.
Recordemos que les deldes del nuestru pueblu les pagamos toles families polo qu’esti ha de ser un pegollu y principiu cimeru pa cualesquier gobiernu llocal. Asina, fomentar les dinámiques socioculturales, el comerciu llocal y l’empléu nel municipiu en beneficiu del mesmu puen ser criterios mui provechosos y positivos pa la calidá económica de les arques públiques del Conceyu. Ye clave investigar na xestión de fondos públicos y desmantelar más que probables redes d’enchufismu y clientelismu qu’acarretaríen un gastu desorbitáu. Con responsabilidá, fuxendo del despilfarru y tresparencia la economía llocal y de la casa conceyu pue salir del pozu nel que s’alcuentra anguañu.

-¿Tienen pensado, por ejemplo, crear bonificaciones en los tributos municipales; para que haya más empresas, mas autónomos; en definitiva más empleo para ganar en población?

Sí, por supuestu que si, ye perimportante invertir pal bon desendolque del comerciu llocal pa un progresu convexente. Los autónomos necesiten del apoyu de les polítiques municipales pero tamien ye necesariu defender lo pocu que queda de la empresa pública y les prestaciones qu'esta empresa ufierta.

-No hace mucho Mieres era una ciudad de primera, ahora no sé, y hace unos 15 o 20 años, Mieres era una de las ciudades españolas con mayor renta per cápita. ¿Qué tienen pensado, para que Mieres vuelva a ser lo que era?

La causa, ensin dulda ye la supuesta “reconversión”. Coincidimos dafechu col profesor d'economía de la Universidá Autónoma de Madrid David M. Rivas que diz sobre'l términu reconversión: “Ye un términu relixosu: “volver a convertise”. Nun tien dengún xacíu económicu nin científicu ya ye ún de los primeros emplegaos polos políticos y los economistes pa nun llamar a les coses pol so nome”. Poro llevamos años viendo comu les xestiones socioeconómiques a lo llargu de les caberes décadas nun valieron más que pa fundir el conceyu.

Conceyu Abiertu propón una política d’inversión lo más responsable y xusta qu’horadamente se puea y una braera reactivación industrial, con una industria caltenible que s’adapte al respetu del mediu ambiente. Mieres a curtiu plazu nun va poder ser dengún referente de renta per cápitaa, seyamos realistes. Primeru habría d'aparar el desmantelamientu de la poca industria que nos dexaron, darréu invertir nuna nueva industria y garantizar la minería que queda. Amás, como non, pa mirar tan arriba tendríemos d'iguar pel momentu problemátiques más concretes y urxentes, como l'altu índiz de desempléu, la precariedá llaboral y la emigración forciada de la mocedá fuera de Mieres y del país.

-¿Qué va a hacer respecto a los impuestos?

Nin Conceyu Abiertu en Mieres, nin nel conxuntu d’Asturies vamos vender un programa propiu de salvapatries, onde la baxada d’impuestos ye una promesa que dempués queda nel aire. Los partíos políticos mayoritarios, tres algamar el poder ya tener la supuesta responsabilidá enriba s’escaecen por completu d’esa promesa electoral. Esi ye’l papel que los políticos “profesionales” traten de dar a los impuestos, el d’un carambelu eleutoral, una promesa barata d’engañar namás p’arramplar votos. Eso si, nós proponemos un usu coherente, responsable y tresparente del caudal públicu d’esti conceyu emplegando esti en servicios públicos realmente útiles y necesarios pal conxuntu comunitario.
La xestión de los impuestos baxo un criteriuesponsable qu’asegure una inversión que cubra carencies sociales y comunes a tola población ensín despilfarrar fadría espontánea una progresiva baxá fiscal. Por supuestu, dende Conceyu Abiertu por Mieres queremos aparar la carestía de la vida polo que ye necesario aplicar na política fiscal municipal estos criterios que defendemos.

-¿Qué medidas incluye su programa en el tema del asturiano como lengua?

