martes, 31 de julio de 2012

Conceyu Abiertu por Mieres apoya les prósimes fuelgues de los y les trabayadores de ThyssenKrupp Norte

Les persones qu'integramos Conceyu Abiertu por Mieres queremos amosar el nuesu sofitu públicu a la xusta llucha de les y los trabayadores de ThyssenKrupp de Mieres, llucha que va tomar forma en siete xornaes de fuelga n'agostu y en cuatru en setiembre, convocatories entamaes dende'l Comité d'empresa, onde tienen representatividá los sindicatos CSI, CCOO y UXT.

Les convocatories de fuelga na empresa vienen empobinaes pola unilateralidá de la direición de la empresa y la so ensín razón a la hora de relacionase col coleutivu trabayador y algamar alcuerdos con dichu coleutivu. Concretamente'l conflictu reside en que la direición de ThyssenKrupp nun quier algamar un alcuerdu consensuáu nel conveniu coleutivu colos representantes de la plantiya depués de meses d'intentos. Esta situación ta poniendo en pelligru 301 puestos de trabayu pola mor de la incapacidá de la direición de tolerar los mínimos pidimientos de meyora de les condiciones llaborales que piden los trabayadores.

Dende Conceyu Abiertu por Mieres apoyamos la dinámica reivindicativa d'estos/es trabayadores pol simple fechu de que ta espeyándose la posición zarrada al diálogu y la intercomunicación na empresa per parte la direición. Consideramos la posición de los y les dirixentes de ThyssenKrupp como inmovilista y autoritaria. Amás, depués d'algamar nel exerciciu 2010-2011 un beneficiu record de 4,7 millones d'euros la posición de la direición empresarial ye tovía menos comprensible.

Pa finar, queremos tresmitir fuercia y munchu enfotu a los y les trabayadores nes vinientes xornaes y llamar a la ciudadanía mierense y tamién del conxuntu de les cuenques a la solidaridá cola llucha d'estos. Tamién queremos recordar qu'hai unos meses la empresa plantegó un ERE nesta factoría que tuvo qu'echar atrás gracies a la llucha que desenrrolló'l coleutivu trabayador, lo qu'amosó que la llucha popular y obrera ye l'únicu camín p'aparar el desmantelamientu llaboral y social que vivimos anguañu en Mieres, les cuenques y el restu d'Asturies.

Estrayíu de la páxina web de conceyu abiertu.

Actu pola Educación Pública

lunes, 30 de julio de 2012

Conceyu Abiertu por Uviéu pide cordura na xestión del sistema de llimpieza y les sos sanciones

Va unos díes la sociedá uvieína tuvo conocimientu de l’amenaza del Ayuntamientu a una vecina de la cai Xeneral Elorza con una multa que podría dir ente los 45.001 euros y los 1,7 millones d’euros. El “delitu”, según despliquen dende la Casa Conceyu, ye l’atropu por parte de téunicos de mediu ambiente d’una bolsa de basoria pasaes les nueve de la mañana, atopando nel so interior documentos identificativos de la citada vecina. Poro, dende la Conceyalía de Llimpieza, decidieron abrir un espediente sancionador, que cola aplicación de la Llei de Residuos puede desembocar nuna multa coles cifres enantes citaes.

Dende Conceyu Abiertu por Uviéu consideramos, en primer llugar, qu’una sanción de tal calter por una bolsa de basoria na cai a deshora ye absolutamente inxustificada, y más tres les afirmaciones de la ciudadana afitando qu’ella dexó la bolsa depositada nel cubu. Y lo cierto ye que los cubos de basoria tan espuestos a la manipulación de terceres persones, polo que creyemos qu’en nengún casu se debe aplicar una sanción de tales proporciones, que dende esta formación nun atalantamos dende otru sentíu que’l meramente recaudatoriu. Nun siendo d’otra manera, ye un auténticu sinsentíu una posible aición penatoria de tal calibre por esi fechu. Ta mal dexar la basoria nel primer sitiu que s’atope, pero llamamos a la cordura de les partes implicaes.

Per otru lláu, nel mesmu conceyu nel que se pretende aplicar una “multa exemplar” a una ciudadana por un fechu aislláu, vemos cómo s’acumulen vertederos improvisaos y en plenu crecimientu en zones como San Cloyo, ensin que nin FCC –la concesionaria de les llabores de llimpieza- nin l’Ayuntamientu faigan nada pesie a les continues quexes vecinales. Ehí debería poner la Conceyalía de Llimpieza los sos esfuerzos y consideraciones, nes quexes vecinales, y nes deficiencies que FCC ufre na so xestión.

Tamién vemos cómo la filosofía de llimpieza nel nuesu conceyu ta basada en que “si se mancha más, ponemos más medios pa llimpiar”, en llugar de buscar métodos de calter educativu o incluso un replantegamientu d’aquellos aspeutos que seyan poco eficaces o meyorables, ello xunío al inevitable rasgu mercantil que toma esta estaya dende’l mesmu momentu que ye privatizada.

En definitiva, pidimos menos amenaces mediátiques de sanciones desproporcionaes, y encamentamos a la Casa Conceyu a escuchar les denuncies y suxerencies de la ciudadanía p’algamar una ameyora del serviciu, que pa entamar debería ser desendolcáu y xestionáu pol propiu conceyu, y non por una concesionaria privada.

La represión continúa

Dos militantes de la CSI de la Cuenca’l Narcea, son víctimes de la represión, acusaos de participar en cortes de carretera demientres el conflictu de la minería.

A ún d’éllos impónse-y una sanción que puede dir de 300 a 30.000 euros.

El segundu tien de declarar el prósimu xueves, 2 d’agostu, a les 10:00 h., nos xulgaos de Tinéu, imputáu por dellos delitos derivaos de la so presunta participación nun corte carretera. Dase la circustancia de que yá ye la segunda vegada qu’esti trabayador ta imputáu polos mesmos motivos.

Pa la CSI resulta vergoñosu que la ¿Xusticia? S’ensañe colos y coles trabayadores que namás defenden la so forma de ganase la vida, demientres los braeros culpables d’esta cris continúen enriqueciéndose.

Andecha propón oficialmente retirar el financiamientu al Festival Aériu

Remembra a IU que ye corresponsable d'esta eshibición d'españolismu militarista y entrúgase si vieron la lluz, si carecen “Alzheimer” o a cencielles ye hipocresía.

Andecha Ástur presentó nel rexistru del Conceyu de Xixón una propuesta por que se retire'l financiamientu municipal a la exhibición d'españolismu militarista que supon el Festival Aériu”, recordando que la nuesa ciudá tien el desafortunáu privilexu de ser la primer ciudá europea bombardeada dende l'aire (1934, pol Exércitu de la República española) y de siguío pol Exércitu franquista español (1937), lo que sedríe motivu abondo pa evitar asemeyáu tipu d'actos.

Nel mesmu senu arguméntase qu'esta triba d'espectáculos non promueven precisamente una cultura de la paz y la solidaridá internacional, sinón qu'emponderen l'eshibicionismu de la fuercia militar, amarutando n'acrobacies y espectáculu’l gran poder destructivu de les armes que díi ente díi maten neños y presones inocentes. Por nun citar tamién, nel actual contestu económicu, la necesidá d'amenorgamientu de gastos públicos superfluos.

Per otra parte y énte les declaraciones del voceru del grupu municipal d'Izquierda Unida nel Conceyu de Xixón, Jorge Espina, pidiendo la retirada del financiamientu municipal al Festival Aériu, Andecha Ástur quier recorda-yos que tal exhibición d'españolismu militarista tien el so orixe baxo’l gobiernu de coalición PSOE-IU, y entrúgase si'l so cambiu d'opinión débese a que por fin se dieron cuenta de que, nes sos propies pallabres “los aviones que desfilen nun sirven precisamente pa partir carambelos ente los neños sinón pa participar en guerres onde s'asesina a presones”, si carez dalguna alteración de la memoria, o si a cencielles ye una de les avezaes amueses d'hipocresía a les que mos tien acostumaos esta organización.

Seya que non, Andecha Ástur propón-y a IX qu'en cuentes de faer declaraciones fatues a los medios de comunicación, facilite que llegue al Plenu la nuesa propuesta de retirada de financiamientu, o nel so defeutu que presenten una propia.

