Conceyu Abiertu contra la práutica del "Fracking" n’Asturies

Dende Conceyu Abiertu tamos entamando la movilización a distintos niveles escontra’l “Fracking” o resquiebra hidráulica, una teúnica consiste en realizar una perforación vertical na tierra hasta algamar la capa del estratu, pa a continuación efectuar una perforación horizontal al traviés della. Dempués, incorpórense esplosivos pa provocar pequeñes francedures ya inyéctense miles de tonelaes d’agua a muncha presión, xunto con arena y aditivos químicos tóxicos (onde la mayoría les vegaes se desconoz el conteníu exautu d’estos químicos), ente los que s’empleguen benzenos, xilenos o cianuros, hasta llegar a unas 500 sustancies químiques, munches d’elles canceríxenes, mutaxenes, y con otres propiedaes mui emolecedores). Esti agua a presión france la roca lliberando’l gas que llueu, xunto col agua, l’arena y los aditivos tornen a la superficie.

 

La resquiebra hidráulica produz un impautu que nun ye almisible dende’l puntu de vista ecolóxicu y mediuambiental, y amás d’ello, si mos treslladamos a custiones puramente económiques, tamién ye una práutica refugable dafechu, al nun ser más qu’una operación na que’l beneficiu van a sacalu una serie de sociedaes pertenecientes a empreses multinacionales privaes, que nin van a xenerar actividá económico nin puestos de trabayu, polo que xunío al impautu mediuambiental, el pueblu asturianu debe refugar una actividá que mos agrede a tolos niveles.

 

Nesi sen, dende Conceyu Abiertu vemos necesaria la movilización a nivel d’Asturies, dao que’l Fracking afeuta a dellos conceyos del país, polo que ye imprescindible, d’un lláu, consiguir la concenciación de la sociedá sobre esta llaceriosa actividá, y d’otru lláu, un compromisu de les instituciones municipales, autonómiques, y si ye preciso estatales, pa que nun permitan el desendolcu de la resquiebra hidráulica nel nuesu territoriu.

 

Asina, dende Conceyu Abiertu yá presentamos en Villaviciosa una instancia p’algamar el refugu unánime de les fuercies con representación nel Ayuntamientu, y siguiremos trabayando nesa doble vertiente de presión a les instituciones, y aición na cai pa concenciar y movilizar a la sociedá al traviés de distintes aniciatives y actividaes.

 

Tamién ye importante la unidá de los axentes sociales, ecoloxistes, políticos y sindicales p’algamar la suficiente fuerza que permita l’aición en comuña pa defender el nuesu mediu natural.

Poro, dende Conceyu Abiertu refugamos a nivel nacional la resquiebra hidráulica, y como consecuencia tamos trabayando pa dar una rempuesta afayaíza ante esti problema de tolos y toles asturianes.

 

FONTE: www.conceyuabiertu.org

 

Testu de la intervención de Darréu nel actu políticu central nel DMR'12

Mui bones a toes y toos. Gracies por sofitar esti actu cola vuestra asistencia y participación.

Como podeis ver, el llema d'esta edición del Día de la Mocedá Revolucionario ye bien direutu ya ilustrativu “Nin capitalismu, nin Estáu Español: La mocedá pol socialismu y la soberanía d'Asturies. Asina decidimos dende DARRÉU entitular esti DMR, ensín eufemismos nin medies tintes. ¿Por qué? La realidá del día a día na cai espeya a les clares que nun queda otra yá que ser direutos na nuesa estratexa y nel nuesu discursu. Nun podemos tolerar esta fola represiva, españolista y neolliberal quedando de brazos cruciaos y asoleyando mensaxes colos que'l sistema imperante y el Reinu d'España tean cómodos. Preferimos ser direutos y dici-yos que non, que nun queremos más puxarra pal Pueblu Trabayador Asturianu, y que si ellos ca vuelta que falen disimulen pior la so natura reaccionaria, nós, nun vamos tapecer el nuesu enfotu revolucionario.

Yá pasaron 78 años dende que la clase obrera asturiana entamó ella mesma la Comuña Asturiana y dió'l pasu definitivu pa tomar el cielu por asaltu, pa tornar l'orde social, económicu y políticu vixente por otru al serviciu de les necesidaes y pruyimientos de los y les trabayadores. La situación de l'Asturies en 1934 nun yera mui estremada a la d'anguañu. La precariedá llaboral yera enforma grande, güei tamién. L'altu nivel de paru, sobre manera'l xuvenil, afogaba a les families, como anguañu. La falta de perspectives pa mozos y moces nesti país yera común, güei vivimos lo mesmu. El nivel represión política y sindical yera xabaz, cosa que vivimos tamién nestos díes. Por supuestu, y nun diba ser menos, taba acabantes de xubir al poder nel Estáu Español una fuercia política de derecha más reaccionaria, como anguañu. El sistema capitalista taba nuna fonda crisis y los sos instrumentos, vease l'Estáu Español, golpeaben perfuerte a la clase trabayadora asturiana.