Esti ye un tema perimportante pa nós que merez ser tratáu con seriedá y muncho tiempu. L’Ayuntamientu de Mieres tien de ser un exemplu de tratu pa cola llingua asturiana. En Mieres, como nos otros conceyos del país se tien de declarar la oficialidá de la llingua de forma clara, y non mediante reformes que nun son más que migayes. Los pasos de formiga tan bien, pero les ciudadanes asturianos llevamos munchos años sufriendo un agraviu comparativu respeuto a otros países y pueblos del Estáu, que tienen los sos drechos llingüisticos recoyíos.
Proponemos dende Conceyu Abiertu en Mieres que se cumplan estrictamente toles lleis y decretos que surdieron a lo llargu d’estos años alredor del bable, que tan siendo manches veces imcumplíes pola alministración. Esto torga y pon pilancos a munchos ciudadanos que nun ven aplicaos los pocos drechos que tienen como asturfalantes. Pa normalizar l’idioma nel conceyu ye fundamental iguar la toponimia en Mieres, rotulando como mínimu en billingüe tolos topónimos y rótulos que dependan del Ayuntamientu.
Otru tema ye revisar y poner l’atención nos Servicios de Normalización Llingüistica de Mieres, dignificando a los mesmos y ufriendo a los sos trabayadores condiciones llaborales decentes. En munchos conceyos d’Asturies tan surdiendo manches quexes dende estos servicios. Los cuales, sufren tanto de precariedá como de despreciu por parte de los gobernantes d’estos municipios, siendo vistos éstos servicios como un gastu innecesariu. Pese a les opiniones de munchos políticos, toes y toos podemos consultar dellos estudios, como los de la Academia de la Llingua, que demuestren que la oficialidá del nuesu idioma nun solo nun saldría cara, sinon que mos reportaría beneficiu económicu, y como non cultural, el más enriquecedor,

-¿Cómo ve el futuro del Campus durante la próxima legislatura?

Si tornen a algamar representación quién/quienes tamos avezaos, sedrá un bon proyeutu truncáu y fracasáu pola compraventa d’intereses que supón a día de güei los estudios universitarios públicos. Si de la nuesa responsabilidá, dependiera, tomaríense una riestra de medíes cola fin de impulsar estos estudios y dotar a esta institución d’una braera rama útil d’investigación y desendolque. Estableceríemos más relaciones ente la empresa pública y la universidá, ya que paezmos necesaria práutica normalizada y organizada dende los primeros años de carrera. Esto sedría beneficioso pa una continuidá permanente no relacionáu cola educación amás de promover una toma de contautu col mundu llaboral dende edaes más tempranes ensin abandonar los estudios.
Por otru llau, les carreres impartíes nel campus tienen de reinventar y flexibilizar nueves salides llaborales, daqué que ye precisu enviendo la actual precaria situación.
Pa finar con esta entruga tenemos una dulda considerable sobre’l futuru de la nueva residencia construyía al llau del campus. Una vegada más mos atopamos con un proyeutu vaciu que dexa entrever un escurantismu alredor del gobiernu llocal d’anguañu.

-¿Qué medidas relacionadas, con el medio rural, han incluido en sus programas para pueblos concretos?

Ta perclaru que l'ámbitu rural d'esti conceyu ta abandonáu. Durante munches décades esti conceyu echó la vista haza la so capital, Mieres del Camín y la industria puxante que lu dinamizaba, pero escaeció dafechu munches de les 15 parroques que conformen Mieres. Poro, ye'l momentu de reactivar el mediu rural, sofitando los sectores de producción tradicional que tenemos en munchos pueblinos y nucleos poblacionales mierenses y promoviendo'l consumu de d'estos productos nel comerciu llocal y nel de los conceyos de la redolada. Ye fundamental dinamizar la economía nestes zones del nuesu territoriu pa da-yos vida y aparar fenómenos como la emigración de la mocedá, quedando pueblos completamente vacios.
Baxo'l nuesu puntu de vista el Conceyu de Mieres tien d'invertir nel ámbitu rural, ufiertando servicios a la xente d'estes zones, dende lo puramente material a lo cultural. L'abandonu que la Casa Conceyu fai de los munchisimos vecinos que viven nestes poblaciones ye vergoñosu, y pa frenar esti procesu d'abandonu hai que mirar les causes y afrontar soluciones. Por desgracia, a día de güei paez ser qu'estes dos llabores nun fueron feches por dengún de los políticos que cobren de les perres d'esos mesmos vecinos abandonaos.
Asina, Conceyu Abiertu quier ufiertar dinámiques de participación na vida política de Mieres a estos vecinos y dende yá podemos dicir que puxar pola producción tradicional ( con perdón d'impusiones de la Unión Europea y l'Estáu español) y apostar pol ociu y la cultura. Les polítiques de execución de saneamientu y la ufierta de nuevos servicios materiales nestes zones tien de ser clave. Tenemos de recuperar tolos pueblos de les 15 parroquies o collaciones y caltener el mou de vida tradicional d'estes persones y d'Asturies en xeneral a lo llargu de tola so hestoria.