FONTE: www.andecha.org

domingo, 29 de julio de 2012

Conceyu Abiertu por Samartín esixe la dimisión del alcalde del conceyu Enrique Fernández

L'alcalde del Conceyu de Samartín del Rei Aurelio, Enrique Fernández, del PSOE, cobró 182,57 euros en conceptu de dieta completa y media dieta de manutención de gastos pol simple fechu d'acudir a la manifestación que se cellebró en Madrid el pasáu 11 de xunetu en sofitu del futuru del carbón. L'escándalu salió a la lluz nun plenu municipal y paez ser qu'otros ediles del PSOE de la Cuenca del Nalón pudieron percibir tamién dineru por esti fechu.

Dende la formación de ciudadanos Conceyu Abiertu por SMRA queremos espresar la nuesa refuga y la nuesa indignación con esta situación. Atalantamos que l'actual alcalde de SMRA Enrique Fernández debería pidir perdón públicamente a los nuesos vecinos y dimitir darréu como forma de rectificar de forma honesta. Poro, pidimos públicamente la dimisión d'Enrique Fernández como alcalde del municipiu depués d'esti casu de corrupción y escándalu éticu. Amás too paez indicar qu'esti alcalde cobró'l so salariu'l 18 de xunetu, día nel qu'en les cuenques mineres teníemos convocada una fuelga xeneral, que por ciertu esti señor dixo sofitar.

Mentantu los trabayadores faen enzarros baxo tierra nos pozos, prenden barricaes, caminen hasta Madrid o s'arriesguen a vivir multes y represión, estos señoritos del PSOE dicen defender el carbón asturianu pero siempres y cuando enllenen el bolsiellu propiu. Esti fechu vergoñosu y tarrecible ye un claru espeyu de la postura del PSOE respectu al problema del carbón o cualesquier conflictu social, onde dicen tar dellau del pueblu y los trabayadores pero siempres tira-yos más la defensa del estáu de les coses, la represión a los movimientos sociales y la corrupción. Dende Conceyu Abiertu por SMRA caltenemos que la presencia d'esti señor en Madrid ye un simple xestu oportunista y partidista y queremos tresmitir al nuesu alcalde que les lluches populares apóyense día a día y col corazón, con altruismu y sinceridá.

Fonte: www.conceyuabiertu.org

Conciertín en Begoña en L'Ayalga

Los datos de la EPA confirmen la necesidá d'una rempuesta clara ¡Fuelga Xeneral!

La crudeza de los datos de la Encuesta de Población Activo desixe rempuestes clares y contundentes por parte del Pueblu Asturianu, cola convocatoria d'una fuelga xeneral d'ámbetu nacional comu primer midía

Losnuevos datos reflexaos na Encuesta de Población Activo referentes al segundu trimestre del añu reflexen la esistencia de 101.800 asturianos en paru, una tasa de desemplegu al 21,03%, y con una tasa de paru xuvenil que yá ye del 44,21%. Per otra parte49.100 asturianos lleven nel paru más d'un añu, y de esta cifra, 24.600 devasen yá los dos. El xorrecimeintu del paru n’Asturies ye del 22,51% interañal.

La crudeza d'estos datos, el comencimientu de que nun son los piores que vamos conocer y la certidume de que los mesmos respuende, non yá a una situación económica concreta sobro la qu'habría enforma que dicir, sinón a les resultancies d'una política sociu-económica aplicada pol Estáu español n’Asturies empobinada a la destruición de texíu sociu-económicu asturianu y que vieno provocando'l paru, la precariedá d'emplegu y la emigración forzada de decenes de miles d'asturianos, inclusive nes dómines de “España va bien”, confirma la necesidá urxente de rempuestes clares y contundentes por parte del Pueblu Asturianu, motivu pol qu’Andecha Astur propón, comu primer midía, la convocatoria d'una fuelga xeneral d'ámbitu nacional.

P’Andecha Astur pretender negar una realidá tan obvia, siguir defendiendo la seutorialidá de les lluches y negase a integrar el conxuntu de conflictos llaborales esistentes nel nuesu país dientru d'un marcu específicu asturianu non solo costitúi una torpeza, sinón qu'a la vista d'evidencies como les que nestos momentos amuesa la EPA, suponen una complicidá coles polítiques d'esterminiu que ta aplicando l'Estáu español n’Asturies y que tán llevando a una situación de sufrimientu y precariedá inaceptables.
 FONTE: www.andecha.org

sábado, 28 de julio de 2012

Conceyu Abiertu por Mieres pide que'l plan d'axuste en Mieres afeute a los partíos políticos del Ayuntamientu

Depués de saber que'l gobiernu llocal de Mieres d'Izquierda Unida, nun va recurrir la sentencia qu'anula l'axuste o recorte municipal sobre trabayadores del conceyu entendemos dende Conceyu Abiertu por Mieres que s'abre un nuevu escenariu. El recorte comtempla 1,4 millones d'euros al añu nos sueldos de los y les trabayadores municipales. Esti recorte nun afeuta a les perceiciones que reciben los partíos políticos con representación nel conceyu, pesie a que l'axuste llocal ye yá de 3'2 millones d'euros.

Dende Conceyu Abiertu por Mieres queremos tresmitir la nuesa posición respeutu a esta situación, la cual mos paez vergoñosa. Agora que paez que sindicatos y alcaldía van sentase p'aldericar camentamos qu'hai de dexar delles coses clares si queremos tener una solución equilibrada al gran problema qu'hai en Mieres. En primer llugar, dexar claro qu'entendemos que ye necesariu que l'axuste afeute de forma direuta a los grupos políticos que tienen representación nel conceyu y nun recaigan sobre los trabayadores públicos municipales. Dende que'l gobiernu d'Anibal Vázquez algamó l'alcaldía de Mieres ta pidiendo sacrificios a los emplegaos y emplegaes del Ayuntamientu y la ciudadanía pero entá nun tocaron los sos sueldos. Poro, Conceyu Abiertu por Mieres considera esti proceder del gobiernu d'IU como unilateral, egoista y pocu éticu nos tiempos que cuerren, y más sabiendo la situación económica y social del Conceyu de Mieres.

Tamién, dende Conceyu Abiertu por Mieres queremos espresar qu'atalantamos necesariu redefinir un plan d'axuste nel conceyu onde los especuladores y los grupos políticos seyan los principales afeutaos, entendiendo la so gran responsabilidá na situación d'endeudamientu que vivimos en Mieres. Los trabayadores municipales nun puen cargar colos años de marafundiar perres y clientelismu cacique, tienen de ser los responsables quienes rindan cuentes. Poro, naguamos por una redefinición del plan d'axustu llaboral mierense que tea en cuenta les necesidaes y la situación llaceriosa de la mayoría social de Mieres. Pa finar, dende Conceyu Abiertu por Mieres pidimos a Izquierda Unida que demuestre a la población del conceyu que son una formación política d'izquierdes, yá qu'hasta agora'l proceder d'IU ta comtemplando munches midíes derechistes. Tamién que los sindicatos interllocutores nel procesu de negociación tean al altor de les circunstancies y nun dean un pasu atrás pa colos intereses de los y les trabayadores.


Conceyu Abiertu por Mieres llamenta l'ERE nes plantes de Rioglass Solar en Mieres y L.lena

Les ciudadanes y ciudadanos qu'integramos la formación Conceyu Abiertu por Mieres vemos con preocupación la decisión de la direición de Rioglass d'aplicar un ERE nes factories de L.lena y Mieres qu'afeutaría a la totalidá de dambes plantiyes. L'ERE entamará a aplicase dende l'entamu del mes d'agostu y tien poques vistes de ser reversible. Dende la direición de la multinacional argumenten la so decisión na falta d'actividá y la falta pidíos que se tan dando anguañu a estes fábriques.

