miércoles, 26 de septiembre de 2012

Comunicáu de CSI-CGT-CNT-SUATEA pal 26-S

CSI, CGT, CNT y SUATEA vienen d'asoleyar un comunicáu conxuntu con motivu de la xornada de llucha convocada pa esti miércoles 26 de setiembre, onde l'actu central sedrá la manifestación con salida na xixonesa Plaza L'Humedal de magar les 19:00. Darréu'l comunicáu completu:

Esto nun da pa más. Lo qu’entamó siendo una “cris”, finó siendo una estafa qu’asoleyó la braera cara’l capitalismu. Les presones nun importen, namás son man d’obra y mercancía. Lo único qu’importa son los mercados y los dividendos.
Banqueros, especuladores y grandes empresarios ensin escrúpulos, fáense millonarios. Criminales de traxe y corbata qu’enxamás van entrar na cárcele. Los ricos faen el so agostu y aumenten la so riqueza con impunidá dafechu.
El paru, la precariedá y la probitú cébense cola clas obrera y los drechos llaborales yá formen parte’l pasáu. Hai quien camienta que les obreres y los obreros tienen drechos. Pero nun ye verdá. Los únicos que ñacen con drechos son los ricos.
L’acosu y derribu a la Sanidá, la Educación y los Servicios Sociales, van facer que perdamos la nuesa salú, que los nuesos fíos y fíes nun puedan estudiar y que les presones con necesidaes dependan de lo qu’atopen na basoria.
Hai 100.000 paraos y paraes n’Asturies. 70.000 nun cobren nada o cobren el subsidiu de desemplegu (unos 400 €). Otros y otres 30.000 tienen la suerte de sobrevivir con un pocu más de la mesma miseria.
Despídennos, empobrécennos, desáhuciennos, quítennos la nuesa salú, tórnennos en man d’obra analfabeta y, si protestamos, múltennos, péguennos, detiénennos y encarcélennos. La represión ye’l recursu los poderosos.
Y, por si nun fuere enforma, agora van saquear les pensiones. Too-yos paez poco. El capitalismu ye asina: la banca siempre tien de ganar.
Mentantu, les caxes fuertes de los bancos quéden pequeñes y yá nun dan abastu pa guardar más perres. Pero cuandu daquién nun tien nada, lo único que-y queda por facer ye quitá-ylo a quien lo tien too.
Pues, ¡manes a la obra!. ¡Vamos facelo!. ¡Y ensin contemplaciones!.
CSI-CGT-CNT-SUATEA

La Delegación de Gobiernu intenta illegalizar la manifestación de CSI-CGT-CNT-SUATEA

Dende los convocantes denuncien los pilancos que la Delegación de Gobiernu ta poniendo al traviés de la Policía pa la cellebración de la manifestación d'esta tarde na Plaza L'Humedal de Xixón. Sicasí, llegalizada o non, llamen a acudir y movilizase.
 
Dende los sindicatos convocantes de la manifestación d'esta tarde na Plaza L'Humedal de Xixón manifiesten que "Gabino de Lorenzo, Delegáu del Gobiernu en Asturies, ta intentando illegalizar la manifestación convocada pa güei, 26 de setiembre, en Xixón, polos sindicatos CSI, CGT, CNT y SUATEA".

Según despliquen, "Esta mañana, representantes de la CSI repondieron a una citación na Comisaría de Policía, onde se-yos dixo que Delegación de Gobiernu nun dexaría la salida de la manifestación. Presentaos los permisos y “papeles” reglamentarios, debidamente rellenaos en tiempu y forma, la Policía unvió-yos a Delegación de Gobiernu. Los responsables de la CSI mandaron la documentación a Delegación de Gobiernu y atópense a la espera de contestación".
Pa la Corriente Sindical, "esto nun ye más qu’una maniobra de Delegación de Gobiernu que, ante la tensión provocada pola brutalidá policial ayeri en Madrid, la fuelga xeneral en Euskal Herría y la convocatoria, pa güei, d’un día de llucha en tol Estáu, pretenden afogar les protestes populares con artimañas pseudo-llegales condergaes, de mano, al fracasu".

Poro, afiten que la manifestación va a cellebrase "Sí o sí", de magar les 19:30 "polos drechos de la clase obrera, del pueblu, acabemos col capitalismu d'una vegada por toes".

FONTE: Infoasturies