-Si usted se convierte en alcaldesa, ¿tendrá más en cuenta a los más de 400 pueblos que forman el concejo de Mieres?

La rempuesta nun pue ser otra más que por supuestu, ya que yo mesma crieme nun d’esos pueblos, con toles dificultades, tolos engaños, y toles inversiones en vanu. Por tantu los ciudadanos de Mieres, son iguales a los de los pueblos, asina comu les sos opiniones y decisiones. Poro, trataríemos de adecuanos a toles necesidaes y paliar les carencies que durante tantos el gobiernu llocal provocó n’estos pueblos.

-Relacionado con el tema del aparcamiento en Mieres, ¿qué piensa hacer?

Conceyu abiertu tomará les medíes que ten nes sos manes decidiendo en conxuntu cola ciudadanía en qué midía necesítense aparcamientos y cuáles sedríen les zones más adecuaes ensin afeutar a dengún otru tipu de sector. Por supuestu l'aparcamientu tendría de ser un serviciu gratuitu y que respete'l padremuñu arquelóxicu, hestóricu o natural de la nuesa llocalidá.

-Si de usted depende, ¿se seguirán metiendo les perres en chorraes como el techu del puente Siana, el nuevo Ayuntamiento, los caminos sin segar por los montes, los polideportivos vacios y el levantamientu continuo de aceras en Mieres o se apostará por invertir en infraestructuras en pueblos y lugares con una más que deficiente infraestructura en todos los aspectos?

Comu bien recueye’l nuesu programa, les decisiones sobre tolos temes que inciden directamente a la economía individual y comunitaria de ca persona habitante nel conceyu, tomaranse en conxuntu con ellos. Nun pretendemos invertir nin un solu euru en cortines de fumu que tapezan la precaria realidá y amás distraigan les atenciones de los brearos problemes y conflictos de Mieres. Por ello, importante inversión que se decida, tomarasé man a man con toles y tolos trabayadores, vecinos y vecines, ciudadanos y ciudadanes, de tolos colectivos y edaes.

-Ya para terminar, ¿qué destaca de los otros candidatos y sus programas políticos?

Nun vamos entrar en valorar cuentos y promeses que venden los tres partíos tradicionales nin nel so programa, nin vamos cayer en personalismos. Los enfrentamientos non constructivos dexamoslo pa elles y ellos. Amás, nun creo qu’ellos s’ocupen de nomanos, yá que les opciones polítiques sinceres, honraes y colos principios ideolóxicos claros y coherentes nun cuntamos cola so publicidá. Nun fai falta dicir qu’esto nun ye por otra causa que’l pocu interés que tienen en visibilizanos.Lo que ta más que claru ye que pese a les cruzaes que s’autodediquen n’época eleutoral, esos linchamientos formen parte del so xuegu. Un xuegu de cara a la gallería en precampaña pero que pala ciudadanía más atenta y crítica nun pasa inalvertíu. El xuegu que realicen ye bien hipócrita. Deberíemos danos cuenta colos años que PSOE, PP ya Izquierda Unida cumplen un papel prefixáu por instancies superiores a estes fuercies polítiques, como la banca, la patronal más reaccionaria y l’Estáu español. La FSA-PSOE de Mieres, como a nivel asturianu, nun fai más qu’enfotase en controlar los sos medios y empreses texiendo una rede clientelar en beneficiu de los sos allegaos. D’otra miente’l Partido Popular pon en práutica una oposición que ca día mos paez más pautada colos “socialistes”. Izquierda Unida que dicir d’ella, lleva munchos años llexitimizando les polítiques del PSOE nos conceyos d’Asturies y na Xunta Xeneral, fomentando la idea ente la población de que la FSA ye’l “mal menor” y que representa a la “izquierda útil” frenti a la drecha que supón el PP.

Ye fundamental romper con estos esquemes y superar estes opciones, pues tres trenta años yá vimos que les polítiques d’estes formaciones fracasaran, tanto nesti conceyu como nel conxuntu del territoriu asturianu. Son partíos que nun tan preparaos pa xestionar Asturies y los sos pueblos por que nun son más que tentáculos del centralismu madrilano, raigañu orixinal de tolos problemes d’esti país. Por otru llau dende Conceyu Abiertu en Mieres queremos ufiertar diálogo y pontes con otros proyeutos políticos y sociales de la izquierda real d’esti conceyu y que crean que’l camín de Mieres y d’Asturies ye fomentar la idea de qu’Asturies pue ser una identidá política soberana baxo criterios de democracia popular y tresformación social.