Dende Conceyu Abiertu por Mieres queremos tresmitir la nuesa solidaridá activa con tolos trabayadores que van sufrir esti plan y que va suponer la estinción de los sos contratos llaborales y la so incorporación a la llarga y escandalosa llista de paraos y paraes que tenemos n'Asturies y nestos conceyos. Vemos esmolecíos y esmolecíes como tol sector llaboral de les comarques mineres y de la zona del Caudal va cayendo rápidamente demientres les empreses siguen teniendo beneficios millonarios. Esti casu ye un más. Si bien Rioglass Astur quier zarrar la so actividá na nuesa comarca, l'añu pasáu abrió una factoría la multinacional n'Estaos Xuníos invirtiendo 33 millones d'euros. Una vegada más les direiciones empresariales pisen los drechos y necesidaes de la mayoría social si pa ello ye necesariu caltener los sos astronómicos beneficios.

Dende la formación mierense tamién atalantamos qu'estos 200 despíos axúntense a una braera sangría de despíos nos caberos meses, lo que fai incaltenible la situación socioeconómica d'esta comarca. El modelu industrial y llaboral qu'afitaron nel conxuntu de les cuenques mineres paez cadudu ya inútil y esto nuna coyuntura onde quieren finar de forma definitiva col carbón asturianu. Amás de solidarizanos colos 200 trabayadores y tresmitir la nuesa opinión sobre'l proceder de la empresa queremos pidir a los sindicatos y los grupos políticos un posición fuerte nesti conflictu, en defensa de los intereses de los y les trabayadores, intereses que son los de Mieres, L.lena y el conxuntu del país.

FONTE: www.conceyuabiertu.org

Asturies yá supera les cien mil persones en paru, según la EPA

El paru medró en 5.100 personas n'Asturies nel segundu trimestre del 2012, según los datos de la Encuesta de Población Activa (EPA), lo que supón una xuba del 5,28% en comparanza col trimestre anterior. Ello fai que'l númberu total de persones ensin empléu nel país llegue a les 101.800 y la tasa de paru tea nel 21,03%.

Nel conxuntu del Estáu, el paru xubió en 53.500 persones nel segundu trimestre del añu en comparanza col primer trimestre, un 0,95%, lo que sitúa'l númberu total de desempleaos en 5.693.100 persones, una cifra nunca vista hasta agora na economía española.

La tasa de paru estatal medró, al acabar xunu, hasta'l 24,63%, una proporción casi dos décimes más alta que la del trimestre anterior (24,44%), según los datos de la EPA que publicó esti vienres, 27 de xunetu, l'Institutu Nacional d'Estadística (INE).

FONTE: Les Noticies

viernes, 27 de julio de 2012

PSOE ya IDEAS eviten l’aprobación de la Ordenanza del Asturianu en Noreña

LA CARA L'HIPÓCRITA
Namás Conceyu Abiertu y Frente de la Izquierda voten a favor

La presentación del proyectu d’Ordenanza pal Usu del Asturianu nel Conceyu de Noreña, redactada pola formación Conceyu Abiertu nun consiguió aprobase esti xueves nel plenu caberu enantes de les vacaciones de branu. El PSOE, partíu que gobierna’l conceyu con trés conceyales y qu’aprobó n’otros conceyos ordenances asemeyaes, ya IDEAS, que tien una conceyala y lleva la oficialidá nel so programa, votaron en contra, mientres qu’Independientes por Noreña, con trés conceyales y PP, con dos, decidieron abstenese. A favor votaron el propiu conceyal que presentaba la propuesta, de CA, y el de Frente de la Izquierda, mientres que l’únicu conceyal de Foru, Inaciu Iglesias, qu’amosara la so disposición a votar a favor, nun tuvo nel que yera un plenu decisivu pal futuru del asturianu nel conceyu condal.
El plenu entamó cola presentación al traviés de la vía d’urxencia, como ye vezu na oposición por mor de les torgues que l’Alcalde socialista, César Movila, pon a la discusión de toles propuestes del restu los partíos.

Y foi l’alcalde quien entamó con torgues, nesti casu llingüístiques, yá que dixo “nun entender l’asturianu” dempués de la intervención del conceyal de Conceyu Abiertu por Noreña, Pablo Pérez Fonseca.

Tres unes poques pallabres d’esti conceyal, l’Alcalde socialista dixo lo siguiente: “Pablo, solo por inteligencia, polo menos mía, delante del asturianu, por los límites que tengo, hay algunas cosas que a mi se me escapan, o lo dices en castellano o sino voy a ser incapaz de seguir el debate”. Énte estes declaraciones, el conceyal de Conceyu Abiertu siguió cola so intervención en castellán “por deferencia a la falta de conocencia de la llingua llariega” per parte del Alcalde del conceyu condal.

Nel turnu acutáu a los partíos pa dar la so opinión sobre la propuesta, Borja Ortea Llera, del Frentre de la Izquierda dixo que la so formación esperaba que se ficiere con más tiempu esta propuesta, y anque amosó dellos desalcuerdos, anunció’l so votu a favor, anque anunció “nun quedará otra que facer cambeos na norma nel futuru”.

El PSOE diz sí en Xixón o Cangas, pero non en Noreña a unes ordenances


Alcalde de Noreña
La vocera del PSOE amosó la so negativa a aprobar esta norma “el uso de la lengua, en este caso el asturiano, viene recogido en la Constitución, pero el uso oficial, (no oficioso, que en la calle lo usamos todos, yo la primera), esta es una competencia exclusiva del Principado de Asturias”. Pa los socialistes “la gestión documental de este ayuntamiento tendría que salir en asturiano, yo vengo con datos de lo que nos costaría esta ordenanza, solamente el coste económico de una persona dedicada a esta función sería de 49.170 euros, porque no hay ningún funcionario que pueda encargarse de esto”, esplicó. Pa los conceyales socialites “con la que está cayendo no me parece bien sacar este tipo de cuestiones” yá qu’entienden que “necesitamos recursos para otras cuestiones más prioritarias”.


PP ya IPÑ: ordenanza sí, pero non esta

Pa Independientes por Noreña esta norma “va demasiado allá”, camienten que “para apoyarlo debe empezarse por algo más sencillo”, anque reconocen que “el asturiano es algo que utilizamos todos en mayor o menor medida, es indiscutible que en Noreña se usa el asturiano”. “Estamos de acuerdo en lo básico, en una ordenanza, pero no es ésta la que nos gusta”, remataron.

María Ángeles Velasco del PP, recordó “aprobamos la Ley de Uso del asturiano, estamos de acuerdo en su promoción” pero pa esplicó que “esto implica un coste y ahora mismo no hay recursos”. “Sí estamos de acuerdo en el espíritu, pero no lo vemos como el documento idoneo”, añadiendo que “debemos mirar muchos más detalles de la ordenanza”. La conclusión de los populares ye que “no lo desestimamos, proponemos que se deje para un tratamiento más hondo y en los foros adecuados”. Asina mesmo, añadieron que “ahora mismo debemos esforzarnos en otros temas, no voy a decir de mayor calado, porque este es de calado, pero hay temas más prioritarios”.

En cuantes al otru votu en contra, el d’IDEAS, la so conceyala esplicó que “la coalición IDEAS lleva la oficialidad del asturiano en su programa pero yo también veo que esta ordenanza no me convence, sobre todo en estos momentos tan difíciles”, insistiendo na idea del PP “hay temas más prioritarios en un momento económico como este”.

Unai Díaz de la oficialidá al votu en contra

Munchos s’entrugaron ónde taba Inaciu Iglesias, conceyal de Foru y hestóricu asturianista nun día tan importante pal asturianu como’l d’esti xueves en Noreña, asina cómo poles razones que llevaron a votar en contra del asturianu al llíder de Mocedaes Socialistes d’Asturies y conceyal en Noreña, Unai Díaz Noval, que la fin de selmana pasada yera escoyíu secretariu xeneral de la so formación, qu’aprobaba llevar la oficialidá del asturianu nos sos principios, lo que facía pensar un votu a favor pela so parte a estes ordenances.

