miércoles, 31 de agosto de 2011

Andecha Astur homenaxeó al Conseyu Soberanu nun actu d'alcordanza



El pasáu sábadu nel Puertu Payares.

La organización politica asturiana Andecha Astur cellebró'l sábadu 27 d'Agostu un actu d'alcordanza al Conseyu Soberanu d'Asturies y Lleón, muérganu alministrativu soberanu declaráu'l 24 d'Agostu de 1937,y presidíu pol dirixente socialista -cabezaleru tamién de la República Independiente d'Obreros y Campesinos d'Asturies, declarada en 1934- Belarmino tomás. Dichu organismu cunta énte les sos aiciones la petición d'entrada na Sociedá de Naciones, organismu qu'a grandes rasgos equivalía a lo qu'anguaño ye la Organización de les Naciones Xuníes.

Poro, Andecha Astur, que tradicionalmente asitiaba l'homenaxe al Conseyu Soberanu nel Cementeriu de Pando -onde descansen los restos de Belarmino Tomás-,en delles ubicaciones de Xixón y nel Puertu de Tarna, treslladó esta vegada la ubicación del so actu pa desendolcalu en Branillín,otru emplazamientu simbólicu que vivió numberoses batalles en defensa del Conseyu Soberanu y los sos valores de llibertá y socialismu p'Asturies.Ellí colocose un monolitu conmemorativu y procediose a la llectura de dellos discursos desendolcaos por voceros de la organización política.

Pesie a lo simbólico ya importante d'estes feches qu'Andecha Astur remembra, la organización nacionaliega d'izquierdes ye la única que desendolcó nesti añu un actu n'homenaxe a los homes y muyeres que nesa dómina convulsa y de llucha sacrificárone polos valores que consideraben bonos p'Asturies y pa la so clas social.

Denguna reforma al serviciu'l capital.




Sofitu a los vecinos afectaos poles obres del tanatoriu de Llugones


Conceyu Abiertu por Sieru quier amosar el so sofitu firme a los vecinos de Paredes afectaos poles obres del futuru tanatoriu de Llugones y demanda la paralización de les obres darréu.

"Nun queremos entrar n'agravios comparativos, nin negar la esistencia de dichu tanatoriu, siempres y cuando la demanda de los vecinos de Llugones sía real y correspondida con tala obra, pero queremos dexar claro que, como otres munches, les coses nun se faen asina. Nun puede ser qu'un conceyu que lo que ye güei s'enllena la boca cola participación ciudadana, faiga de menos la opinión de los munchos vecinos contrarios a esta forma d'execución del proyectu.

La escura recalificación de los terrenos, l'alta peligrosidá d'inundación de la zona y la cercanía a zones tantu vecinales como d'esparcimientu dexa bien a les clares que dende'l conceyu namás se da prioridá a la especulación urbanística percima de cualesquier otra razón; Per otru llau, vemos como nuevamente como unos y otros, dependiendo de la so posición nel gobiernu xueguen colos vecinos con continues promeses y mensaxes incumplíos.

Dende Conceyu Abiertu demandamos la paralización inmediata de les obres y la posterior puesta en marcha de xuntes colos vecinos pa buscar una solución ecuánime pa toos, amás dende esti momentu ufiertamos la nuesa total disposición a los vecinos de Parés pa una posible xunta y da-yos tola ayuda que nos sía posible."

www.conceyuabiertu.org

martes, 30 de agosto de 2011

Conceyu Abiertu convocará una manifestación el Día de la Nación Asturiana


L'8 Setiembre baxo'l llema "Más Asturies,Menos España".

El movimientu políticu vien d’anunciar públicamente al travies de la so páxina web www.conceyuabiertu.org la so propuesta vindicativa pal prósimu día 8 de setiembre, Dia de la Nación Asturiana.

Conceyu Abiertu cellebrará una manifestación n’Uviéu baxo’l llema Mas Asturies, menos España. El manifestamientu percorrerá les cais d’Uviéu de magar les 13:00h saliendo de la Estación del Norte y finando énte Presidencia de Gobiernu.

Tamién afiten que podríen anunciar nos prósimos dies otres actividaes vindicatives asociaes al 8 de setiembre y faen un llamáu a la sociedá asturiana en xeneral y les organizaciones sociales y polítiques comprometies con Asturies a movilizase esi día y a sofitar esta convocatoria.

Como indiquen nel so manifiestu fundacional, Conceyu Abiertu ye "un grupu de ciudadanos procedentes de distintos ámbitos políticos, sociales, sindicales, culturales y de movimientos populares de diversu tipu que, conscientes de la ineficacia de les polítiques d’anguañu y de la pergrave cris permanente que carez la sociedá asturiana, caletriamos que llegó'l momentu de buscar nueves maneres de facer política entamando un movimientu de reconstruición nacional y social dende la base".

Infoasturies

El gobiernu de Cascos pretende caltener la deucracia



Foro Asturies presentóse a les eleiciones con un programa políticu que recueye delles propuestes de reforma de la xestión pública copiaes del documentu 30 midíes pa la rexeneración de l'Alministración Pública asturiana, espublizáu pol Conceyu por Otra Función Pública n´Asturies. Ente elles, la de xeneralizar "el concursu de méritos como procedimientu ordinariu de provisión de puestos de trabayu, llindando la llibre designación a supuestos esceicionales debidamente xustificaos".

