martes, 5 de abril de 2011

Cencerrada popular escontra’l pensionazu


Los sindicatos Corriente Sindical d’Isquierda (CSI) y Sindicatu Unitariu y Autónomu de Trabayadores de la Enseñanza (SUATEA) convoquen una cencerrada popular escontra’l nomáu "Pensionazu", que va entamar el prósimu xueves 7 d’abril, a les 19:00 h. n’El Parche d’Avilés (plaza del Ayuntamientu), y que va percorrer les cais céntriques de la ciudá pa desixir, delantre de les sées del PSOE, el PP, la Patronal, la Banca, y les centrales sindicales CCOO y UXT la retirada de la Reforma les Pensiones.

Dende los sindicatos CSI y SUATEA denuncien que "tamos nel paru o trabayando una montonera d’hores por un sueldu que nun llega a la fin de mes. Abondes vegaes, trabayamos más hores de les que tamos aseguraes/os y por menos perres de les qu’afita’l conveniu. Tamos perdiendo les viviendes porque nun podemos pagar les hipoteques o los alquileres. En toles families hai dalguna presona en paru (cuandu non tola familia), malpenes podemos pagar el recibu la lluz, el gas o l’agua y, en xeneral, ca vegada trabayamos más, pagamos munchu más y cobramos menos". Dambos sindicatos aseguren que "rebaxaron o conxelaron los sueldos, xubieron los precios, retayaron les aídes societaries, tán desmantelando y privatizando servicios públicos como la sanidá, la educación o l’asistencia a mayores y discapacitaes/os y quitáron-yos l’aída a los paraos y paraes ensin ingresos". Por si fuere pocu, "ficieren una Reforma Llaboral qu’abarató’l despidu, fizo medrar el paru, precarizó’l trabayu y les condiciones llaborales y, a la escontra de lo que mos dicíen, amenorgó los contratos indefiníos y aumentó los temporales. Pero non contentos con ello, apretáronnos más les tuerques y obligáronnos a xubilanos a los 67 años con pensiones de miseria. Y tóu ello fízolo’l Gobiernu del PSOE xunta la Banca y la Patronal, cola complicidá del PP. Y amás d’ello, cuntaron col consentimientu de CCOO y UXT. Estos dos sindicatos sabrán por qué lo ficieron y a cambiu de qué (ye un secretu a glayíos: a cambiu de sovenciones, lliberaos y puestos de privilexu en tolos estamentos económicos y llaborales)". Afiten que tóu esto ye por culpa de la cris, porque yá nun hai perres, "pero paez ser que nun hebio cris p’apurrí-y a la Banca Privada 150.000 millones d’euros. Tampoco paez haber cris pa les 35 mayores empreses del Estáu, qu’algamaron en 2010 más de 50.000 millones d’euros de beneficiu, parte de los cuales gastáronlos en facer despidos, EREs y reconversiones de plantía. Y agora, demientres el Gobiernu’l PSOE anuncia retayos sociales nuevos, pretenden "saniar" les Caxes d’Aforros con más dineru públicu pa dempués privatizales (yá lleven inyeutaos 11.200 millones y entá tan iguando otra remesa)". Pa la Corriente y el sindicatu d’enseñanza, la cris remánase como disculpia. "Disculpia pa esplotar, pa privatizar, pa precarizar, pa despedir, p’arruinar a los y les trabayadores, p’apretar cá vegada más la bota sobro los nuesos pescuezos, en resume, pa facer que los ricos seyan más ricos y los probes más probes". Pa estos sindicatos, n’Asturies llevamos en cris permanente los caberos 30 años y hai xeneraciones enteres que lleven tola so vida nuna cris de la que nun son a salir. Poro, con motivu de les elleiciones conceyeres y nacionales del prósimu 22 de mayu, llamen a movilizase, porque "nun podemos siguir asina. Tenemos de para-yos los pies. Hai de salir a la cai a amosa-yos el nuesu descontentu. Tenemos de salir a lluchar escontra ellos, porque enxamás mos van dar nada poles bones; enxamás mos van dar nada si nun-yos lu arrancamos". Amás, aseguren qu’entamarán una consulta popular sobro la Reforma les Pensiones y la política económica y llaboral del Gobiernu, "pa que s’escuche la braera voz de los y les trabayadores". Dicha consulta entamarase na capital el sábadu 14 de mayu, con una gran movilización xeneral de trabayadores y ciudadanos/es que-yos faiga "pescanciar a ’los que manden’ (políticos, banqueros, grandes empresarios...) que les coses nun pueden siguir igual, qu’esta vegada nun val prometer y nun cumplir, qu’esta vegada namás tienen dos alternatives: gobernar pa los y les trabayadores y los ciudadanos/es o colar pa casa".

Fonte: Aruelu.