Na so intervención final, el conceyal de Conceyu Abiertu recordó munchos de los gastos que fai l'Ayuntamientu de Noreña y que podíen evitase y recordó que “nun se necesiten 50.000 euros pa desenrrollar la norma" yá que la disposición transitoria de la mesma permite esperar a la llegada de recursos, y cuntando amás cola posiiblidá de firmar alcuerdos con otres alministraciones pa evitar inversiones que'l conceyu nun pueda asumir

Fonte: Asturnews.com

Conceyu Abiertu por Uviéu sofita la llucha de Jorge

Esti xueves 26 de Xunetu, enantes de la concentración convocada na Plaza La Escandalera en sofitu a Jorge na so llucha pola dación en pagu- tres el desahuciu que sufrió xunto a la so muyer y fía, y que propició la fuelga de fame na qu’anguaño s’atopa-, Conceyu Abiertu por Uviéu quixo contribuyir a la so llucha mediante l’espardimientu d’un testu billingüe nel que de mena breve se desplicaba la situación na que s’atopa Jorge y s’encamentaba a implicase toos y toes en sofitu d’esti vecín d’Uviéu, como representación de les tantes persones que sufren la llaceria de los desahucios.

Poro, fízose una pegada en dellos barrios del conceyu, asina como’l repartu pela zona centru tiempu enantes de la cita na Escandalera, col enfotu d’esparder non sólo mayor concencia solidaria ente la población uvieína, sinon tamién p’animar a dar el pasu ya implicase na llucha pol cambiu nes práutiques abusives que desendolquen les entidaes bancaries, y qu’afeuten enforma a munchos y munches ciudadanes d’Uviéu y del restu d’Asturies, asina como a decatase de que sólo avanzando haza la democracia direuta podemos poner fin a estes inxusticies qu’a diariu enllenen les vides de munches persones.

jueves, 26 de julio de 2012

Conceyu Abiertu por Llangréu refuga la xuba de les tarifes de les escueles infantiles

L'Ayuntamientu de Llangréu quier que seyan 314 euros mensuales, el másimu permitíu, lo qu'abonen mensualmente los padres y madres.

El gobiernu llocal de Llangréu quier xubir nuevamente les tarifes mensuales de les escueles infantiles, hasta'l másimu permitíu por xornada completa pola Conseyería d'Educación, que ye de 314 euros al mes. Nel cursu 2008-2009 les families pagaben yá 247,92 euros, lo que quier dicir que dende esi añu hasta'l presente la xubida n'euros ye de 66,08 al mes pa cada familia. A esta xubida de les tarifes axuntase'l grave fechu de que'l Conceyu de Llangréu debe-y dineru atrasáu a los trabayadores d'estes escueles.

Dende Conceyu Abiertu por Llangréu pidimos que nun se dea una nueva xubida de les tarifes, refugamos que l'executivu llocal tea esa intención y consideramos vergoñosu'l preciu d'esti serviciu nos tiempos de crisis y probitú que tamos viviendo. Queremos recordar qu'esti serviciu yá nació coxu, con problemes pa poner a furrular munches instalaciones y pa pagar a los trabayadores de les mesmes. Tamién queremos dicir que lóxicamente la finalidá d'esti serviciu ye la d'ayudar a les families empleaes a que los sos fios y fies puedan pasar el día de forma segura y atendía, polo que'l serviciu tien un fondu fin social, lo que fai qu'estes tarifes seyan abusives ya impopulares pa iniciatives sociales d'estes carauterístiques.

Caltenemos tamién que'l pagu a los y les trabayadores d'estes escueles tien de facese yá, y si ye necesariu la Conseyería d'Educación deberia de ceder el dineru atrasáu. Pa finar, como yá diximos, refugamos l'aumentu de les tarifes pero creemos qu'añu tres añu tienen de tornar a los precios más populares y alcordies cola actual situación socioeconómica. Una baxada progresiva pero efeutiva del preciu d'esti serviciu ye más que necesaria pa garantizar el futuru d'estes escueles infantiles.

Andecha Astur considera patétiques les declaraciones de Javier Fernández

Convida a Javier Fernández a dexar en casa la so fobia antiasturiana, a respetar los drechos democráticos y a escomenzar a actuar yá en defensa de los intereses d’Asturies.

Énte les patétiques declaraciones del presidente del "Principado", Andecha Astur convida a Javier Fernández a dexar de dar rienda suelta a les fobies antiasturianes que lu carautericen tantu a elli comu al partíu del que forma parte y a escomenzar a actuar d’alcuerdu al so cargu, y a tomar ensin más dilación dalguna midía empobinada a dar rempuesta a los munchos problemes a los qu’anguañu s’enfrenta’l Pueblu Asturianu. La minería, ensin dir más lloñe.

Andecha Astur compriende que Javier Fernández tea esmolecíu pola decisión de les mocedaes del so partíu de reivindicar la oficialidá del asturianu, pero tien d’atalantar que ye incaltenible la situación de represión sistemática a la que ta sometía la llingua asturiana y que más ceo que sero va tener que plegase a la normalidá democrática y a la reconocencia y aplicación en Asturies de los drechos humanos internacionalmente reconocíos. Remembrándo-y que la intolerancia a la que fai mención nun se topa en quien defende o reconoz talis drechos, sinón en quien persiste na so represión.

En cualisquier casu too ello nun xustifica’l so paralís y la so absoluta inoperancia énte los problemes asturianos (conflictu mineru, paru, emigración, sanidá, educación…) pola qu’empecipia a ser conocíu como "l’ausente", motivu pol qu’Andecha Astur recláma-y que dexe de pasiar les sos fobies antiasturianes y qu’empecipicie a actuar de dalguna mena en defensa de los intereses d’Asturies, si ye qu’el so odiu a tolo asturiano-y lo permite.

A la fin, y resalvando’l restu de les sos patétiques declaraciones, Andecha Astur nun pue por menos de da-y la razón en que ye ciertu que’l PSOE n’Asturies ye un partíu "Cosmopolita", darréu que gracies a la so conivencia coles polítiques del Estáu español pal nuesu país consiguió que seyan decenes de miles los asturianos "cosmopolites", al tenelos obligao a emigrar fora de la so patria.

www.andecha.org

Conceyu Abiertu por Llangréu quier espresar crítiques respeutu a les actuales “Fiestes de Santiagu”, en Sama de Llangréu.

Los/es ciudadanos/es qu'integramos Conceyu Abiertu por Llangréu queremos espresar la nuesa opinión al rodiu del programa y organización de les “Fiestes de Santiago 2012”, fiestes patronales del pueblu de Sama de Llangréu.

En primer llugar, atalantamos que ye desafortunáu que Paz Fernández Felgueroso, ex-alcaldesa del PSOE en Xixón, ufriera'l pregón inagural de les fiestes populares. Nestos tiempos de conflictividá social y crisis socioeconómica atalantamos que'l perfil pa pregonera/u d'estes fiestes ye'l de una persona que destaque pola defensa de los drechos sociales y llaborales de la clase trabayadora y que nun tea relación con intereses partidistes o sindicalistes. Poro, entendemos que lo afayaizo sedría cuntar una persona que destacare polo tanto nos campos del altruismu y la defensa de la mayoría social. Per otru llau, la ex-alcaldesa xixoniega encarna na so persona la defensa encubierta de la especulación, les privatizaciones y el fallíu modelu de reconversión industrial.

En segundu llugar, nun entendemos la presencia d'elementos militaristes na procesión del Apostol Santiagu, nun actu qu'anque confesional y relixosu ye de claru calter civil y popular. El papel hestóricu y actual del exércitu español en Sama y en les cuenques mineres ta mui desvinculáu de los intereses de los/es nuesos/es paisanos/es. Como defensores d'un conceyu desmilitarizáu camentamos que la presencia del exércitu español na misa mayor y la procesión d'estes fiestes samenses ye bien prescindible.

Per últimu, anque la presencia de les señes d'identidá asturiana y llangreana formen parte d'estes fiestes con iniciatives como pasucais, concursos d'entibadores, alcuentros de canción minera o bandes de gaites dende Conceyu Abiertu por Llangréu vemos un gran vacíu nesi sen, cola ausencia total de la llingua asturiana. Los actos y la cartelería anunciativa de les fiestes de Sama de Llangréu inoren la llingua propia como vehícula circular comunicativa, lo qu'entendemos como anti-natural y ayenu a la identidá llingüística de los habitantes de Sama y del restu del Conceyu de Llangréu. La castellanización d'estes fiestes faenles menos populares a los güeyos de la población llangreana, sigún entendemos dende la formación llocal de Conceyu Abiertu.