Entrevista n'Andecha Obrera a la mocedá contra'l desmantelamientu de les cuenques


Fai un tiempu entamó nes cuenques una campaña, entamada por Darréu y xente independiente de la redolada anticapitalista, pa la dignificación ya'l resurdimientu d'esa parte d'Asturies. Dende Andecha Obrera, considerose importante face-yos una entrevista pa da-yos puxu y que s'estendiere'l so mensax tolo posible.

¿Cómo surde esti proyeutu?

La iniciativa surde nun contestu qu'a lo menos ye preocupante. En menos de dos años les cuenques mineres tan superando de lloñe la dinámica de pieslle d'empreses y ataques a los y les trabayadores d'esta zona d'Asturies. Si la crisis permanente que sufren estos conceyos yera un problema palpable y de gran consideración paez ser qu'estos meses atrás los ataques al texíu llaboral de les cuenques tan siendo inda más xabaces y continos. Asina, ente tanta agresión de la patronal y la pasividá de los sindicatos verticales, que munches vegaes combayen cola patronal, munchos mozos y moces dicimos que yá valió. Que yá valió de desmantelar la Cuenca del Nalón y la Cuenca del Caudal hipotecando'l futuru de la mocedá.

Asina dende Darréu entamamos un alderique internu ente la militancia y simpatizantes cola fin de dar rempuesta a esta murnia situación socioeconómica y política que tamos sufriendo. En consensu apaez la idega d'entamar una campaña de denuncia a nivel de Les Cuenques, faciendo ver la situación a la mocedá y tratando de señalar responsables d'esa mesma situación. La denuncia por supuestu faise dende una perspectiva moza y de cara'l futuru, al futuru de nueso, que ye bien intrigante.

Asina, frutu d'esti alderique, el proyeutu entama a salir p'alantre, cola puesta en marcha d'iniciatives como asoleyar 2.000 pegadielles pa los nuesos conceyos refugando y denunciando la llaceriosa situación de les cuenques. Tamién s'asoleyaron numberosos pasquines que se tan distribuyendo en folixes y zones onde s'axunta muncha mocedá col envís de concenxar a la mesma que solo la mocedá pue lluchar pol so futuru y el de les cuenques, y que naide, y menos los políticos y sindicatos traidores van facelo por elles y ellos.

Dempués tamién se ficieron dellos muriales cola mesma temática y s'espresa en numberoses muries les nueses vindicación de futuru y l'esmolecimientu de los xóvenes por ver les cuenques mineres morrer. Como se pue ver, pel momentu'l proyeutu ta cientrándose en desendolcar campañes propagandístiques informatives, pero dexuru que vendrán a enanchar el proyeutu otru tipu de propuestes d'estremada triba.

Ideolóxicamente, ¿cómo vos definís?

La campaña quier abrise a tol espectru ideolóxicu de la izquierda anticapitalista y combativa de les cuenques, que tean Asturies y les cuenques como'l so marcu d'actuación. Nun s'entiende una campaña contra'l desmantelamientu y pol futuru de los nuesos conceyos ensín cuestionar el sistema capitalista impuestu en les cuenques mineres a sangre y fueu demientres munchos años. Tampocu s'entiende esti conflictu baxo una visión que nun seya únicamente asturiana y de les cuenques, pues ye un conflictu con unes peculiaridaes mui llendaes, un conflictu con unos factores qu'inciden n'el mui específicos d'esta zona d'Asturies.

Per otru llau, anque ésta campaña tea abierta a la diversidá política cola fin d'espardir el mesmu mensaxe d'una forma más masiva y popular, hai de solliñar que foi entamada por militantes y simpatizantes de la mocedá soberanista y revolucionario Darréu. Hasta'l momentu los militantes y simpatizantes de Darréu en les Cuenques Mineres tan implicandose abondo cola campaña, anque yá hebo delles collaboraciones desinteresaes d'otres persones que nun pertenecen a esa organización, nin tan siquier a la izquierda nacionaliega.

Dende equí queremos tresmitir que taríemos encantaos de que'l llema "Por unes cuenques pa vivir y trabayar", que ye'l llema cabezaleru d'esti proyeutu, fuere asumíu por tola xente posible como forma de caminar pali que pali haza la unidá popular en les cuenques, en defensa d'un futuru más real ya igualitariu. De toles formes nun se pue escuender la ñaturaleza d'esta campaña, que ta siendo empobinada en mayor midía dende la mocedá de la izquierda nacionaliega d'Asturies y la mocedá del sindicalismu de clas del país.

