martes, 8 de febrero de 2011

Irregularides nel parque eólicu de Carondio


La Coordinadora Ecoloxista d'Asturies (CEA) vien de pidir al Conceyu d'Ayande que paralice darréu'l parque eólicu de Carondio por nun tener la llicencia municipal d'obres definitiva. Según alvierte la organización ecoloxista, esti parque vien construyéndose dende va cuasique un añu y tovía nun tien "la llicencia municipal del Conceyu pa los molinos d'una altura de 106 metros".

Pa la CEA ye increible que'l Conceyu "permita la construcción de les bases de les torres, al nun tener esa llicencia, que ye perceptiva, polo que resulta clara la complicidá del consistoriu cola empresa eléctrica". El parque «afectó de manera notable a la Carreiriega de los Gallegos, un camín históricu y bien protexíu d'alcuerdu col artículu 61 de bienes protexíos pola Llei 1/2001, de 6 de marzu, de Patrimoniu Cultural del Principáu d'Asturies», denuncien los ecoloxistes que "llamenten" el papel del Conceyu y del Gobiernu permitiendo "la destrucción del nuestru patrimoniu arquelóxicu nuna zona d'altu valor natural que diba quedar afectáu de facese'l parque eólicu previstu, pa beneficiu esclusivu d'una empresa eléctrica nesti vendaval eólicu que percuerre l'occidente asturianu".

Fonte: Infoasturies