Al rodiu d'estos tres exes queremos tresmitir dende Conceyu Abiertu por Llangréu les nueses principales crítiques pa con estes “Fiestes de Santiagu 2012”. Asina pues, queremos facer llegar el nuesu posicionamientu al Gobiernu Llocal de Llangréu y a la Sociedá de Cultura y Festexos “Santiago Apostol” y que los nuesos esmolecimientos seyan escuchaos por estes instituciones pa qu'en vinientes folixes el modelu seya más abiertu, caltenible y popular.

miércoles, 25 de julio de 2012

Homenaxe al 26 de xunetu cubanu con una torna de Fidel.

Dende agora Fidel Castro Ruz, pernomáu revolucionariu cubano axúntase tamién a la Biblioteca Dixital d'esti blogue. Esta vegada ufrimos en formatu PDF y n'asturianu l'artículu de Fidel entituláu los superrevolucionarios, escrito pol cabezaleru cubanu en setiembre de 2003.

Nesti curtiu artículu Fidel Castro denuncia la fola d'imposiciones y manipulación que quieren llantar en territoriu cubanu los imperialistes del mundu, bien con una apariencia neolliberal clásica o bien con una supuesta actitú "progresista". Fidel, amás alvierte nesti artículu del desastre social al que va de camín l'imperialismu y el capitalismu, una crisis socioeconómica y política que tamos viviendo y cuya gravedá y violencia medra cada día.

Asina, queremos rendir dende esti blogue homenaxe a la Revolución Cubana nel 59u aniversariu del Asaltu al Cuartel de La Moncada. Suaños fechos realidá como los de Cuba son güei pernecesarios nel planeta p'allumar el camín a les mases trabayadores pa siguir un camín énte tanto individualismu y tanta desorientación ente la mocedá y los seutores críticos.

DARRÉU cellebra'l 26 de xunetu y unvía la so solidaridá al Pueblu Cubanu.

La Organización de Mocedá Independentista Revolucionario Darréu quier conmemorar el 59 aniversariu del asaltu al Cuartel de la Moncada y otru añu más queremos amosar la nuesa solidaridá pública col Pueblu de Cuba y la so Revolución Socialista. Cuba sigui dando exemplu al mundu enteru de que se puede construyir una sociedá xusta ya igualitaria, onde'l poder popular y los drechos de les persones tean garantizaos y la superación del sistema capitalista seya un fechu.
El bloquéu económicu, la manipulación mediática y la persecución qu'hai en tol mundu a les persones que sofiten la democracia popular cubana y el sistema socialista nun faen otra cosa qu'espeyar ainda más les contradicciones del imperialismu mundial, imperialismu enfotáu en caltener un sistema socioeconómicu y políticu en crisis y en vía desaniciu. Dende Darréu desiximos la fin del bloquéu criminal, la llibertá de los 5 patriotes cubano que siguen presos n'Estaos Xuníos y la fin de la manipulación mediática contra'l Pueblu Cubanu y la so obra revolucionaria.
Por últimu, dende la mocedá de la izquierda soberanista d'Asturies queremos tresmitir tola nuesa fuercia y almiración col heroicu Pueblu Cubanu, el cual sigui resistiendo les hostilidaes del capitalismu. El pasáu primeru de mayu La Habana vivió una braera marea humana que pidía caltener, preservar y perfeicionar el socialismu na islla. Dende Asturies nun podemos facer otra cosa que felicitar al pueblu de Cuba pola so superación y por facer ver al mundu qu'hai una alternativa al capitalismu xabaz y a la esplotación y la guerra ente les persones. Nós, n'Asturies entá siguimos llibrando la llarga batalla pola nuesa emancipación nacional y social, conceutos éstos que la esperiencia cubana fainos ver que son indixebrables.
¡Puxa Cuba Socialista! ¡Puxa'l 26 de Xunetu! ¡Asturies cola Revolución Cubana!

Noreña va debatir les ordenances sobre l'usu del asturianu que propón Conceyu Abiertu

El Plenu del Conceyu de Noreña va debatir esti xueves, 26 de xunetu, la propuesta d'ordenanza pal usu de la llingua asturiana que presentó Conceyu Abiertu por Noreña a finales de mayu. D'entós p'acá, los grupos políticos tuvieron oportunidá d'estudiar el testu y presentar aportaciones a una propuesta que, a xuiciu de Conceyu Abiertu, ye «asumible perfectamente» por toles formaciones con representación nel Conceyu y «axustada a la llegalidá vixente».

La formación asturianista pretende que la norma sía aprobada por unanimidá de los grupos porque, na so opinión, «la llingua ye patrimoniu de tolos noreñenses, independientemente de la so ideoloxía». Por esti motivu, l'aprobación d'una norma local que reconoza los derechos llingüísticos de tolos ciudadanos, que regule'l so usu nel Conceyu y incluya midíes de promoción y normalización, como ye la que se propón, diba ser, en palabres de Conceyu Abiertu por Noreña, «amás d'un actu de dignificación de la llingua y cultura asturianes, un avance democráticu necesariu».

El testu que se va debatir empieza col reconocimientu del derechu de tolos vecinos del Conceyu de Noreña a usar l'asturianu y que les comunicaciones –orales o escrites– cola alministración local tengan la mesma validez que si foren en castellanu. Tamién s'afita la obligación del Conceyu de redactar toles comunicaciones, notificaciones y documentación alministrativa –como les actes del Plenu y les comisiones informatives– tanto n'asturianu como en castellanu, inclusive nes relaciones con otres Alministraciones, como la central del Estáu o la Unión Europea .

Ente les midíes de promoción y normalización del idioma, la propuesta d'ordenances recueye la publicación en castellanu y asturianu de tola publicidá que faiga'l Conceyu, l'usu del asturianu polos cargos públicos n'actos institucionales, la valoración del conocimientu de la llingua propia nes convocatories públiques d'empléu que supongan atención a la ciudadanía o la organización de cursos p'aprender y perfecionar l'asturianu destinaos a los trabayadores municipales.

FONTE: Lesnoticies.com

martes, 24 de julio de 2012

Conceyu Abiertu sofita la llucha obrera y popular.


Pallabres de Mariu Arbesú, recién escoyíu coordinador nacional de Conceyu Abiertu, a la TPA. El coordinador d'esti proyeutu a nivel nacional tresmite'l so apoyu a los enzarraos pero tamién cinca en que tolos seutores de trabayadores tienen de rebelase y lluchar polos sos drechos si queremos aparar el desmantelamientu que tan llevando alantre cola escusa de la crisis.

Andecha Astur alerta del riesgu de colapsu poblacional

Los nueos datos del INE confirmen qu’Asturies tá sometía a un auténticu xenocidiu
Les polítiques socioeconómicas aplicaes pol Estáu español sobro Asturies obliguen a la nuesa mocedá a emigrar y consiguen el so oxetivu d’algamar un xorrecimientu poblacional negativu.

Les proyeiciones del Istitutu Nacional d’Estadística (INE) confirmen que nel primer semestre del añu 8.250 asturianos viéronse obligaos a emigrar y qu’esta sangría poblacional nin siquier viose compensada pola entrada d’inmigrantes, colo que’l saldu migratoriu ye negativu, lo que conxuntamente col descensu de la natalidá y l’avieyamientu poblacional, lleva a Asturies a una situación de despoblación pergrave, un auténticu xenocidiu.

Andecha Astur va años que vien denunciando cómo son más de 18.000 los asturianos qu’añu ente añu vense obligaos a emigrar de resultes de les polítiques sociu-económiques aplicaes pol Estáu español sobro Asturies, pero estos nueos datos son entá más graves, darréu que faen referencia a les presones que modificaron la so situación censal, ello ye, non a toles qu’emigraron, sinón a aquelles que yá s’empadronaron fora del nuesu país, lo que da una idega averada de la estrema gravedá, yá que la mayoría de los asturianos que se ven obligaos a emigrar suelen caltenese empadronaos n’Asturies cola esperanza de qu’el so destierru seya solo temporal.