Agora, un mes dempués de la toma de posesión d' Álvarez - Cascos, el Gobiernu que preside acaba de treslladar a les organizaciones sindicales una propuesta de rellación de puestos de trabayu na que tolos puestos de xefatura de serviciu, ensin esceición, nómense pol sistema dedocráticu de la llibre designación, que se xeneraliza pa esta categoría de puestos ensin la xustificación o motivación específica que vien esixendo una repitida, constante y uniforme xurisprudencia del Tribunal Supremu y como sentenció n'Asturies el Tribunal Cimeru de Xusticia.

L'aprobación per parte del Gobiernu del PSOE-IX d'una llei de llegalización de los nomamientos a deu nun puede sirvir d'escusa, pues trátase d'una circunstancia anterior bien conocida, a la que quería dar respuesta'l programa electoral de Foro Asturies.

¿Qué camudó en tan poco tiempu pa que'l Gobiernu que sofita Foro Asturies incumpla de manera tan rescamplante´l so programa electoral, precisamente nun puntu perimportante pala necesaria rexeneración de l'Alministración Pública asturiana que tanto apregonaba?. ¿ D'ónde parten les nueves regles empobináes a caltener el réxime dedocráticu del arecismu que tanto criticaba Foro Asturies?. ¿Quién manda realmente na Función Pública asturiana?. Dellos nomamientos sonáos apunten a que la estratexa clientelista foi diseñada por reconocíos asesores del arecismu.

El balance hasta la fecha complétase cola ufierta de puestos na solombra y el tapecimientu de los nomamientos d´asesores de los gabinetes - personal eventual -, práutiques continuistes reñíes cola tresparencia na política de personal.

El Gobiernu d'Álvarez - Cascos y el partíu que lu sofita deben una esplicación urxente a la sociedá asturiana.. Por hixene democrática, equí yá nun val callar.

Conceyu por Otra Función Pública n'Asturies

lunes, 29 de agosto de 2011

Morrió un mineru nel Pozu Candín


Un mineru morrió esta mañana mientres trabayaba nel Pozu Candín, en Llangréu, de la empresa estatal Hulleras del Norte S.A. (Hunosa). El trabayador de 44 años vivía en La Felguera y yera Especialista de Tayu Mecanizao. El siniestru prodúxose alredor de les 11:45 hores al quedar el mineru llangreanu atrapáu ente una maquina y un vagón de carbón. Facía 3 años que nengún mineru finaba n'Hunosa, l'últimu fore'l 30 de xunu de 2008, nel Area Suero.

Infoasturies

jueves, 25 de agosto de 2011

Involución llingüística en Xixón


N’Ast protesta pola involución producía nel XX Festival de la Sidra de Xixón

Dende N’Ast si bien podemos entender anque nun compartir que los pasos que se dean dende los gobiernos institucionales del Foro Asturias seyan mui progresivos, lo qu’enxamás vamos poder asumir nin reconocer comu llexitimo ye que se produza una involución nel escasu usu istitucional de la llingua algamáu nos caberos años.

Asina dempués de dos años d’usu del topónimu "Xixón" nel Festival de la Sidra Natural d’esti conceyu por mor del llabor d’Izquierda Unida dende’l Ayuntamientu (y non precisamente cola simpatía de los qu’entós yeren los sos socios de gobiernu), anguañu ésti esapaez con motivu de la ventiava edición d’esi eventu. Y que l’ asturianu continúe non solamente tando arrequexáu, sinón inclusive en pior situación, resúltamos ofensivo tantu pa la llingua como pa la cultura sidrera, que siempres tuvieron mui venceyaes.

Esta involución amás ye especialmente doliosa yá que la presona qu’acupa nestos momentos la conceyalía de Cultura del Ayuntamientu, Carlos Rubiera, nel pasáu siempres se definió pol so compromisu colo llingua asturiana.

Dende N’Ast, calteniendo la nuesa llinia de defender la llingua y la identidá asturianes con independencia del collor políticu de los distintos gobiernos, reivindicamos tantu l’usu únicu del topónimu Xixón como la edición n’asturianu de tolos materiales que se sacaron en castellanu.

miércoles, 24 de agosto de 2011

Darréu énte'l 24 d'agostu, día nel que'l Conseyu Soberanu d'Asturies y Lleón declarose soberanu.

La Organización de Mocedá Independentista Revolucionario, Darréu, quier facer alcordanza del 24 d'agostu de 1937. Esi foi el día nel que'l Conseyu Soberanu d'Asturies y Llión declarose soberanu dafechu de la República Española p'afrontar la guerra contra'l facismu y entamar un proyeutu socialista de país p'Asturies. El Conseyu Soberanu asoleyó filatelia propio, amás de poner en cursu billetes y monedes propies nomaos popularmente como “ belarminos”, en referencia al so presidente, Belarmino Tomás.

El Conseyu foi echao alantre por socialistes, llibertarios y comunistes col envís d'avanzar na guerra contra'l facismu español y tener más marxen pa echar alantre proyeutos revolucionarios d'organización social. Nun debemos d'escaecer qu'un de los primeros determinos del Conseyu foi coleutivizar la industria y los demás muerganos de produción. Amás el Conseyu solicitó la entrada na Sociedá de Naciones, precursora de la ONU.

Per otru llau recordar que'l fechu de que'l Conseyu declarárase soberanu del Gobiernu republicanu, asitiáu entós en Valencia fizo qu'hubiera munches tensiones y s'espeyare nestos fechos un claru problema nacional, pues Asturies llevaba munchos años reclamando más soberanía y l'estatalismu español poniendo torgues y pilancos a tales vindicaciones. Toles persones que participaron nel proyeutu políticu y social del Conseyu volcáronse como nunca, y fixieron qu'Asturies aguantara más tiempu ensín cayer pol facismu español, amás se facilitó al fuxía a miles de persones pal exiliu.