Como veis, compañeros, tres estos 78 años dende la Revolución Asturiana de 1934 pudieron pasar munches coses, pero los paralelismos hestóricos son claros. La crisis que xenera'l sistema capitalista y los sos inquisidores modernos sigue golpiando namás nos llares del Pueblu Trabayador, sigue siendo la mayoría social quien paga los erros de los responsables d'un sistema socioeconómicu y políticu inxustu por definición. Como veis, hai munches asemeyances cola situación crítica que vive'l Pueblu Trabayador Asturianu d'anguañu y la situación del 34. Y que coses enseña la hestoria, la situación de represión, imposición, aculturización, esplotación y miseria produzse baxo'l mesmu Réxime sociopolíticu y económicu: Perviviendo'l capitalismu y el Reinu d'España en dambos momentos hestóricos.

Asina pues, ¿Cuál ye la opción que tien de tomar la mocedá asturiano? Creemos, dende'l soberanismu xuvenil y revolucionario nun mos queda otra que lluchar, día a día, pa llibranos d'estos dos cáncanos que son el capital y España. La crisis del capitalismu, ésta concreta, ye cosa d'unos años p'acá, si. Pero Asturies lleva viviendo en crisis dende fai décades, con una reconversión industrial qu'entá nun llegó y con una situación social y política permurnia. Una crisis permanente qu'obedez a los intereses de la burguesía pero tamién a la opresión nacional que vivimos nesti país, onde los nuesos drechos niéguense sistematicamente, con una soberanía que nos correspuende robada pol Estáu y un supuestu autonomismu qu'en la realidá nun esiste. Dende Darréu llevamos años denunciando esta crisis permanente, señalando a los sos responsables y asegurando que la mocedá d'esta nación asturiana va ser la mayor perxudicada de too ello

L'ochobre asturianu de 1934 enseñónos una gran leición: en 48 hores podemos tumbar a l'Estáu Español y al capitalismu dende'l Pueblu. Obviamente, nun ye cuestión de tirase a la tresformación social dende la nada, por que eso significaría fracasu. Pero ciertamente, la mocedá asturiano d'anguañu tenemos que tener presente esta idea. Nada ye invencible y nada ye imposible. El capitalismu y el Reinu d'España tan nel principiu del fin, y nós, los mozos y moces que creemos na soberanía nacional d'Asturies y nuna alternativa real al capitalismu tenemos que tar a l'altura nesti importante momentu hestóricu que se nos presenta.

La mocedá asturiano tien de tener en cuenta que col capitalismu nun hai salida nenguna más que la misería y lo indignu pal ser humanu. Y la mocedá d'esti país nun tien de confiar en proyeutos que nun quieran acabar coles estructures de la burguesía. Nun valen, polo tantu, soluciones que nun quieran acabar con España o la Xunión Europea. Nun valen por que taríemos falando de reformes, pero enxamás de ruptures nin tresformaciones braeres. Polo tanto, yá lo diximos, n'Asturies: NIN CAPITALISMU, NIN ESTÁU ESPAÑOL.

L'apueste real ye una Asturies nueva y un mundu nuevo. Los xóvenes, en toles revoluciones, fueron un gran factor humanu pal so desendolcu y el so trunfu. Nun tien que ser menos n'Asturies. Por eso llamamos a la mocedá a lluchar pola soberanía d'Asturies y pol socialismu. Namás ganando soberanía esti pueblu va poder dir garrando poder decisoriu y ser autónomo de verdá del capitalismu español y mundial. Namás el camín pola soberanía económica y política puede garantizar a la mocedá asturiano un futuru estable, dignu y en llibertá.

Pa finar, nesti Día de la Mocedá Revolucionario, queremos zarrar cola idea de tresmitivos que dende Darréu vamos siguir puxando pa que n'Asturies tengamos un espaciu xuvenil soberanista, revolucionario y aglutinador daveres. Asina, animamos a tola xente a averase a la nuesa organización, participar nel nuesu trabayu y construyir con nós una Asturies rebelde y orguyosa de sí mesma. Naide va regalanos nada a la mocedá asturiano y muncho menos les marionetes poltroneres d'España que tan de forma parásita na Xunta Xeneral. Ye más necesariu, más que nunca, que nos organicemos nos conceyos y nel país buscando la unidá popular que torne la dignidá al Pueblu Trabayador Asturianu. Ye fundamental crear rede y base social cola fin d'aparai los pies a la oligarquía española, esplotadora y saqueadora del nuesu pueblu. ¡Defendamos Asturies y despoxemos a los parásitos del so poder!

¡PUXA ASTURIES LLIBRE Y SOCIALISTA!

¡PUXA DARRÉU!
FONTE: www.darreu.org