Per otra parte toles previsiones confirmen la tendencia, denunciada dende va tiempu por Andecha Astur, a qu’esta situación s’agrave nos prósimos tiempos, lo que va provocar un xorrecimientu vexetativu entá más negativu y un auténticu colapsu en términos demográficos.

Dende Andecha Astur reiteramos el calter non natural d’esti procesu y la responsabilidá cosciente del Estáu español nel mesmu, darréu que coles sos polítiques de destruición del texíu económico asturianu, con una desindustrialización xabaz en denguna manera nin momentu compensada, y l’ausencia de midíes sociales efeutives, fuercen a que seyan miles los asturianos, sobromanera mocedá, los que se vean obligaos a dexar la so patria.

Asina mesmu, Andecha Astur quier denunciar nuevamente cómu les ayudes llegaes dende Europa y que superaron la rampiña en Madrid, nun fueron utilizaes pa la cacarexada "reindustrialización", sinón pa favorecer l’estáu de corrupción permanente esistente ente la clas político y sindical del nuesu país, cuya complicidá en tol procesu ye apolmonante.

FONTE: www.andecha.org

Conceyu Abiertu entamó una campaña de llimpieza del ríu Noreña

Dellos voluntarios participaron esti domingu nuna campaña de llimpieza del ríu Noreña entamada por Conceyu Abiertu por Noreña. L’oxetivu yera retirar basura del ríu nel so tramu más urbanu pa meyorar la imaxe “vergoñosa” que mantenía.

La campaña duró más de trés hores y nesi tiempu los voluntarios, entes los que taba’l conceyal de la formación nacionalista, Pablo Pérez, recoyeron una cantidá grande de bolses de plásticu y una bona riestra d’oxetos ayenos al ríu, como llates, botelles, material informáticu, paragües o recipientes de disolvente. En total, sacáronse alredor de 60 quilos de basura nel tramu que va dende La Chocolatera a l’Apeaderu.

Según señalen dende Conceyu Abiertu por Noreña, la iniciativa foi mui bien recibida polos vecinos que paseaben pola zona de Los Riegos, polo que yá tán mirando otra fecha pa continuar cola llimpieza del ríu Noreña n’otru tramu. Los nacionalistes apunten que’l so oxetivu con esta aición ye meyorar “ambientalmente esti ecosistema”, asina como la so imaxae, dao que la situación del ríu “yera vergoñosa”. Tamién el “concenciar de la necesidá de cuidar el nuesu ríu y la importancia de mantenelu llimpiu”. D’igual forma, la organización quier aprofitar estes actividaes pa “conocer de primer mano la situación del ríu Noreña y estudiar actuaciones y propuestes que foren necesaries pa la defensa del ríu y la so conservación”.

FONTE: Asturies.com

lunes, 23 de julio de 2012

La Marcha Negra de Xixón.


Vidiu de la movilización de Xixón entamada por estremaos axentes sindicales, sociales, políticos y culturales en defensa de los drechos sociales y escontra la fola represiva que tamos viviendo.

martes, 10 de julio de 2012

Nueche de llucha n'Asturies

Diverses movilizaciones nel país.
Esta nueche Asturies ta viviendo numberoses movilizaciones rellacionaes col conflictu mineru. La principal d'elles ta dándose en La Pola L.lena, onde un grupu de persones punxo un total de cuatro barricaes, dos cortando l'A-66 en direición Asturies-Lleón y otres dos pel mediu'l pueblu. La Guardia civil nun tardó en llegar y, como yá ye vezu, cargó con pelotes de goma y botes de gas escontra la población civil que miraba y sofitaba les aiciones de llucha. Según paez, hai deteníos, nun númberu tovía ensin confirmar (a la 1:00), amás de numberosos destrozos en bares, coches, faroles, y demás mobiliariu por culpa de l'agresividá policial.

D'otru lláu, Llangréu vivió la marcha, compuesta principalmente por muyeres, que foi dende'l Pozu Fondón hasta'l Candín, onde un grupu de mineros tan enzarraos dende va aprosimadamente mes y mediu. Tamién l'occidente tuvo'l so focu de llucha en Cangas con una marcha nocherniega en defensa de la minería.

Al otru lláu del Cordal, Ciñera ta viviendo calma tensa, col allumbráu públicu fuera de serviciu y numberoses barricaes, ensin intervención policial hasta'l momentu.

Complétase asina una nueche de llucha nes distintes cuenques mineres, de cuyes consecuencies siguiremos informando.

Fonte: Infoasturies

lunes, 9 de julio de 2012

Nueves agresiones policiales haza la llucha minera

El terrorismu policial cobra una nueva víctima.

Güei la movilización minera continuó con dellos cortes de carretera n'enclaves como La Doriga, Cornellana, la "Y" en Llanera y l'A-66 n'Olloniegu, onde dos barricaes cortaron el tráficu en dambos sentíos de los túneles d'El Padrún. Nesi sitiu foron prindaos pola Guardia Civil tres mineros cuando colaben del llugar en coche, recibiendo ún de los obreros una paliza qu'obligó a la so hospitalización nel HUCA d'Uviéu baxo estáu grave de salú pola xabaz actuación policial. Poro, les fuercies policiales destinaes a Asturies dende va delles selmanes pol conflictu mineru siguen coles sos impunes agresiones haza la clas obrera asturiana con una nueva paliza tres les rexistraes selmanes atrás.

Sigue tamién la "Marcha prieta" a falta de menos de dos díes pa la manifestación na capital del reinu frente al Ministeriu d'Industria, igual que se caltienen los enzarros de siete mineros nos pozos Candín -d'onde provién el mineru hospitalizáu- y Santiagu, y el d'un garrapiellu de representantes municipales n'Ayuntamientos asturianos.

FONTE: Infoasturies

domingo, 8 de julio de 2012

Vidios que faen resume d'estos díes


Combatividá y solidaridá, les ferramientes coles que salvaguardaremos el futuru d'Asturies, un país con un futuru bien prietu, y non precisamente pol carbón. ¡Namái'l pueblu salva'l pueblu!

viernes, 6 de julio de 2012

Graves incidentes esta nueche pasada en La Pola L.lena

Dos persones resultaron firíes, una d’elles menor d’edá, depués de les cargues que los antidisturbios protagonizaron esta nueche en La Pola L.lena, tres el corte que fixeron los mineros n’autovía A-66.

Una de les firíes ye una menor d'edá que probablemente recibió l'impactu d'una pelota de goma llanzada pola Guardia Civil, y l'otra, una muyer que resultó mancada leve pol impactu d'un volador llanzáu polos mineros.

La pasada nueche prodúxose ún de los mayores enfrentamientos ente los güelguistes y les fuerces de seguridá, dende qu'entamara les protestes y güelga del sector ante los recortes presentaos pol Gobiernu de Mariano Rajoy que suponen según los trabayadores "el fin de la minería".

Per otra parte los mineros retomaron a primer hora de la mañana les sos protestes con nueves barricaes que caltienen cortaes delles carreteres d'Asturies. Asina, permanecieren cortaes l'A64 n'El Berrón; l'A112 en Caborana y la A252 na Bargana.

Fonte: Asturies.com

miércoles, 4 de julio de 2012

Zapico: “Ye mui difícil acumular fuercies no eleutoral cuando l’asturianismu ta reculando no social”

El 19 de mayu, IAS decidió salir como organización d’UNA al haber discrepancies ente la so militancia sobre’l futuru del partíu y el procesu de confluencia col Bloque. Faustino Zapico (Mieres, 1970) ye’l secretariu xeneral de la formación.