Asina, pa la nuesa organización xuvenil Darréu paezmos una vergoña qu'esta data hestórica asturiana nun tea nin un solu espaciu, nin homenaxe istitucional. Que'l 24 d'agostu nun tea reconociu nun ye casualidá. Al igual que con dates memorables como'l 5 d'ochobre o el mesmu 25 de mayu'l “Principado” tapez la nuesa hestoria, arramplenla y si ve la necesidá reinvéntala.

El colonialismu nun tien dengún interés en que los asturianos y asturianes conozan les dates hestóriques onde'l Pueblu Asturianu decidió entamar el so propiu camín, ensín imposiciones nin dictaos de Madrid. Nun-yos interesa que la mocedá asturiano seya cosciente del grave problema nacional y social que carez Asturies, y que meyor forma que tapecer la nuesa hestoria y los determinos soberanos d'esti pueblu.

N'alcordanza'l Conseyu Soberanu d'Asturies y Lleón: ¡Puxa'l 24 d'agostu!
¡Puxa Asturies llibre y socialista!


www.darreu.org

domingo, 21 de agosto de 2011

Actu d'Alcordanza de la declaración de soberanía del Conseyu d'Asturies y Lleón


Andecha Astur afitará'l 27 d'Agostu en Branillín (Puertu Payares) un monolitu con una placa n'homenaxe al conseyu.

El sábadu 27 d'agostu, Andecha Astur cellebra en Brañillín (Puertu Payares) un actu d'alcordanza nel 74 cabudañu de la declaración de Soberanía del Conseyu d'Asturies y Lleón el 24 d'agostu de 1937.

Tres facer l'actu dellos años en Xixón -delantre de la que fore la sede del gobiernu soberanu-, Andecha Astur celebró los dos caberos años esti actu en Tarna, un llugar mui simbólicu de la resistencia asturiana contra'l facismu. Ellí Andecha afitó va dos años a la vera la mesma carretera un monolitu con una placa n’alcordanza del Conseyu Soberanu. Esti añu la organización política Andecha Astur decidió llevar el so actu al Puertu Payares onde instalará otru monolitu con una placa n'alcordanza de los homes y muyeres que defendieron neses montañes una Asturies llibre y socialista.

A les 14:00 hores va facese un actu políticu cola intervención de voceros d'Andecha Astur, pa dempués rematar la xornada con una espicha popular. Per otru lláu, desendolcarase una actividá complementaria consistente en xubir al Picu Cellón (2026 m), una de les cumes emblemátiques d'esi seutor de la cordillera y que foi murniu escenariu de los combates na defensa d'Asturies.

Fonte: Infoasturies.

Llamada a conceyu de N'Ast


L'asociación cultural llama a simpatizantes y militantes a un aconceyamientu abiertu.

El conceyu abiertu va a tener llugar na Llibrería Paraxuga, asitiada na Cai Paraíso, d'Uviéu, el miércoles 24 d'Agostu dende les 20 hores.

L'aconceyamientu cuntará con un orde del día formáu polos siguientes puntos: Organización; Campañes n'activo -Voluntariáu llingüístico, Material pedagóxicu, Esposición de Cartelos, Vivir n'Ast, Nome n'asturianu...; Propuesta de nueves campañes; Distribuición de material -chaples, pegadielles, llibretines, postales...- y, pa finar, Ruegos y entrugues.

sábado, 20 de agosto de 2011

Pa la Universidá d'Uviéu l'asturianu ye "otra cultura".



Semeya d'un cartelu actual asoleyáu pola Universidá d'Uviéu "una universidá al serviciu de la sociedá asturiana" según los que remanen la istitución formativa. Según esti cartelu conocer otres cultures implica conocer la llingua asturiana... y llueu vendrá muncha xente a ñegar qu'esta istitución formativa y educativa nun ta en manes del nacionalismu español neofranquista...

miércoles, 17 de agosto de 2011

ROCKBLON- Chatarrona Fest 2011



Entamen l'Asociación xuvenil El Roblón, Darréu, Nora Antifa, Chatarrona Clothing, Mafia Negra Records y DMH-Familia.

El sábadu 20 d'Agostu cellebrarase nes antigües escueles de Granda de magar les 19 hores una edición especial del festival "ROCKBLON", que va a cuntar col cartelu que vien darréu:

-hermanos de calle - rap (pola sieru).
-minoria agresiva - punk rock dende ribeseya.
-the new ones - hxc melodico dende grau.
-sr zamarro - rap (pando-uvieu).
-la bastarda - rap -reggae (xixon).
-maniako y puto dano- rap, r&b, reggae (xixon).
-I.R.A - hxc punk noreña-llangreu xugando practicamente en casa.
-ozono - freedon fighters , reggae antifa (uvieu).
-dj lolo - ellectronica (noreña).
-heck-omy - rap (xixon).
-nark - hip hop dende colombia - noreña.
-radioactive monkeys- rock dende granda.
-varito - rock comedia dende sieru.
-zigua- ska punk (xixon).
-break-dance a cargu de mafia negra break-dance y collacios.
-graffiti a cargu d'ocelt artista llocal.