¿Qué propuestes tenéis pa iguar la situación de Les Cuenques?

Les Cuenques lleven munchos [años] arreconstinando unes problemátiques mui concretes y complexes. La responsabilidá de la murnia situación na que mos atopamos ye tanto de políticos, como de los empresarios pasando polos sindicatos traidores a la clas obrera, ente otros. La situación tien d'entamar por reactivando los sectores productivos industriales que tenemos, invirtiendo n'ellos con responsabilidá y ensín chanchullos. El casu d'Alas Aluminium ye bien sinificativu, d'unos fondos públicos que s'invierten nuna iniciativa de reactivación y que naide nun sabe onde tan. El dineru públicu tien de ser públicu, ello ye, que puea xestionalo'l Pueblu d'alguna forma, nesti casu nes persones de ca conceyu onde reinvierte direutamente una inversión. Si se trata d'una empresa que quiera suplir el papel de los pozos a la hora de dar trabayu, que s'alcuerde colos trabayadores la xestión d'eses perres y el fin últimu de ca inversión. La tresparencia tien de ser una obligación per parte de los poltroneros(políticos y grandes mafies sindicales que sufrimos) pa que llueu nun se dean casos de corrupción.

Otra forma de reactivar les cuenques ye ufrir meyores proyeutos educativos y formartivos a la mocedá, pues nin abunda la salida formativa, nin la educativa nin por supuestu la llaboral. Otru pegollu sedría quitar d'una vegada por toes los millonarios regalos que la FSA y la so redolada ufren a los lliberaos traidores del SOMA. El sindicatu pseudomineru sigui afogando a les cuenques y si investigáremos podríemos ver como la rede de clientelismu que tien afitada en collaboración col so partíu y los que combayen con ésti movería munchisimos millones, por supuesto, públicos. Éstes perres o bien son emplegaes pa pautar la paz social nestos conceyos o bien traten direutamente d'enrriquecer a tola cadarma elitista-sindical qu'axunta esti sindicatu que manexa los nuesos conceyos con criterios que recuerden muncho'l caciquismu.

En resumen, hai d'invertir na reindustrialización d'estes zones, puxando por una industria caltenible, que seya respetuosa cola ñatura y s'adecúe al espaciu y los recursos. Tamién hai que puxar poles zones más rurales, fomentando la economía tradicional, qu'hestoricamente siempres tuvo gran protagonismu en les cuenques, asina como'l ganáu. Dempués ye básicu, como diciemos, desaniciar privilexios, despilfarros y la rede clientelar que sufrimos. Eses sedríen soluciones polítiques y socioeconómiques a curtiu plazu que fadríen de les cuenques una zona onde poder vivir y trabayar. Dempués por supuestu, too tien de dir xuníu a un procesu d'organización popular del Pueblu Trabayador en llucha por unes cuenques onde poder vivir, trabayar y tamién desendolcar un procesu social y políticu onde'l protagonista seya esi Pueblu Trabayador Asturianu y de les cuenques y s'afite la igualdá en toles estayes de la vida social diaria.

¿Teneis dalguna actividá en mente?

La verdá ye que tenemos delles actividaes de mente. Pel momentu vamos a siguir cola campaña a nivel informativu, espardiendo'l mensaxe a nivel de cai y trabayando en propaganda. Tenemos que finar la tirada de 2.000 pegadielles coles qu'entamó la campaña, y se van a facer campañes de cartelos y repartu d'octavilles na cai. La idega agora mesmu ye caltener la dinámica propagandística que siempres ye fundamental ya dir faciendo medrar la campaña y la so sonadía.

Por otru llau ya s'aldericó sobre otru tipu d'actos, más bien en forma de convocatoria y otru tipu de protestes, como la ellaboración de documentos vindicativos pa entregar en asociaciones y cases conceyu, pero entá nun hai daqué definitivu. Esi tipu de convocatories surdirán conforme avance la campaña. Sobre actos conxuntos lo mesmu, ye lo que se tien en mente. Enanchar la campaña y dar rempuestes conxuntes.


Unes últimes pallabres...

Munches gracies al blogue "Andecha Obrera" por ufiertanos esta entrevista ya interesase pola situación de les cuenques con ella. Siguiremos informando al vuestru mediu alredor d'esta campaña contra'l desmantelamientu d'estos conceyos y la falta d'espectatives pa la mocedá. Salú ya dixebra.


FONTE: www.andechaobrera.blogspot.com