martes, 19 de julio de 2011

La esmolecedora situación del movimientu de reivindicación llingüística


Va tiempu que m’esmolez la situación que vive’l movimientu de reivindicación llingüística n’Asturies. Nun hai estructura, nun hai militancia y nesto tien muncho que ver una mala xestión del asuntu, de la que somos responsables toos, unos por acción o inacción, otros por callar, cola meyor de les intenciones toos, nun lo pongo en dulda.
Les organizaciones reivindicatives nun funcionaron más que pa deunciar graves ataques en momentos puntuales, pero nunca pa crear ambiente reinvindicativu o sacar propuestes a la sociedá. Vamos siempres per detrás y claro, llévennos la delantera. Son poques les escepciones. Amás, el PSOE consiguió que se reproduciera’l so discursu y ponenos a toos, o a cuasi toos, a falar de la “non obligatoriedá”, cayendo nes trampes más tontes y unviado un mensaxe erronéu a la sociedá.

Nos conceyos, la reivindicación directamente nun esiste. En Xixón, por exemplu y yá que ye’l casu que meyor conozo, nun se fizo un seguimientu del incumplíu “Plan de Normalización Llingüística”, y de les obviaes “Ordenances d’usu y promoción del asturianu”, tampoco opinó naide, pa bien o pa mal, del llabor de la Oficina de la Llingua. Convocóse a una comisión de siguimientu, qu’ensin funciones de nengún tipu aconceyó delles vegaes a lo llargo la llexislatura, ensin que naide dixera nada, ensin que se conocieren les sos conclusiones.
Toi cansáu d’oyer “a ver cuándo nos dan la oficialidá”. Esi usu del verbu “dar” esmolezme fondamente. Naide nun mos “va dar” nada, naide va regalanos el reconocimientu d’esi drechu de tolos asturianos de que l’asturianu seya oficial. Esti posicionamientu pasivu esmolezme. Cambiemos esi verbu pasivu por un verbu activu y en primer persona “vamos consiguir la oficialidá”.
Per otru llau, la oficialidá ta siendo precisamente la escusa de munchos (probablemente inconsciente) pa quedar paraos. Pa dalgunos paez que namás tenemos qu’esperar sentaos a que “mos dean la oficialidá”, pa que de sópitu tean solucionaos tolos problemes de la llingua asturiana. La oficialidá nun va ser nenguna varina máxica, la llucha pola ofiacialidá tien de dir en paralelu a una llucha pola normalización, entá más importante y necesaria, enantes y dempués d’algamar esi estatus llegal pal asturianu. Cada pasu va dase con munchu sudu y pocos aplausos y asina va ser siempres, ye un camín pindiu y llamargosu.
Echo de menos más atención a la normalización llingüística, más reivindicación a la empresa y los medios de comunicación privaos (como sí asocedió nos años 70 y 80 con ciertu ésitu), menos crítica a la Conseyería de Cultura (la única que fai dalgo, anque seya mínimu pol asturianu) y más a otres conseyeríes, toles demás, que nun ficieron nada pol asturianu y pueden facer permuncho.

L’arrequexamientu lleváu alantre pol PSOE, convirtiendo al asturianu nuna cuestión esclusivamente cultural, folclórica si se quier, foi siguida pol movimientu asturianista con ganes, como’l burru que sigue la cenahoria. Tenemos de cambiar estos vezos ente toos si queremos entamar a construyir nós el discursu llingüísticu.
Los cambios políticos abren espectatives nueves pa la nuesa llingua, pero nun van venir soles, nunca “van danos” la oficialidá, sinón que tendrémos que-yos la arrancar de les manes, peleala. Una bona propuesta pa entamar ye pidir que’l nuevu organigrama de Gobiernu lleve la Viceconseyería de Política Llingüística a depender de la Conseyería de Gobiernu, de forma que se convierta nuna ferramienta tresversal na alministración y non nuna oficina qu’espida sovenciones pa publicar llibros, películes y campañuques de mil temes que nun tendríen porque financiase col presupuestu dedicáu a la normalización. Otra, esixir un riguru cumplimientu de la Llei d’Usu, promesa electoral del partíu anguaño nel Gobiernu d’Asturies.
De la mesma forma que m’esmolez esta situación, préstame ver l’acción llevada alantre por munches persones, cada día, protestando, reclamando los sos drechos, entamando iniciatives col envís de normalizar l’asturianu, dende’l silenciu munches vegaes. Tenemos d’aprovechar a estes persones y echar a andar iniciatives colectives que seyan útiles pa garantizar el futuru del asturianu y tenemos de facelo yá. Nun podemos siguir caminando pel camín que mos marquen otros. Ye’l momentu de convertir l’esmolecer n’acción. ¿Sedremos quién?

Inaciu Galán y González

¡¡¡¡ OFICIALIDÁ DARRÉU !!!!



L'asturianu o bable ye la llingua llariega d'Asturies. Depués de cuasi cuarenta años de llucha cívica per parte'l Pueblu Asturianu reclamando esti drechu y de pasinos de formiga tien de ser el momentu anguañu de dar el pasu final. Esti idioma solo va normalizase col estatus oficial que-y cuerrespuende depués de sieglos d'agresiones y manipulaciones hestóriques y culturales contra'l nuesu país y la identidá cultura de nueso.


L'actual presidente del gobiernu d'Asturies, que diz representar al país asturianu testualmente tien la responsabilidá de finar con esti conflictu d'una vegada. Si tanto cree nel país de los asturianos que normalice esti país. Pues los países normales tienen la so propia llingua reconocía pola so propia llei...


Por dignidá, cultura y drechu: ¡L'ASTURIANU LLINGUA OFICIAL YÁ!