-¿Por qué IAS decidió salir d’UNA y nun entrar nel procesu Compromisu?
En gran midida nun tamos porque nun podíemos tar como IAS. Realmente, Izquierda Asturiana formaba parte de la UNA, una federación de partíos que, nel momentu qu’entra nel procesu de converxencia col Bloque y adopta la forma xurídica de federeación, se convierte nuna federación de federaciones y eso veíamos que nun yera factible. La UNA actuaba como un partíu políticu na práutica y ésa yera una de les razones poles qu’había diferencies dientro d’IAS. Cuando se montó la UNA, hai cuatro años, foi como una federación de partíos na que les organizaciones integrantes tuvieren entidá propia. Na práutica eso nun se cumplió y había un sector d’Izquierda Asturiana que nun tabemos mui conformes. Nun se diera un debate internu que llevara a la conclusión de qu’había que facelo asina.
Al mesmu tiempu, tamién había xente disconforme cola forma na que se llegó a l’alcuerdu col Bloque por Asturies l’añu pasáu. Nós nun nos oponíamos a una coalición col Bloque y con otros sectores pa que fora más amplia que Bloque-UNA, pero tamién entendíamos que tenía que ser sobre unes bases polítiques determinaes. Como depués de les eleiciones en cuenta d’haber una reflexón autocrítica sobre qué ye lo que se fixo mal o qué ye lo que se dexó de facer, diose una fuxida p’alantre –en gran midida por mieu a reconocer el fracasu– que ye resultáu d’una política equivocada dende va tiempu. Nun ye que les equivocaciones d’UNA empezaren cola coalición col Bloque, sinón que llevábamos años equivocándonos, tanto Izquierda Asturiana como la UNA. Y considero que la coalición col Bloque foi otra equivocación más.
Por último, hubo una situación política nueva n’Asturies y creo que nun se reaccionó ante ella. El discursu que teníemos armáu, por exemplu, va dos años, cuando fiximos el penúltimu congresu, yera bastante correutu, pero nun supimos adecuanos al cambiu del ciclu políticu, la entrada de Cascos y depués la salida, la entrada del PP a nivel estatal, la crisis… Vemos que frente a una situación mui nueva nun hai análisis sobre lo qu’hai que facer y lo único que se fai ye tirar p’alantre. Una prueba d’ello foi dir a les eleiciones últimes, nes que tuvimos un resultáu bastante malu –ye verdá qu’había unes condiciones mui revesoses– y al final, la última fuxida p’alantre ye escenificar la converxencia Bloque-UNA disfrazándolu d’un proyeutu mui ampliu que nun ye tanto dende’l momentu que pasaba pola práutica disolución de la IAS y, en too casu, cola ausencia d’un debate internu, porque yo creo qu’un procesu unitariu de verdá nun se monta en dos meses.
-Ye nesi momentu, en mayu, cuando IAS negocia una ruptura pautada cola UNA.
Sí, una ruptura pautada foi la decisión que tomamos el 19 de mayu nuna asamblea de militantes: la Izquierda Asturiana salía de la UNA, dexaba vía llibre a la UNA pa que se tresformara nun partíu que participara nesi procesu na midida qu’ellos queríen y nós recuperábamos plenamente la soberanía política y empezábemos a actuar en solitariu col compromisu de nun facelo públicu hasta depués del congresu de Compromisu.
-Nesi Alcuentru Nacional tamién dieron vía llibre a los militantes que quixeran participar en Compromisu.
Lo que decidimos nesa asamblea foi qu’IAS como tal salía de la UNA y del procesu Compromisu, y que los compañeros d’IAS que sí queríen participar quedaben na UNA. Depués, a lo llargo del mes que pasó, la xente d’IAS que quedábemos dibemos dándonos de baxa na UNA y la xente d’IAS que quería siguir na UNA diba dándose de baxa n’Izquierda Asturiana.
-¿Hubo muncha xente qu’abandonó IAS pa entrar nel procesu Compromisu?
Básicamente la xente que queda n’UNA ye la del conceyu de Xixón, yá que’l restu práuticamente siguimos toos. Trátase d’una separación amistosa. Nun hai enfrentamientos personales, sinón diferencies polítiques.
-¿Cuál va ser el papel agora d’Izquierda Asturiana?
No que tamos agora ye en recuperar xente que quedó pel camín, sobre manera xente que nun veía ya’l procesu d’UNA de va cuatro años y qu’agora ta volviendo; tamién xente nuevo que nunca tuviera. Al mesmu tiempu tamos nun procesu de debate, porque lo que queremos ye centranos na actividá política con toles consecuencies. El papel fundamental que creemos que tenemos que facer agora ye un discursu sobre lo que ta pasando n’Asturies; sobre la crisis. Recuérdame muncho, hai venti años, cuando empezamos a montar IAS. El problema que veíamos yera que la izquierda asturiana taba totalmente ausente de les movilizaciones qu’había, que fueron movilizaciones mui gordes: unos porque taben con un proyeutu eleutoral, el PAS; y otros porque taben a otra cosa que tenía poco que ver colo que taba pasando n’Asturies. Y por desgracia, creo que venti años depués ta pasando dalgo mui paecío. Polo tanto, lo que queremos ye una organización pa la movilización social, formar militantes nos movimientos…; volver a los movimientos sociales, el sindical, el llingüísticu… En tolo que se mueva perhí tien qu’haber militantes d’Izquierda Asturiana o de la izquierda asturiana en xenérico, dando un discursu y aportando una visión asturiana dende la izquierda.
-¿Y mirando a les eleiciones?
Non priorizamos agora mesmo construyir un proyeutu eleutoral. Llegará o non, pero nun tamos mirando pal 2015. Ési foi ún de los grandes errores que siempre se cometieron; siempre se pensaba en clave de les eleiciones autonómiques siguientes que supuestamente diben ser les definitives o nes que diba a sonar la flauta. Creo que ye mui difícil acumular fuercies no eleutoral cuando no social l’asturianismu ta reculando; dalgo evidente. Y nesi contestu, pensar que porque armes un proyeutu unitariu mui guapu va sonar la flauta, creemos que ye dalgo inocente. Ye poner el carru per delante los gües.
Lo que tamos faciendo ye tar na manifestación pola minería y el futuru de les cuenques, na manifestación pola educación… Tar onde tenemos xente pa tar; non desembarcar. Si vamos a la ‘mani’ pola eduación ye que tenemos xente n’educación y, nel casu de les cuenques, lo mesmo: ye porque tenemos xente nes cuenques.
-¿Hai espaciu nel espectru políticu asturianu pa una opción política nacionalista/asturianista?
Yo pienso qu’hai espaciu pa una izquierda que piense en clave asturiana. Un discursu nacionalista tien que reformulase muncho. Yá decíamos venti años atrás que n’Asturies había un mimetismu brutal qu’anguaño siguimos reproduciendo en munches ocasiones, y nun nos damos cuenta de per ónde va la sociedá asturiana. Nun hai más que ver toes estes banderes que vemos –por mor de la Eurocopa–. Ye’l resultáu d’una sociedá qu’en munches ocasiones pue ver con simpatía munches de les reivindicaciones de la izquierda asturianista, pero que toes xuntes venles como dalgo raro.
Creo qu’hai que reformular l’asturianismu. El proyeutu asturianista que s’empezó a formular nel 74 necesita una refundación y posiblemente cambiar unes cuantes coses. En qué midida o non, eso ye lo que tenemos que discutir. L’asturianismu políticu ye agora más débil que nunca teniendo más xente cercano que nunca.
-¿Cómo ve al Gobiernu actual del país?
Veólu débil porque nun ye resultáu d’una mayoría amplia; la investidura salió gracies al votu de dos organizaciones mui contraditories ente elles, como Izquierda Unida y UPyD. Si PSOE y Izquierda Unida llegan a sumar los 23, sí que sería un Gobiernu bastante fuerte porque Izquierda Unida taría nél tragando con tolo que tuviera que tragar, pero nun se da esa situación y pue intentar agora escenificar esa posición d’oposición d’izquierdes. Amás, el PSOE va tener qu’apoyase nel PP p’aplicar los recortes, polo que Foro va quedar como la fuercia qu’hexemonice la oposición, al menos la que nun ye d’izquierdes. Si Cascos aguanta, yo creo que va desembarcar equí como el ‘Mesías’.
-¿Cuála ye la so opinión sobre’l rexonalismu de Foro?