Dende la organización apúntase que la entrada ye de baldre y con precios populares.Amás, habrá búhos durante tola nueche dende Granda hasta Pola Sieru y Uviéu.

Conceyu Abiertu por Uviéu solidarízase col mozu multáu por llevar el signu 'AS' na so matrícula.



Desiximos la posibilidá de llevar l' "AS" nes nueses matrícules en llugar de la "E".

Dende Conceyu Abiertu por Uviéu queremos amosar el nuesu refugu a l'actuación de la Policía Municipal nel casu del mozu asturianu multáu con 90 euros pol fechu de llevar na so matrícula el símbolu identificativu "AS" en llugar de la "E" qu'anguaño amosen tolos vehículos matriculaos nel estáu español. Consideramos que'l tapecimientu del símbolu que por defectu vien nes plaques identificatives nun supón una torga pa la llectura de la matrícula y, polo tanto, nun dificulta la so identificación.

Poro, desiximos el fin de les multes d'esti calter, y que se disponga de manera llegal que la sustitución de la "E" pol "AS" nun seya motivu de sanción económico, que nel casu de que l'emisor de la multa seya la Guardia Civil xube hasta los 200 euros. Ello ye tarea de la Xunta Xeneral en términu cimeru, pero tamién desiximos a los dirixentes de les fuercies de seguridá llocales a aparar darréu coles multes por mor de la matrícula, y qu'hasta'l casu denunciáu pol organismu Sofitu yeren tarea esclusiva de la Guardia Civil.

Tamién queremos encamentar a les autoridaes pertinentes a que finen coles sos actitudes represives y atiendan a una demanda que ye real y comprobable énte'l pueblu asturianu: queremos la posibilidá d'emplegar nes nueses matrícules el símbolu del nuesu país, l' "AS", ensin ser multaos por ello.

Una vegada más, interés políticu ya interés popular amosen tar en mundos distintos, y ye por ello que dende Conceyu Abiertu por Uviéu nun podemos facer más qu'insistir nel nuesu mensaxe: pa evitar que dende les "autoridaes" desendolquen abusos d'esti tipu, nun hai meyor dirixente que'l pueblu. N'Uviéu y n'Asturies.



N'AST denuncia especulación urbanistico en Cimavilla


La costruición d’un parking soterrañu va poner en peligru importantes restos arqueolóxicos

L'asociación cultural N’Ast asoleyó la so oposición a la costruición d’un parking soterrañu nel barriu xixonés de Cimavilla, "yá que nel sosuelu d’esa hestórica zona esisten diversos restos arqueolóxicos que van sufrir cuandu menos una seria erosión" apuntando que "desgraciadamente" nel Estáu español "tenemos múltiples exemplos de cómo la costruición d’un parking soterrañu implica la destruición de patrimoniu hestóricu ensin que la ciudadanía tea debidamente informao".

Pa N’Ast esta actuación supón "una vuelta más" que la ciudá de Xixón "inore la so hestoria como espaciu societariu pa optar polos modelos d’organización espacial dominantes nel Estáu" y sorraya que "yá se tán ampliando dellos de los parking esistentes na ciudá", polo que pa esta organización que defende la llingua y cultura asturianes, namás se pue entender la costruición d’un parking en Cimavilla "dende los presupuestos d’una “axenda pública” afitada nel inmediatismu socio-económicu y non na valoración de los vectores hestóricoculturales como fontes de cohesión comunitaria ya inclusive de riqueza económica a mediu y llargu plazu".

Fonte: Infoasturies

martes, 16 de agosto de 2011

La Xunta Pola da señales de vida, anque seya con una nota prensa solidaria...


La XPDLLA améstase a les crítiques al alcalde de Noreña

Pol conflictu alrodiu la moción n'asturianu presentada por Conceyu Abiertu por Noreña.

La Xunta pola Defensa de la Llingua Asturiana vien d'amosar el so refugu a los fechos asocedíos alrodiu la polémica torga a la presentación de mociones n'asturianu nel conceyu de Noreña.Pa la XPDLLA ye "un nuevu ataque a la llingua asturiana procedente de les files del Partíu Socialista", asina como denuncien "la situación d'indefensión y discriminación na que s'atopen los asturianos y asturianes que quieren facer usu del asturianu".

La organización recuerda que "l’asturianu ye la única llingua prohibida nel Estáu español, lo que convierte a los asturianos y a les asturianes nos únicos ciudadanos a los que se-yos niega la posibilidá d’escoyer la l’idioma nel que vivir", y entrúguense si ye esi el conceptu de pluralidá qu'emplega'l PSOE.

Poro, esixen una rectificación inmediata del PSOE de Noreña, y encamienta a los partíos políticos a amosar a les clares la soposición alrodiu del asturianu enantes de les elleiciones, debío que "si lo que se quier ye prohibir la llingua asturiana, ye un fraude presentase énte la cuidadanía como defensores de la so promoción y difusión".

Fonte noticia: Infoasturies

lunes, 15 de agosto de 2011

Sofitu denuncia un nuevu casu de represión


L'organismu antirrepresivu asturianu denuncia una nueva multa a un mozu independentista.

El motivu de la multa foi llevar la "AS" asturiana en llugar de la "E" española nel so coche, polo que la policía municipal d'Uviéu, tres llevar el so coche al depósitu, fizo al mozu pagar non sólo la multa pola retirada por mal aparcamientu, sinón tamién otra sanción de 90 euros impuesta pol "axente" númberu 610, qu'amás amenazó al mozu con nun dexalu sacar el coche d'ellí si nun quitaba la "AS".