Foro bebe de la doctrina asturianista del 1918, con mui pocos cambios. Coinciden hasta na consideración diglósica del asturianu como una cosa más que ta ehí, decorativa. Ye un rexonalismu tamién mui nacionalista español, pero qu’al mesmu tiempu intenta articular un discursu autóctonu… En too casu, creo que ye una fuercia que quita presencia al PSOE y al PP, y eso ye bono. A Foro nun se-y pue pidir más que lo que ye: un sector del PP que marchó y articuló un discursu mui duru contra’l comederu montáu pol PSOE y el PP, lo que-y sirvió pa ganar munchos votos y derrotar el bipartidismu n’Asturies. De fechu, dos elementos fundamentales de l’axenda del asturianismu, como la llingua y l’autogobiernu, Foro nin los toca.
Fonte: Asturies.com

martes, 3 de julio de 2012

Sigue la llucha minera, que se recrudecerá pola intransixencia del gobiernu español

Más llucha y movilización pesie al espoxigue de la represión.
Tres el fracasu del "diálogu" ente sindicatos y el Ministeriu d'Industria, los mineros y mineres tornaron güei a les cais coles sos aiciones combatives que dexaron siete barricaes colos sos correspondientes cortes de carretera, destacando'l de l'A-66 a dos altures -L.lena y Olloniegu-, amás d'otres n'El Padrún, Doriga, La Rodriga y Cornellana. Pela so parte, los mineros del otru lláu del cordal tuvieron el so puntu caliente en Ciñera, onde desendolcaron cortes de carreteres y víes de tren, too ello ente una presencia descomanada de la Guardia Civil, que desendolcó un estáu de sitiu na llocalidá con denuncies d'agresividá estrema viniente de les fuercies policiales, que continúen cola so escalada represiva. Los mineros tuvieron que replegase pol despliegue policial, abellugándose nos montes y cases nos que la Guardia Civil intentó prindar a obreros.

Pel so lláu, sigue la "Marcha Prieta" rumbu a Madrí, atopándose anguaño en Medina del Campo na que foi la duodécima xornada de caminata. Amás, resisten los siete mineros enzarraos nos pozos Santiagu y Candín, qu'amesten un día más a la so exemplar resistencia qu'acumula yá 37 díes embaxo tierra, fechu pol que nun apara la solidaridá diaria del pueblu pa con ellos mediante concentraciones y otros xestos.

Nel capítulu represivu, amás de les denuncies citaes en Ciñera, les redes sociales vienen espardiendo la denuncia de qu'una de les once persones deteníes ayeri pola Guardia Civil, recibió una paliza de seyes "axentes", que como ye vezu nes sos aiciones de tortura y represión quedarán impunes gracies a la complicidá de toles instituciones.

El coleutivu mineru anuncia que, una vegada comprobao que los planes de destrucción del seutor mineru del Ministeriu d'Industria siguen alantre, recrudecerán les sos aiciones, pa lo que piden tamién la solidaridá y sofitu de tol pueblu asturianu nesta llucha en defensa d'un seutor clave pa la economía del país.

FONTE: Infoasturies.net

Conceyu Abiertu reorganízase y amplía les sos bases polítiques tres el so I Conceyu Nacional

El movimientu políticu de xunidá popular Conceyu Abiertu vien de cellebrar el pasáu sabadu 30 de xunu'l so I Conceyu Nacional.
Cola cellebración d'esti I Conceyu Nacional finó'l procesu d’alderique abiertu cola fin de dotar a la organización municipalista d’unes bases politiques y organizatives tres el procesu abiertu de debate desendolcáu'l pasáu sábadu 30 de xunu na Casa la Cultura d'El Berrón, que dende les 10 de la mañana vivió la esposición d'enmiendes y otros alderiques rellacionaos coles estratexes y finxos ideolóxicos a desenrrollar.

Los organizadores del eventu valoraron positivamente la organización del mesmu, la participación nelli y el resultáu final dempués del procesu d’alderique. Nel mesmu conceyu, Mariu Arbesú foi escoyíu Coordinador Nacional de Conceyu Abiertu. Arbesú afirmó que “el proyeutu de Conceyu Abiertu sal mui reforzáu dempués d’esti procesu y que ye una ferramienta útil pa defendese de los ataques que ta sofriendo Asturies trabayando nuna mesma direición dende la izquierda al travies de la xunidá popular, del municipalismu ya impulsando un proyeutu de verdadera democracia p’Asturies".

FONTE: Infoasturies

lunes, 2 de julio de 2012

Agresiones facistes n'Uviéu y Mieres durante la cellebración de la Eurocopa anueche.

Na nueche n'ayeri produxéronse n'Asturies y en tol Estáu agresiones de calter facista y racista.

Los energúmenos aprovecharon la situación que se vivía nes cais pol trunfu de la Seleición española pa actuar.

En Mieres un mozu xufrió les consecuencies: mentes el xentíu glayaba cánticos españolistes y franquistes, esti entamó a retrucar que "si la xente saliese a la cai pa denunciar el paru y la explotación llaboral otru gallu cantaría..." Los irracionales entamaron a llanzá-y botelles y piedres porque llevaba una camiseta de Ernersto Guevara.

De la mesma gravedá tien lo qu'asocedió n'Uviéu, onde la Plaza d'América enllenóse de banderes facistes y cánticos.

Xusto enantes de finar el partíu un mozu de 21 años foi agredíu por portar una bandera tricolor na cai Catedrático Traviesas (a poca distancia de Plaza América) por un suxetu vistíu de negru que-y llamó "rojo de mierda" y ensin mediar pallabra agredió-y.

BASTA YÁ D'IMPUNIDÁ: ESPAÑOLISMU YE FACISMU.
Fonte: Glayiu.org

Les 10 estratexes de manipulación mediática de Chomsky

El llingüista Noam Chomsky ellaboró una riestra de estratexes de manipulación mediática del orde capitalista y los sos medios de comunicación de mases. Agora, pues esfrutar d'esti curtiu pero interesante testu n'archivu PDF y en llingua asturiana descargándolu na nuesa Biblioteca Dixital de Frayando Cadenes.

Anque esti autor, denomáu por sigo mesmu como socialista llibertariu o anarcosindicalista, nun fai un claru analis de la realidá dende un puntu de vista marxista y en munches coses dende postures revolucionaries nun teamos d'alcuerdu pa con el ye fundamental el so trabayu teóricu críticu asoleyando les contradicciones y miseries del sistema capitalista y la política imperialista esterior de los EEXX.

Asina, dende esti blogue soberanista y revolucionariu encamentamos la llectura d'esti documentu nomáu Les 10 estratexes de manipulación mediática, ainda más nesti momentu, cuando tamos viendo qu'anque la ofensiva neolliberal y reaccionaria nun toma nengún descansu la xente en munches ocasiones ta más pendiente de "La Roja" que del so pan y el so futuru.

Uviéu Antifa anuncia'l "Tornéu Basket 3x3 antirrepresivu"

Los beneficios sedrán destinaos pa los mineros asturianos en llucha.

El coleutivu antifacista Uviéu Antifa anunció la organización d'un tornéu de baloncestu 3x3 que tendrá llugar n'Uviéu'l vienres 6 de Xunetu de magar les 16:00. Pa participar nesta competición sedrá necesario aportar 3 euros/persona, col enfotu de destinar los beneficios algamaos a la llucha de los mineros asturianos y les sos caxes de resistencia, polo que'l tornéu tien un nidiu calter solidariu y de sofitu.

Les normes de competición más destacaes son la composición de los equipos, que podrán llegar hasta les 5 persones, siendo dos d'elles suplentes, xugando dambos equipos nuna sola canasta. La duración de cada partíu sedrá de 10 minutos repartíos en dos partes de 5, demientres que la puntuación a algamar ye de 16 puntos.

Pa ver les normes completes y otres informaciones sobre la inscripción, CALCA EQUÍ

FONTE: Infoasturies.net


Llunes de viñetes



Más viñetes nel Blogue Empotronáu, encamentamos la so visión y la visita a esti blogue.

Al menos 11 mineros deteníos esta mañana

Nueva xornada d'enfrentamientos y detenciones n'Asturies.

Los enfrentamientos ente Guardia Civil y trabayadores de la minería pela mañana acaben, pel momentu, con 11 mineros deteníos. Les primeres noticies falaben d'una detención n'Uxo, nel corte na A-66, al mediu día conocióse la detención d'otres 10 persones nuna barricada na Autovía minera a la altura de la llocalidá sierense de Bendición. La conflictividá social n'Asturies va n'aumentu y el númberu de detenciones en protestes sociales nun para de medrar, mesmamente la selmana pasada foron deteníes n'Uviéu más de 20 persones.