Dende Sofitu denuncien que ye la primera vegada que la policía municipal impón una sanción d'esi tipu,ya que ye vezu que los responsables de diches sanciones seya la Guardia Civil española. Ye por ello que dende sofitu llamen a la "insumisión a España".

FONTE: Infoasturies

Darréu refuga la feria taurina de Begoña en Xixón


La organización de mocedá Darréu oponse dafechu a a “l’ espectáculu” sangrín y criminal que representa la tauromaquia.

Dende la organización de mocedá Darréu queremos amosar el nuesu refugu a cualquier tipu de maltratu o abusu escontra los animales, considerando que la tauromaquia que nestes feches se prautica na plaza de toros de Xixón ye una llaceria que se mos impón vergoñosamente añu tres añu.
Denunciamos el sofitu públicu que dende les alministraciones recibe dicha práutica selvaxe, calteniéndola asina artificialmente en territorios como’l nuesu país, Asturies, onde esiste un sentir mayoritariu d’indiferencia y refugu haza les corrides de toros. Asina, consideramos que la sovención y promoción de calter económicu ya institucional que dende les alministraciones públiques se-y da a esta actividá nun tien más enfotu que caltener n’Asturies un vezu foriatu y garráu pol nacionalismu español como ún de los sos munchos elementos uniformizadores.

Poro, queremos manifestar el sentíu aculturizador de les corrides de toros nel nuesu país, nun siendo más qu’un arma arroxadizo escontra la nuesa cultura y vezos propios, marxinaos y reprimíos polos mesmos que-y dan tol sofitu a la tauromaquia. Ye un insultu más de les instituciones haza’l pueblu asturianu, y una amuesa más de que’l sistema representativu vixente nun furrula dende’l mesmu momentu en que voluntá popular y voluntá política tan separtaes por kilómetros de distancia n’aspeutos como ésti, qu’entra dientru d’un ámbitu más global como ye la defensa y el respetu a los animales y,en consecuencia, a la ñatura, como un patrimoniu más de la nuesa nación y tan importante como’l restu de los que la componen.

En definitiva, dende Darréu queremos denunciar les dos vertientes negatives d’esta vergoñosa práutica taurina: el maltratu animal que supón y el so emplegu como arma d’aculturación, d’asimilación d’una cultura que nun ye la de nueso nin lo sedrá.

NON AL MALTRATU ANIMAL

NON A LA TAUROMAQUIA

ASTURIES ANTITAURINA


Fonte: http://www.darreu.org/

miércoles, 10 de agosto de 2011

Movilla, represor de Noreña

Enantes del plenu del 9/8/2011 los conceyales de Noreña atopáronse a la entrada del ayuntamientu con miembros de Conceyu Abiertu, que nun taben conformes col tratu pa col asturianu recibiu dende dichu ayuntamientu.

martes, 9 de agosto de 2011

Bloque-UNA considera llamentable’l sofitu de l’Alcaldesa de Xixón a la Feria de Begoña


Énte les declaraciones de Moriyón considerando la Feria Taurina d’El Bibiu como "sagrada"

Daniel Fernández como voceru de Bloque-UNA en Xixón llamentó fondamente’l sofitu incondicional de l’Alcaldesa Carmen Moriyón a la Feria de Begoña porque nin representa a les y los xixoneses nin tien sofitu popular dalgún na ciudá.

Dende Bloque-UNA indiquen que "lo únicu sagráu ye la democracia y la participación ciudadana en política, lo que’l sofitu sacramental de Moriyón a la fiesta taurina, declarándola sagrada en Xixón, muévese más nes pasiones personales que na racionalidá política".

Pa Bloque-UNA cada día ye más evidente qu’ "el xovellanismu defendíu por FAC nun yera más qu’una fachada pa estremase del PP, y una vegada pasada la guerra elleutoral tírase a la basoria igual que’l so asturianismu" y Fernández entruga si "dalgún militante de FAC lleó dalguna llínia escrita por Xovellanos, porque ye ún de los pioneros del movimientu antitaurín, esi movimientu que sigún l’Alcaldesa ye una moda pasaxera" y que tuvo otru gran referente en Xixón con "la fiesta antitaurina entamada en 1914 pola Sociedá Antiflamenquista Cultural y Proteutora de los Animales y les Plantes, qu’axuntó a miles de persones en tornu a l’abolición de los festexos taurinos".

Pero Bloque-UNA nun quier referise al pasáu p’amosar el calter antitaurín de la ciudá porque "toles encuestes amuesen que los asturianos polo xeneral y los xixoneses en particular son los ciudadanos del Estáu con más refugu a los toros" y que precisamente lo únicu que ta salvando la temporada taurina anguañu "ye la moda pasaxera d’un toreru, que tien una indisimulada campaña de sofitu de tolos medios de comunicación españoles, saliendo día sí y día tamién nos informativos, como forma pa salvar una fiesta que cada día ta n’hores más baxes, pero que quier salvaguardase de toes toes, como imposición de los piores valores de bizarría castiza, que dicía’l mesmu Xovellanos", llamentó Daniel Fernández.

Fonte: Aruelu.com

lunes, 8 de agosto de 2011

Conceyu Abiertu esixe la oficialidá p’acabar cola vergoñosa discriminación y represión llingüística.


En rellación a la decisión del alcalde de Noreña Cesar Movilla de excluyir d’un plenu una moción de Conceyu Abiertu por tar redactada n’asturianu desde Conceyu Abiertu por Noreña queremos manifestar lo que bien darréu:

Que los motivos argumentaos pol alcalde pa excluyir la nuesa propuesta afitándose en que l’asturianu nun ye oficial nun son válidos porque en cualesquier casu yá esiste una Llei d’Usu y Promoción de la Llingua Asturiana que nos sos artículos 3 y 4 (Llei 1/1998, d’usu y promoción del bable/asturianu) declaren, afiten y amparen el derechu de tolos ciudadanos al llibre usu del asturianu.

Que la propia Constitución Española fala tamién de ”Protexer a tolos españoles y pueblos d’España nel exerciciu de los drechos humanos, les sos cultures y tradiciones, llingües ya instituciones”; qu’el artículu 9.2 de la mesma Constitución obliga a los poderes públicos “a facer lo posible pa que la llibertá y la igualdá del individuu y de los grupos nos que s’inxer sean reales y efeutives”.

Que cola ratificación de la Carta Europea de les Llingües Rexonales o Minoritaries (BOPA de 15 de setiembre de 2001), l’Estáu español obligóse a la “facilitación y/o el fomento del emplegu oral y escritu de les llingües rexonales o minoritaries na vida pública”.

Teniendo en cuenta esto camentamos pergrave qu’en plenu sieglu XXI continúen sucediéndose en Noreña y Asturies ataques tan importantes a los nuesos drechos llíngüísticos ante los que quedamos desprotexios por unes lleis ambigües como la Llei d’Usu y la propia Constitución Española. Poro, queremos recordar el nuesu determín a favor de la oficialidá de la llingua asturiana. La oficialidá del asturianu ye imprescindible n’Asturies pa la proteición de los drechos llingüísticos de tolos asturianos y asturianes

El argumentu de que l’asturianu nun ye llingua oficial utilizáu por Movilla (FSA-PSOE) pareznos un insultu a la intelixencia de los asturianos pues nun debería ser necesario recordar-y que precisamente el partíu al que pertenez FSA-PSOE gobernó n’Asturies demientres más de 16 años amosando siempres la so refuga dafechu a la declaración del asturianu como llingua oficial. Tuvieron munches oportunidaes pa reformar l’estatutu y declarar “la oficialidá” pero nun lo ficieron.

Tocantenes a la decisión del alcalde de Noreña sólo nos queda la dulda de si arrespuende a una estratexa común de FSA-PSOE contra la llingua d’Asturies, si más bien la so decisión tien que ver col so nulu interés en tratar en sesión plenaria l’asuntu de la Ponte del Rebalde o si cenciellamente tratase de la so actitú personal reaccionaria de despreciu a los valores democráticos más elementales espresaos nesti casu escontra los falantes de asturianu lo que mos recuerda a la actitú del seleicionador de España sub-19 Ginés Melendez que-y quitó la bandera de Asturies al xugador del sporting Juan Muñiz. O una mecigaya de les tres opciones: Estratexa del PSOE, actitud antidemocrática y ningún interés en tratar la tema del Rebalde y el so desprecio personal a lo asturiano.

Ante estos fechos Conceyu Abiertu por Noreña ta estudiando les actuaciones llegales a tomar de forma inmediata pa en primer llugar impedir que dalgo asina se pueda repetir y pa posteriormente, col tiempu suficiente y de forma participativa, ellaborar unes ordenances municipales que regulen y garanticen definitivamente’l derechu d’usu del asturianu en Noreña.

Refugu de Conceyu Abiertu por Mieres al "Tranvía del Caudal"


Munchos son los servicios, qu’a los ciudadanos del Conceyu de Mieres presentose-yos como una necesidá pa una vida diaria más afayaiza, y polos que yá tan pagando unos impuestos peraltos. Estos servicios, non solo viéronse truncaos fai yá más d’un añu, sinon que’l Conceyu de Mieres, planea siguir malgastando dineru en proyectos que prometen un murnio final ensín tar entamaes entá les obres.

Fuera preocupase poles garantíes de bientar de les y los habitantes de Mieres del Camín y el restu pueblos que faen el conceyu, escomencipien midíes que tan lloñe de satisfacer a los mesmos.

Podemos entamar señalando la decayía de los servicios ufiertaos pola empresa de tresporte urbanu “EMUTSA” que malpenes fai diez años duplicábense y anguañu, hai poblaciones “qu'esfruten” d'un ampliu horario diariu de servicios, que resúmese en dos al día, y con ellos tienen d'arreglase, lo que prevoca que se faiga necesariu acudir a dellos tipos de vehículos nocivos pal mediu ambiente y costosos pal ciudadanu en xeneral.

Tolo anterior, esponémoslo a causa del nuevu proyeutu impulsáu pol Conceyu de Mieres, un tranvía que percorrerá a lo menos bona parte'l territoriu de la Cuenca del Caudal. Dende Conceyu Abiertu por Mieres amosamos la nuesa refuga a tala iniciativa, asina como la nuesa falta de credibilidá haza les promeses d'ameyoramientu del ayuntamientu, nun teníemos enantes col anterior mandatu'l PSOE y nun tenemosla agora col nuevu d'Izquierda Xunida. Poro, pesie a que l'alcalde arrenunciare al so sueldu, nin tan siquier faló de reponer un serviciu de tresporte públicu entá útil como son los autobuses “EMUTSA”, que nun ta habilitáu pa ser económicamente granible, sinon pa facer d'él un serviciu por y pal conceyu.

Asina, dirixiéndonos a tolos conciudadanos, queremos convidar a toles instituciones y/o asociaciones, yá seya de calter social, cultural, vecinal, de mocedá, etc. que pongan toles sos fuercies n'intentar aparar esta iniciativa ensín xaciu y negativa pa les arques del conceyi, asina como pa los bolsiellos de tolos mierenses de tolos pueblos del municipiu.

Poro, dende Conceyu Abiertu, dicimos non al tranvía, y pedimos un gastu resposanble y respetuoso de los nuesos impuestos, qu'a nós si mos cuesta ganalo y nós queremos decidilo.

viernes, 5 de agosto de 2011

Piscines d'Avilés: otru incidente más


El pasáu miércoles 3 d’agostu de 2011, na piscina municipal d’El Quirinal (Avilés), alrodiu les 11:00 h., entamó a sentise un fuerte olor a disolvente al traviés de los conductos de ventilación de la piscina. El delegáu de prevención compreba que l’equipu caltenimientu ta pintando con pintura y disolvente nel arrodiu los conductos de ventilación. D’esta manera, taben saliendo pel aire acondicionáu los efluvios de productos tósicos (traemos a l’alcordanza que, de cincu monitores de natación de la Fundación Deportiva, dos carecieron una Incapacidá Temporal de 6 meses y otros dos una Incapacidad Absoluta, darréu una intosicación por cloru nel so puestu trabayu). Los trabayadores punxéronse en contáutu cola Téunico de Prevención del Ayuntamientu y el Xerente de la Fundación Deportiva Municipal del Ayuntamientu d’Avilés, alertándolos del pelligru pa la salú pública y llaboral qu’apareyaben los fechos que taben sucediendo, ensin que dengún de los dos mencionaos adoptare denguna triba de midía pa igualo.

La Corriente Sindical d’Izquierda quier alertar a tola ciudadanía d’Avilés y a cuantes presones visiten la nuesa ciudá, del pelligru que puede apareyar pa la so salú la utilización de les piscines municipales del Ayuntamientu avilesín. Son abondos los antecedentes:

-Payares de 2008. Piscina municipal de La Madalena (Avilés): produzse una intosicación por cloru de toles/os monitores municipales que s’atopaben trabayando nesta piscina, asina comu d’otres/os trabayadores y población usuaria. El resultáu de tala intosicación foi de 2 monitores, d’una plantía de 5, con lesiones inreversibles qu’apareyaron la so incapacidá total pal desendolcu’l so trabayu, con una amalaúra de por vida.

-2009. Piscina Municipal de La Madalena (Avilés): produzse otra intosicación por cloru de 2 de los monitores sobrovivientes a la primera.

-Llunes 20 de xunu de 2011. Piscina municipal d’El Quirinal (Avilés): les/os monitores y socorrista de la piscina avisan d’un fuerte olor a cloru y d’irritaciones en güeyos y gargüelu. El martes 21, a les 18:15 h., eses/os trabayadores tuvieron de desaloxar la piscina demientres 1 hora porque se paró tola maquinaria: dosificadores de cloru, estractores d’aire, les máquines del agua... Too dexó de furrular. Naide los avisó, los servicios de prevención nun acudieron, el serviciu caltenimientu nun dio desplicaciones, nin el xerente, nin el direutor deportivu nin el cordinador de piscina. Naide fizo actu presencia y tuvieron de ser les/os trabayadores quienes se decataren de la situación y punxéren-y igua.

Toos estos fechos fueron y siguen siendo debidamente denunciaos énte les autoridaes municipales, sanitaries y xudiciales, asina comu énte la Ispeición de Trabayu y Seguranza Social, pero tovía güei la Fundación Deportiva y los sucesivos conceyales de deportes siguen ñegando les intosicaciones y sacando pechu polo bien que ta too: nun se sancionó a naide, nun se fizo responsable a naide y, a la fin, nun se fizo nada.

Les/os trabayadores municipales entrúguense si va haber que llamentar dalguna muerte pa que se manguen midíes.

Demientres, dende la CSI aconseyamos a tola ciudadanía d’Avilés y a cuantes presones visiten el nuesu conceyu, que garren toles precauciones afayadices cuandu utilicen les piscines municipales del Ayuntamientu d’Avilés.

jueves, 4 de agosto de 2011

Nepal, un rayu d'esperanza alredor del Himalaya.


La Republica de Nepal yá tien oficialmente'l calter de Socialista, con toles sos consecuencies según aseguren dende'l país asiáticu. Tres munches décades de llucha continua'l Pueblu Nepalí, únicu suxetu políticu d'esti pasu alantre, algamó lo que siempres propunxose, la so lliberación nacional y social.

Nepal, que pasó por delles guerres foi demientres más de mediu sieglu una colonia más del Imperiu Británicu. Los nepalís algamaron la so condición d'Estáu soberanu en 1953, pero eso nun sinificó muncho pa la calidá de vida de la mayoría social del llugar. Tres la retirada del imperialismu británicu los nepalis nun teníen nin agua, nin lluz y dificilmente comida. Les condiciones llaborales yeren miserables y el poder del país tuvo siempres en manes de persones que namái queríen esplotar al so pueblu pal so beneplácitu.

Asina, dempués d'años nesta situación entamó a tener pesu ente'l pueblu'l Partíu Comunista nepalí, d'orientación maoista. Colos llabriegos y los pocos obreros del país tirando del proyeutu revolucionario ésti movimientu popular alquirió gran sonadía ya importancia. L'Estáu nepalí facía col so pueblu lo que-y petaba, tratando al mesmu como un suxetu coleutivu que debía prometer eterna esclavitú a los privilexiaos foriatos y de Nepal. El pueblu, fartu, radicalizó la so protesta organizando una guerrilla alredor del Partíu Comunista.

La llucha armada entamó desixiendo más bien midíes llaborales-sindicales dignes pa la población y pali que pali les peticiones fueron maurando y siendo más de calter políticu y de confrontación colos distintos reis y gobiernos. El Partíu foi llegando a más xente y la guerrilla pasó a un segundu llugar, pasando a desactivase oficialmente de forma temporal. Aportaron unos comicios eleutorales onde arrasó'l movimientu comunista y anguañu el Rei foi despoxáu de tolos sos porgüeyos, nun pue salir del país y tendrá que trabayar como un ciudadanu más, a lo menos, hasta que'l pueblu xulguelu públicamente. Fai unes selmanes Nepal, ensín mirar atrás, declarose Republica Socialista y nacionalizó tolos sos muerganos de produción. Tamién coleutivizó tola tierra del país ya implantó un modelu llaboral basáu nel cooperativismu.

Nepal, ye dende hai unes selmanes un referente pal que mirar tolos pueblos primios. Una vegada más vemos como un pueblu, que foi un clamor soberanista contra un imperiu foriatu nun quedase na lliberación nacional. Un pueblu más qu'algama la so soberanía nacional y camina sele pero irguío dica'l socialismu, y n'ello tan. Miremos pa Nepal, tolxs asturianxs. Solo col nuesu sacrificiu, col del pueblu como suxetu políticu y social coleutivu sedremos quien a algamar daqué. Faciendo proyeutos estrella ca 4 años nos comicios eleutorales, xugando a la “real-polític”, asumiendo zunes por que sí, o alloñandose de los proyeutos populares nun vamos a dengún sitiu. Cola movilización, el compañerismu, el patriotismu, el socialismu y el trabayu día si día tamién a lo meyor si que vamos a dalgún llau, polo menos nun sedrá por que nun lo intentemos.

¡ PUXA NEPAL LLIBRE Y SOCIALISTA !

¡ PUXA LA LLUCHA DEL PUEBLU TRABAYADOR !

miércoles, 3 de agosto de 2011

Nueu insultu a la dignidá nacional asturiana


L’agraviu de la sub-19 amuesa una vuelta más la necesidá de desendolcar seleiciones esportives asturianes


L’Asociación Cultural N’Ast nun pue caltenese callada énte l’agraviu a la bandera asturiana rializáu por cuenta de la cellebración de la victoria de la seleición española de futbol sub-19 na Eurocopa. El fechu de que dempués de la victoria ún de los xugadores, el sportinguista Juan Muñiz Gallego, centrocampista col númberu 18, colocara una bandera asturiana al costazu mentes festexaba l’ésitu esportivu, y que ésta-y fora arrincada d’un tiron y escondía nel banquín ensin mediar pallabra por Ginés Meléndez, l’entrenaor español, nun pue pasar desapercibíu nin ser consideráu una anécdota insignificante.

La rialidá ye que preste o non, tamos énte un nuevu reflexu del conflictu nacional asturianu, comu consecuencia de que’l nacionalismu españolista dominante nun tolera que los asturianos espresen siquier de manera sentimental la so identidá nos ámbitos internacionales. Asina’l nacionalismu español torna a manifestar una vegada más el so auténticu calter autoritariu y escluyente haza cualesquier manifestación identitaria estremada de la so amenorgada cosmovisión.

Nun podemos escaecer qu’ésti nun ye un fechu aislláu, yá que nun hai muncho tres ganar en Barcelona la Champions, Villa y Pedro foron especialmente criticaos por portar les banderes d’Asturies y de Canaries respeutivamente.

Poro dende N’Ast vemosmos moralmente obligaos a manifestar el nuesu escándalu asina comu a desixir el plenu y normal desendolcu de les seleiciones esportives asturianes con toles consecuencies porque ca vuelta ye más evidente que nun hai espaciu pa lo asturiano nel marcu del esporte español.

martes, 2 de agosto de 2011

Y nun queremos selo...

Preferimos ser bona xente decidiendo que ser llibremente.

Agresión nacionalista y facista española.



Ayeri, otra vuelta tornamos a asistir a una nueva humildación españolista contra Asturies y nesti casu foi nun contestu bien mediáticu: la cellebración de la seleición española sub 19.

L'entrenador, el mesmu que dexó a Arizmendi pasiar la bandera franquista del "Águila de San Juan", arramplo cola bandera costitucional asturiana que portaba Xuan Muñiz, xugador del Sporting. El seleicionador Melendez asina retira la bandera asturiana énte les cámares de tol mundiu, nuna actitú agresiva y d'ofendiu. Ye una imaxe simbólica, pero ye'l fiel espeyu de lo que ye España, cola so supuesta "pluraridá autonómica" o "rexonal". O más bien l'Estáu imperialista que ye eso d'España y como prime a dellos pueblos dientro les sos coraes abstractes.

El conflictu Asturies-España carez de vía política organizada dafechu pero ca día que pasa ye más evildente'l mesmu y como España viola'l drechu a tomar un determín al nuesu pueblu.

Y pa iguar lo que pasó anuechi que meyor qu'una Asturies dixebrá y una seleición nacional asturiana de fúbol sub-19...